ខេត្តកំពង់ចាម ៖ ប្រតិភូនគរបាលនៃប្រទេសបង់ក្លាដេសចំនួន៧រូបបានទៅធ្វើទស្សនកិច្ចនៅស្នងការដ្ឋាននគរបាលខេត្តកាលពីវេលាម៉ោង៨ព្រឹកថ្ងៃទី១៨ មករា ២០១១ ដើម្បីដកពិសោធន៍ជំនាញនគរបាលបច្ចេកទេស
វិទ្យាសាស្ត្រពីកម្ពុជាសំរាប់យកទៅអនុវត្តនៅប្រទេសខ្លួន ។ លោកឧត្តមសេនីយ៍ត្រីនួន សាមិន ស្នងការនគរបាលខេត្តមានប្រសាសន៍ ខេត្តកំពង់ចាមមានក្រុងចំនួន២ ស្រុកចំនួន១៥ ឃុំមាន១៦៧ សង្កាត់៦ ភូមិ១.៧៥៨ភូមិ បណ្តោយព្រំដែនមានប្រវែងជាង១០០គីឡូម៉ែត្រ បើប្រៀបធៀបទៅនឹងបណ្តាខេត្ត-ក្រុងផ្សេងៗទៀតនៅក្នុងប្រទេសកម្ពុជា ខេត្តកំពង់ចាមមានផ្ទៃដីធំជាងគេ។ ស្នងការដ្ឋាននគរបាលខេត្តស្ថិតនៅភូមិទី៧ សង្កាត់កំពង់ចាម ក្រុងកំពង់ចាម មានផ្ទៃដី៥៥.៦០០ម៉ែត្រការ៉េ មានមន្ត្រីនគរបាលសរុបចំនួន៣.២៣៣នាក់ ក្នុងនោះស្រី្តចំនួន៦៩នាក់ ។ ស្ថានភាពជាក់ស្តែងចំនួននេះតិចនៅឡើយ មិនទាន់សមស្របទៅនឹងចំនួនប្រជាពលរដ្ឋដែលមានជិត២លាននាក់ ហើយប៉ុស្តិ៍រដ្ឋបាលចំនួន១៧៣ ។
លោកស្នងការបន្តថា តាមការកត់សំគាល់ចាប់តាំងពីឆ្នាំ១៩៧៩ រហូតមកដល់ឆ្នាំ១៩៩៣ នគរបាលមានការអន់ថយនៅឡើយ ក្នុងពេលដែលអង្គការសហប្រជាជាតិហៅថា UNTAC មានវត្តមាននៅក្នុងប្រទេសកម្ពុជាដើម្បីរៀបចំ
ការបោះឆ្នោតនោះ បានជួយបង្ហាត់បង្រៀនដល់នគរបាលកម្ពុជា ។ លោក Neale Furdon ទីប្រឹក្សាប្រតិបត្តិ និងស៊ើបអង្កេតនៃកម្មវិធីកំណែទម្រង់នគរបាល UNDP ប្រចាំប្រទេសបង់ក្លាដេសបានលើក ឡើងថា ការងារបច្ចេកទេស គឺមានលក្ខណៈស្រដៀងទៅនឹងជំនួយផ្នែកព្រហ្មទណ្ឌយុត្តិធម៌នៅកម្ពុជាដែលហៅថា CCJAP ដែលមានការ គាំទ្រប្រហាក់ប្រហែលគ្នា ។ រូបលោកមានសេចក្តីសោមនស្សរីករាយដែលបានដឹកនាំប្រតិភូនគរបាលបង់ក្លាដេសមកធ្វើទស្សនកិច្ចនគរបាលបច្ចេកទេសវិទ្យាសាស្រ្ត ។ ការងារនេះ ប្រតិភូអាចសិក្សាស្វែងយល់ ហើយដកបទពិសោធន៍ធ្វើឲ្យមានការរីកចំរើនលើជំនាញស្រាវជ្រាវដូចបច្ចេកទេសវិទ្យាសាស្រ្តដែលអាចយកទៅធ្វើជាបទពិសោធន៍របស់នគរបាលនៅប្រទេសបង់ក្លាដេស ។
លោកវរសេនីយ៍ឯកជឹម សេងហុង ស្នងការរងនគរបាលខេត្តទទួលផែនការិយាល័យកណ្តាលយុត្តិធម៌បានធ្វើបទបង្ហាញដោយលើកយកលទ្ធផលនៃការបង្រ្កាបបទល្មើសមួយនាពេលថ្មីៗនេះ គឺករណីក្រុមឃាតកចំនួន២នាក់ប្រើល្បិចល្បួងមិត្តភក្តិម្នាក់ទៅរឹតក និងអារ.កសម្លាប់ប្លន់យកម៉ូតូនៅក្នុងឡូត៍កៅស៊ូ ។ សមត្ថកិច្ចស្រាវជ្រាវចាប់បានជនសង្ស័យជាបន្តបន្ទាប់ទាំង២នាក់។ លោកស្នងការរងបានបង្ហាញពីសភាពការណ៍បទល្មើសកើតឡើងឆ្នាំ២០១០ ចំនួន២៤៤ករណី បើប្រៀបធៀបនឹងឆ្នាំ២០០៩មាន ការថយចុះចំនួន១១៧ករណី បង្កឲ្យស្លាប់ចំនួន៤៣នាក់ របួស១៧៧នាក់ ។ នារីរងគ្រោះដោយអំពើចាប់រំលោភមានចំនួន៣១នាក់ បាត់ម៉ូតូ ២៩គ្រឿង និងសំភារមួយចំនួនក្នុងនោះមាន បទឧក្រិដ្ឋចំនួន៩៤ករណី មានការថយចុះ៥១ករណី បទមជ្ឈិមមានចំនួន១៥០ករណីថយចុះ៦៦ករណី ។ លទ្ធផលបង្រ្កាបរួមបានចំនួន១៤៨ករណី ឃាត់ខ្លួនជនល្មើសបានចំនួន២៦០នាក់ស្មើ នឹង៦០,៦៥ភាគរយនៃរឿងហេតុដែលបានកើតឡើងក្នុងនោះបទឧក្រិដ្ឋចំនួន៤៧ករណី ឃាត់ខ្លួនចំនួន៥៥នាក់ បទមជ្ឈិមចំនួន១០១ករណី ឃាត់ខ្លួនចំនូន២០៥នាក់ ។ លោកឧត្តមសេនីយ៍ត្រី នួន សាមិន ស្នងការនគរបាលខេត្តបញ្ជាក់ថា ប្រតិភូបានទៅមើលអគារការិយាល័យនគរបាលបច្ចេកទេសវិទ្យាសាស្រ្តដែលកំពុងតែដំណើរការសាងសង់បានប្រហែល៧០% ក្រោមជំនួយគំរោងរបស់ CCJAP ស្ថិតនៅមុខការិយាល័យកណ្តាលយុត្តិធម៌ខេត្ត និងបន្តដំណើរទៅទស្សនកិច្ចនៅអធិ ការដ្ឋាននគរបាលស្រុកត្បូងឃ្មុំសំខាន់លើជំនាញបច្ចេកទេសវិទ្យាសាស្រ្ត ៕
ចែករំលែកព័តមាននេះ