ស្ត្រីម្នាក់រងរបួសធ្ងន់ ចំណែកកូនៗចំនួនពីរនាក់ទៀតរងរបួសស្រាល ហើយត្រូវបានគេបញ្ជូនទៅសង្គ្រោះនៅមន្ទីរពេទ្យបង្អែកខេត្តប៉ៃលិន ខណៈពេលមានបុរសម្នាក់
ខេត្តប៉ៃលិន ៖ ស្ត្រីម្នាក់រងរបួសធ្ងន់ ចំណែកកូនៗចំនួនពីរនាក់ទៀតរងរបួសស្រាល ហើយត្រូវបានគេបញ្ជូនទៅសង្គ្រោះនៅមន្ទីរពេទ្យបង្អែកខេត្តប៉ៃលិន ខណៈពេលមានបុរសម្នាក់ស្រវឹងស្រាជោកជាំទាំងព្រឹក ហើយបើកបររថយន្តក្នុងល្បឿនលឿនត្រង់ចំណុចផ្លូវកោង លុះបួងចង្កូតមិនទាន់ ក៏ជ្រុលទៅបុកជាមួយនឹងម៉ូតូពេញទំហឹង ក្នុងទិសដៅច្រាសគ្នា បណ្តាលឱ្យដួលប្រាវរងរបួសធ្ងន់-ស្រាលតែម្តង។
ហេតុការណ៍ករណីគ្រោះថ្នាក់ចរាចរណ៍ រថយន្តអ្នកស្រវឹងបើកបរលឿនត្រង់ផ្លូវកោង ជ្រុលទៅបុកម៉ូតូនេះ បានកើតឡើងកាលពីវេលាម៉ោង០៧និង៤០នាទីព្រឹក ថ្ងៃទី១៨ ខែមិថុនា ឆ្នាំ២០២២ នៅចំណុចផ្លូវជាតិលេខ៥៩ ស្ថិតក្នុងភូមិបុសស្អំ ឃុំស្ទឹងកាច់ ស្រុកសាលាក្រៅ ខេត្តប៉ៃលិន បណ្ដាលឱ្យមនុស្សរងរបួសចំនួន០៣នាក់ ខូចខាតរថយន្តចំនួន០១គ្រឿង និងម៉ូតូចំនួន០១គ្រឿង។
ប្រភពព័ត៌មានពីនគរបាលចរាចរណ៍ជើងគោក បានឱ្យដឹងថា ៖ អ្នកបើកបររថយន្តមានឈ្មោះ ជន សុខុម ភេទប្រុស អាយុ៦២ឆ្នាំ រស់នៅភូមិបរហ៊ុយជើង សង្កាត់បរយ៉ាខា ក្រុងប៉ៃលិន ខេត្តប៉ៃលិន ដោយបើករថយន្តម៉ាកកាមរីបាឡែន ពណ៌ទឹកប្រាក់ ពាក់ស្លាកលេខ ភ្នំពេញ 2Z-3829 (បើកបរក្នុងស្ថានភាពស្រវឹងជោកជាំ) ។ ចំណែកជនរងគ្រោះមានឈ្មោះ អូន ចរិយា ភេទស្រី អាយុ៣០ឆ្នាំ រងរបួសធ្ងន់ បានបើកម៉ូតូម៉ាក ហុងដាឌ្រីម ពណ៌ខ្មៅ ពាក់ស្លាកលេខ ប៉ៃលិន 1C-0912 ខូចខាតផ្នែកខាងមុខ ។ រីឯអ្នករួមដំណើរវិញ ទី១- ឈ្មោះ លី សា ភេទស្រី អាយុ០៤ឆ្នាំ ត្រូវជាកូន និងទី២- ឈ្មោះ វ៉ិត សុវត្ថិ ភេទប្រុស អាយុ៧ឆ្នាំ ត្រូវជាកូន ទាំងអស់គ្នារស់នៅភូមិវាល ឃុំសាលាក្រៅ ស្រុកសាលាក្រៅ ខេត្តប៉ៃលិន។
ប្រភពដដែលបន្តថា ចំពោះមូលហេតុគ្រោះថ្នាក់ខាងលើនេះ គឺបណ្ដាលមកពីបុរសភាគីខាងរថយន្ត បើកបរក្នុងស្ថានភាពស្រវឹងជោកជាំ និងក្នុងល្បឿនលឿន លុះមកដល់ត្រង់ចំណុចផ្លូវកោង ក៏បួងចង្កូតមិនទាន់ ហើយក៏ជ្រុលទៅបុកម៉ូតូស្រីរងគ្រោះ បណ្តាលឱ្យដួលរបួសធ្ងន់ស្រាលទាំង៣នាក់ម្តាយនិងកូនតែម្តង។
ពាក់ព័ន្ធនឹងបញ្ហានេះ បច្ចុប្បន្នជនរងគ្រោះ ត្រូវបានក្រុមគ្រួសារ បញ្ជូនទៅកាន់មន្ទីរពេទ្យបង្អែកខេត្តប៉ៃលិន ចំណែករថយន្ត និងម៉ូតូ ក្រោយពេលវាស់វែងរួច ត្រូវបាននគរបាលដកហូតយកមករក្សាទុកនៅអធិការដ្ឋាននគរបាលស្រុកសាលាក្រៅ ដើម្បីរង់ចាំធ្វើការដោះស្រាយតាមនីតិវិធី៕
ចែករំលែកព័តមាននេះ