រាជធានីភ្នំពេញ ៖ នៅថ្ងៃទី១៧ ខែមិថុនា ឆ្នាំ២០២២នេះ ក្រុមការងារអភិរក្សសត្វកម្ពុជា បានចាប់ផ្តើមដំណើរការជំរឿនសត្វត្មាតប្រចាំឆ្នាំរបស់ខ្លួន ស្ថិតក្នុងក្របខណ្ឌ នៃការធ្វើជំរឿនប្រចាំឆ្នាំចំនួន៥ដង ដើម្បីតាមដានលើទិន្នន័យវត្តមានរបស់សត្វត្មាត…
រាជធានីភ្នំពេញ ៖ នៅថ្ងៃទី១៧ ខែមិថុនា ឆ្នាំ២០២២នេះ ក្រុមការងារអភិរក្សសត្វកម្ពុជា បានចាប់ផ្តើមដំណើរការជំរឿនសត្វត្មាតប្រចាំឆ្នាំរបស់ខ្លួន ស្ថិតក្នុងក្របខណ្ឌ នៃការធ្វើជំរឿនប្រចាំឆ្នាំចំនួន៥ដង ដើម្បីតាមដានលើទិន្នន័យវត្តមានរបស់សត្វត្មាត និងការត្រៀមរៀបចំផែនការបន្តក្នុងការការពារ ថែរក្សា និងអភិរក្សប្រភេទសត្វស្លាបកម្រនេះឲ្យបានគង់វង្ស ។
ទីតាំងជំរឿនចំនួន ៤កន្លែង ត្រូវបានបើកក្នុងពេលដំណាលគ្នា នាថ្ងៃទី១៧ ខែមិថុនានេះ គឺ ៖
ទី១-ដែនជម្រកសត្វព្រៃសម្បូណ៌ក្នុងខេត្តក្រចេះ
ទី២-ដែនជម្រកសត្វព្រៃសៀមប៉ាងក្នុងខេត្តស្ទឹងត្រែង
ទី៣-ដែនជម្រកសត្វព្រៃឆែប ក្នុងខេត្តព្រះវិហារ
និងទី៤-ដែនជម្រកសត្វព្រៃស្រែពក នៅក្នុងខេត្តមណ្ឌលគិរី ។
លោក នេត្រ ភក្ត្រា រដ្ឋលេខាធិការក្រសួងបរិស្ថាន បានចូលរួមការធ្វើជំរឿនសត្វត្មាតលើកទី៣ ប្រចាំឆ្នាំ២០២២ នេះនៅតំបន់ដែនជម្រកសត្វព្រៃសម្បូណ៌ ដោយមានការអញ្ជើញចូលរួមពីតំណាងអង្គការ WWF និងអង្គការអភិរក្សអន្តរជាតិ CI ។ ទិន្នន័យរួមចុងក្រោយមួយ នឹងត្រូវបូកសរុប បន្ទាប់ពីប្រមូលបានទិន្នន័យពីទីតាំងជំរឿននានា ។
លោក នេត្រ ភក្ត្រា រដ្ឋលេខាធិការក្រសួងបរិស្ថាន បានគូសបញ្ជាក់ថា ការធ្វើជំរឿនសត្វត្មាតប្រចាំឆ្នាំនេះ គឺដើម្បីដឹងពីការវិវត្ត នៃចំនួនសត្វត្មាតនៅកម្ពុជា ដើម្បីងាយស្រួលក្នុងការគ្រប់គ្រង និងដាក់ចុះវិធានការផ្សេងៗក្នុងបំណងការពារ ឲ្យបាននូវប្រភេទសត្វដ៏កម្រនេះ ។
