ជនសង្ស័យម្នាក់បានជិះម៉ូតូមួយគ្រឿងធ្វើសកម្មភាពឆក់កាបូប និងទូរស័ព្ទមួយគ្រឿងពីជនរងគ្រោះដល់ក្នុងផ្ទះអ៊ុតសក់តែម្តង តែត្រូវជនរងគ្រោះស្រែកឆោឡោ
រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា ជនសង្ស័យម្នាក់បានជិះម៉ូតូមួយគ្រឿងធ្វើសកម្មភាពឆក់កាបូប និងទូរស័ព្ទមួយគ្រឿងពីជនរងគ្រោះដល់ក្នុងផ្ទះអ៊ុតសក់តែម្តង តែត្រូវជនរងគ្រោះស្រែកឆោឡោបង្កអោយមានការភ្ញាក់ផ្អើលដល់ប្រជាពលរដ្ឋនាំគ្នាដេញចាប់បាន រួចប្រគល់សមត្ថកិច្ចកាលពីវេលាម៉ោង១០យប់ ថ្ងៃទី១៨ ខែមិថុនា ឆ្នាំ២០២២ នៅត្រង់ចំណុចផ្ទះអ៊ុតសក់យីហោ «រស្មី» មួយកន្លែង ស្ថិតក្នុងភូមិព្រៃទារ១ សង្កាត់ចោមចៅទី៣ ខណ្ឌពោធិ៍សែនជ័យ ។
សេចក្តីរាយការណ៍បន្តថា ជនសង្ស័យដែលត្រូវសមត្ថកិច្ចឃាត់ខ្លួននោះ មានឈ្មោះ ព្រីង សុភ័ក្ត្រ ភេទប្រុស អាយុ២៥ឆ្នាំ មុខរបរកម្មករ ស្នាក់នៅបន្ទប់ជួល ក្នុងភូមិព្រៃទា សង្កាត់ចោមចៅទី៣ ខណ្ឌពោធិ៍សែនជ័យ នឹងមានស្រុកកំណើតនៅភូមិទន្លេរនាម ឃុំចំប៉ី ស្រុកអង្គជ័យ ខេត្តកំពត ។ ចំណែកនារីរងគ្រោះវិញមានឈ្មោះ ជុំ រស្មី អាយុ២២ឆ្នាំ មុខរបរសិស្ស ស្នាក់នៅកន្លែងកើតហេតុខាងលើ មានស្រុកកំណើតនៅភូមិថ្មការ ឃុំជង្រុក ស្រុកគងពិសី ខេត្តកំពង់ស្ពឺ ចំពោះសម្ភារៈដែលនៅក្នុងកាបូបស្ពាយ មានលុយចំនួន៣៦៥០០រៀល និងទូរស័ព្ទម៉ាក OPPO មួយគ្រឿង។
តាមប្រភពព័ត៌មានពីសមត្ថកិច្ចបានអោយដឹងថា នៅមុនពេលកើតហេតុ នៅវេលាម៉ោង១០យប់ ថ្ងៃទី១៨ ខែមិថុនា ឆ្នាំ២០២២ ជនរងគ្រោះ និងបងស្រីនៅក្នុងផ្ទះអ៊ុតសក់យីហោ «រស្មី» បន្ទាប់មកបងស្រីរបស់ជនរងគ្រោះបានចូលទៅបន្ទប់ទឹកដើម្បីងូតទឹកបាត់ទៅ ស្រាប់តែមានជនសង្ស័យម្នាក់ជិះម៉ូតូមួយគ្រឿងម្នាក់ឯង ម៉ាកហុងដាឌ្រីម ស៊េរីឆ្នាំ២០១៥ ពណ៍ខ្មៅ ពាក់ស្លាកលេខ ភ្នំពេញ1CZ-1059 មកឈប់នៅខាងមុខផ្ទះអ៊ុតសក់ ហើយក៏ដើរចូលទៅសួរនាំជនរងគ្រោះថា «ចែម្នាក់ទៀតទៅណា» ។
ប្រភពដដែលបន្តថា គ្រាន់តែសួរភ្លាម ជនសង្ស័យរូបនេះក៏បានស្ទុះទៅឆក់កាបូបស្ពាយដែលទុកខាងក្រោយខ្នង រួចយកទូរស័ព្ទម៉ាក OPPO មួយគ្រឿងទៀត ដែលទុកក្នុងហោប៉ៅខោតែម្តង ភ្លាមៗនោះជនរងគ្រោះក៏បានទាញយកវិញ ក៏ប្រវា.យប្រតប់គ្នាជាមួយជនសង្ស័យ បង្កអោយមានការភ្ញាក់ផ្អើលដល់បងប្អូនប្រជាពលរដ្ឋនាំគ្នាជួយចាប់ រួចប្រគល់អោយសមត្ថកិច្ចតែម្តង។
បច្ចុប្បន្ន ជនសង្ស័យត្រូវបានកម្លាំងប៉ុស្តិ៍នគរបាលរដ្ឋបាលចោមចៅទី៣ សាកសួរ និងកសាងសំណុំរឿងបញ្ជូនខ្លួនទៅអធិការដ្ឋានខណ្ឌពោធិ៍សែនជ័យ ដើម្បីចាត់ការបន្តទៅតាមនីតិវិធី ៕
ចែករំលែកព័តមាននេះ