រាជធានីភ្នំពេញ៖ លោក ថោង ខុន រដ្ឋមន្ត្រីក្រសួងទេសចរណ៍ នាថ្ងៃទី១៣ ខែមិថុនា ឆ្នាំ២០២២នេះ បានបង្ហាញអំពីស្ថានភាពភ្ញៀវទេសចរផ្ទៃក្នុង ប្រចាំសប្តាហ៍ថ្ងៃទី១១-១២ ខែមិថុនា ឆ្នាំ២០២២ មានភ្ញៀវសរុបមានចំនួន ៣២៧,១៥៤នាក់ ក្នុងនោះ ភ្ញៀវជាតិ មានចំនួន ៣១០,២៥០នាក់ និងភ្ញៀវបរទេសផ្ទៃក្នុង មានចំនួន ១៦,៩០៤នាក់។
របាយការណ៍ក្រសួងទេសចរណ៍ បង្ហាញថា គោលដៅទេសចរណ៍សំខាន់ៗ រួមមាន៖ ខេត្តព្រៃវែង ៧៩,៦៩៥នាក់ ខេត្តព្រះសីហនុ ៥២,៤៥៨នាក់ ខេត្តបាត់ដំបង ៣៨,៩៥០នាក់ ខេត្តកំពត ៣១,៨៥៥នាក់ ខេត្តសៀមរាប ១៥,៩៥៩នាក់ រាជធានីភ្នំពេញ ១៤,៧៩៣នាក់ ខេត្តកំពង់ស្ពឺ ១៤,៤១៦នាក់ ខេត្តកែប ១២,៨៦៣នាក់ ខេត្តពោធិ៍សាត់ ១២,៦០២នាក់។
ជាការកត់សម្គាល់របស់លោករដ្ឋមន្ត្រី ថោង ខុន តួលេខខាងលើ កើនឡើងប្រមាណ ៣៩.៤៩% ធៀបនឹងចុងសប្តាហ៍កន្លងមក។ តាមការសង្កេតជាក់ស្តែង ភ្ញៀវ ដែលដើរកម្សាន្ត នៅតាមគោលដៅទេសចរណ៍នាប៉ុន្មានសប្តាហ៍ចុងក្រោយនេះ ភាគច្រើន ជាភ្ញៀវក្នុងខេត្តផ្ទាល់ ឬភ្ញៀវ ដែលនៅខេត្តជាប់គ្នា។
លោករដ្ឋមន្ត្រី បានបន្តថា ចំពោះភ្ញៀវ ដែលដើរកម្សាន្តចេញពីរាជធានីភ្នំពេញ ទៅកាន់គោលដៅទេសចរណ៍ឆ្ងាយៗ គឺថយចុះបន្តិចក្នុងសប្តាហ៍នេះ លើកលែងតែគោលដៅតំបន់ឆ្នេរ ពិសេសកំពត និងកែប៕ សុខ សារ៉ាយ
ចែករំលែកព័តមាននេះ