ខ្លាចខ្លាំងណាស់ ! រត់ទៅដេកប៉ុស្តិ៍ប៉ូលិសទាំងយប់
រាជធានីភ្នំពេញ ៖ ស្ត្រីម្នាក់ដោយសារតែខ្លាចខ្លាំងពេកមិនហ៊ានដេកនៅផ្ទះខ្លួនឯងក៏បានរត់ដេកនៅប៉ុស្តិ៍នគរបាលសង្កាត់ចោមចៅតាំងពីយប់ថ្ងៃទី២៤ រហូតដល់ព្រឹកថ្ងៃទី២៥ …
រាជធានីភ្នំពេញ ៖ ស្ត្រីម្នាក់ដោយសារតែខ្លាចខ្លាំងពេកមិនហ៊ានដេកនៅផ្ទះខ្លួនឯងក៏បានរត់ដេកនៅប៉ុស្តិ៍នគរបាលសង្កាត់ចោមចៅតាំងពីយប់ថ្ងៃទី២៤ រហូតដល់ព្រឹកថ្ងៃទី២៥ ខែវិច្ឆិកា ឆ្នាំ២០១៦ ព្រោះតែត្រូវប្តីវាយទាត់ធាក់ និងដាល់ឡើងហើមមុខហើមមាត់អស់រលីង ។
ប្រភពពីសមត្ថកិច្ចប៉ុស្តិ៍ចោមចៅបានឲ្យដឹងថា ស្ត្រីរងគ្រោះដែលរត់មកដេកនៅប៉ុស្តិ៍ទាំងយប់នេះឈ្មោះ ម៉េង ធូ អាយុ៣២ឆ្នាំ ជាកម្មការិនីរោងចក្រ មានកូនជាមួយប្តីមុន៣នាក់ និងមានកូនជាមួយប្តីក្រោយ១នាក់ ។ ចំណែកបុរសជាប្តីក្រោយដែលវាយធ្វើស្ត្រីរងគ្រោះនេះឈ្មោះ ម៉ៅ គឹមហៀង ហៅ ចាន់នី អាយុ៣០ឆ្នាំ ជាកម្មកររោងចក្រ ។ ទាំង២នាក់នេះបច្ចុប្បន្នស្នាក់នៅបន្ទប់ជួលលេខ១៧ក ស្ថិតក្នុងភូមិជម្ពូរវ័ន្ត សង្កាត់ចោមចៅ ខណ្ឌពោធិ៍សែនជ័យ កាលពីមុនរស់នៅភូមិពាមស្តី ឃុំព្រែកឫស្សី ស្រុកល្វាឯង ខេត្តកណ្ដាល ។
ប្រភពពីស្ត្រីរងគ្រោះបានឲ្យសមត្ថកិច្ចដឹងថា នាងនិងអ្នកជិតខាងឧស្សាហ៍ខ្ចីលុយគ្នាចាយពេលដែលមានការខ្វះណាស់ ហើយមុនពេលកើតហេតុនាងបានឲ្យអ្នកជិតខាងម្នាក់ខ្ចីលុយ១ម៉ឺនរៀល លុះល្ងាចថ្ងៃទី២៤វិច្ឆិកា ដោយសារតែអ្នកខ្ចីលុយនោះគាត់លក់ទូរស័ព្ទបានលុយក៏យកលុយមកសងវិញ ។ ស្ត្រីជាប្រពន្ធបន្តទៀតថា នៅពេលប្តីឃើញនាងមានលុយក៏ចោទប្រកាន់នាងថាមានសហាយស្មន់ជាមួយអ្នកជិតខាង ពេលនោះប្តីក្រោយរបស់នាងក៏វាយ ទាត់ ធាក់ និងដាល់ចំៗកណ្ដាលមុខនាង បណ្ដាលឲ្យនាងហើមមុខហើមមាត់ប៉ុនៗណាណី ។ ហើយដោយសារតែនាងខ្លាចខ្លាំងពេកមិនហ៊ានដេកផ្ទះព្រោះខ្លាចប្តីនាងវាយទៀត ក៏រត់មកដេកនៅប៉ុស្តិ៍ប៉ូលិសតែម្តង ។
សមត្ថកិច្ចបញ្ជាក់ថា លុះព្រឹកថ្ងៃទី២៥ ខែវិច្ឆិកា ឆ្នាំ២០១៦នេះ សមត្ថកិច្ចបានចុះទៅចំណុចផ្ទះជួលដែលស្ត្រីខាងលើរស់នៅដើម្បីនាំខ្លួនបុរសជាប្តីយកមកសាកសួរ ប៉ុន្តែបុរសជាប្តីបានរត់គេចខ្លួនបាត់ទៅហើយ ៕
ចែករំលែកព័តមាននេះ