លោក នេត្រ ភក្ត្រា បានថ្លែងថា ទិន្នន័យជំរឿនសត្វត្មាតកាលពីឆ្នាំ២០២១ កន្លងទៅបង្ហាញថា សត្វត្មាត៣ ប្រភេទដែលមាននៅប្រទេសកម្ពុជា គឺត្មាតភ្លើង ត្មាតត្នោត និងត្មាតកសផេះ មានវត្តមានសរុបចំនួន ១២១ក្បាល នៅក្នុងអាហារដ្ឋានត្មាតចំនួន ៤កន្លែងនៅតំបន់ការពារធម្មជាតិកម្ពុជា ក្នុងនោះមានត្មាតភ្លើង ២០ក្បាល ត្មាតផេះ ៦៦ក្បាល និងត្មាតត្នោត ៣៥ ក្បាល ។
លោក នេត្រ ភក្ត្រា បានគូសបញ្ជាក់ថា លទ្ធផលនៃការរាប់ចំនួនសត្វត្មាតដោយអាហារដ្ឋានត្មាត នៅដែនជម្រកសត្វព្រៃសំបូរ នៃតំបន់ទេសភាពព្រៃលិចទឹកមេគង្គកាលពីឆ្នាំ២០២១ កន្លងទៅមានចំនួន ៤១ ក្បាល និងបានបង្ហាញថា ចំនួនសត្វត្មាតសរុបទាំង ៣ ប្រភេទ បញ្ចូលគ្នាបានកើនឡើងទ្វេដង សម្រាប់តំបន់នេះពោលគឺពីចំនួន ២០ក្បាល ដល់ចំនួន ៤១ក្បាល សម្រាប់ចន្លោះចុងខែមិថុនា ដល់ចុងខែសីហាឆ្នាំ ២០២១ កន្លងទៅ ។
លោក នេត្រ ភក្ត្រា បានលើកឡើងថា កម្ពុជាគឺជាក្តីសង្ឃឹមចុងក្រោយ សម្រាប់ប្រភេទសត្វត្មាតទាំងនេះ នៅក្នុងតំបន់អាស៊ី អាគ្នេយ៍ ប៉ុន្តែចំនួននេះ បានធ្លាក់ចុះពាក់កណ្តាលក្នុងរយៈពេល ១០ឆ្នាំកន្លងមក ។ ដើម្បីការពារនិងអភិរក្សសត្វត្មាតឱ្យបានគង់វង្ស សកម្មភាពសិក្សាស្រាវជ្រាវ និងអភិរក្សសត្វត្មាតនៅប្រទេសកម្ពុជា បានចាប់ផ្តើមឡើងតាំងពីឆ្នាំ ២០០៤ ដែលនៅពេលនោះចំនួនសត្វត្មាត ដែលបានកត់ត្រាពេលធ្វើជំរឿន មានចំនួន ១៦២ ក្បាល ដែលជាទិន្នន័យធ្វើជំរឿនលើកដំបូង ។
ទិន្នន័យជំរឿនឆ្នាំ ២០១០ ចំនួនសត្វត្មាត បានកើនដល់ ២៨៩ ក្បាល ក៏ប៉ុន្តែចាប់ពីឆ្នាំ ២០១១ ដល់ ២០១៤ ចំនួនសត្វត្មាតមានការថយចុះគួរឱ្យបារម្ភ ចាប់ពីពាក់កណ្តាល ឆ្នាំ ២០១៤ រហូតដល់បច្ចុប្បន្ន ចំនួនសត្វត្មាតទាំង ៣ ប្រភេទមានចន្លោះពី ១២០ ទៅ ១៤០ ក្បាល ។ ដោយឡែកចំនួនសម្បុកដែលបានរកឃើញ និងការពារក៏មានការធ្លាក់ចុះពី ២៧ សម្បុក នៅក្នុងឆ្នាំ ២០១៥ មកសល់ត្រឹម ១៤ សម្បុកក្នុងឆ្នាំ ២០២១ ។ សត្វត្មាតទាំង ៣ ប្រភេទនេះ សុទ្ធសឹងតែត្រូវបានចាត់ថ្នាក់ជាប្រភេទសត្វជិតផុតពូជបំផុត ក្នុងបញ្ជីក្រហម នៃអង្គការ IUCN ៕
ចែករំលែកព័តមាននេះ