ខេត្តប៉ៃលិន៖ ស្រ្តីមេម៉ាយវ័យក្មេងម្នាក់ កើតទុក្ខមិនសុខចិត្ត ខណ:នាំកូនតូចរបស់ខ្លួន ដែលមិនបានស្លៀកពាក់ឯកសណ្ឋានសិស្សទៅទទួលថវិកា (អាហារូបករណ៍) ចំនួន ៨០០០០រៀល នៅក្នុងបរិវេណសាលា លុះពេលទៅដល់ ស្រាប់តែលោកគ្រូ និងលោកនាយកសាលាស្តីបន្ទោស ធ្វើឱ្យនាងខឹងមិនព្រមទទួល ស្រាប់តែឱ្យកូនរបស់នាងផ្តិតមេដៃរួច យកថវិកានោះ ទៅបើកឱ្យអ្នកដទៃ។
ចំណែកលោកគ្រូ និងនាយកសាលា បានបដិសេធចំពោះការចោទប្រកាន់បែបនេះ ព្រោះនាងមិនព្រមទទួល ទើបយកទៅឱ្យអ្នកផ្សេង ដែលកំពុងខ្វះខាត ហើយត្រូវការ ក៏បង្កឱ្យមានបញ្ហាជជែកគ្នាតែម្តង។
ហេតុការណ៍ស្ត្រីមេម៉ាយវ័យក្មេងម្នាក់ អះអាងថា លោកនាយកសាលាមិនព្រមប្រគល់អាហារូបករណ៍ដល់កូនរបស់ខ្លួននេះ បានកើតឡើង កាលពីវេលាម៉ោង ១០ និង ៣០នាទី ព្រឹកថ្ងៃទី៧ ខែមិថុនា ឆ្នាំ២០២២ ស្ថិតនៅក្បែរសាលាបឋមសិក្សាភ្នំដំបង ក្នុងភូមិភ្នំដំបង សង្កាត់អូរតាវ៉ៅ ក្រុងប៉ៃលិន ខេត្តប៉ៃលិន។
សូមបញ្ជាក់ថា ការបើកប្រាក់ (អាហារូបការណ៍) ជូនសិស្សក្រីក្រ ចំនួន ៥៤នាក់ នៅក្នុងបរិវេណសាលាបឋមសិក្សាភ្នំដំបង កាលពីរសៀលថ្ងៃទី០៣ ខែមិថុនា ឆ្នាំ២០២២ ដោយបន្ទាប់ពីលោកគ្រូ ស្តីបន្ទោសដល់ស្រ្តីវ័យក្មេងខាងលើ ចំពោះបញ្ហាកូនរបស់ខ្លួន មិនពាក់ឯកសណ្ឋានសិស្ស ក៏បង្កជាបញ្ហាកើតឡើងតែម្តង។
ស្រ្តីមេម៉ាយវ័យក្មេងនោះ មានឈ្មោះ ទូច សារ៉ាន់ អាយុ ៣០ឆ្នាំ ជាស្រ្តីមេម៉ាយ មានកូនតូចម្នាក់ ឈ្មោះ វ៉ាន ផានិត ភេទប្រុស អាយុ ៧ឆ្នាំ ជាសិស្សរៀនថ្នាក់ទី០១ នៃសាលាបឋមសិក្សាភ្នំដំបង បានឱ្យភ្នាក់ងារយើងដឹងថា កាលពីរសៀលថ្ងៃទី០៣ ខែមិថុនា ឆ្នាំ២០២២ លោកគ្រូ និងលោកនាយកសាលា បានប្រាប់ឱ្យអាណាព្យាបាលនាំកូនទៅទទួលអាហារូបការណ៍ ជាថវិកាចំនួន ៨ម៉ឺនរៀល នៅក្នុងបរិវេណសាលាបឋមសិក្សាភ្នំដំបង លុះពេលទៅដល់លោកនាយកខាងលើ មិនបានណែនាំប្រាប់ឱ្យទៅប្តូរសម្លៀកបំពាក់តាមសម្រួលនោះទេ គិតតែស្តីបន្ទោសដៀលត្មេះ មើលងាយ ខណ:ដែលធ្វើជាគ្រូ បែរជាមើលងាយដល់នាង ហើយចាប់ទាញដៃកូនរបស់ខ្លួនទៅផ្តិតមេដៃ តែយកថវិកានោះ ទៅបើកឱ្យអ្នកផ្សេងជំនួសវិញ។
ប្រភពបន្តទៀតថា ជារៀងរាល់ ៣ខែម្តង គឺខាងសាលារៀន តែងតែបើកអាហារូបករណ៍ជូនដល់សិស្សក្រីក្រ ដោយកូនរបស់ខ្លួន បានទទួលថវិកា ចំនួន ២លើកមកហើយ លុះដល់លើកទី៣ ស្រាប់តែមានបញ្ហាជាមួយនឹងលោកនាយកសាលានេះតែម្តង។
ពេលនេះ នាងបានដាក់ពាក្យបណ្តឹងទៅខាងសាលាសង្កាត់ និងខាងកងរាជអាវុធហត្ថ ដើម្បីជួយអន្តរាគមន៍។
ពាក់ព័ន្ធទៅនឹងបញ្ហានេះ លោក អ៊ុន សុខា នាយកសាលាបឋមសិក្សាភ្នំដំបង បានឱ្យដឹងដែរថា ស្រ្តីខាងលើ មិនព្រមទទួលយកថវិកាជាអាហារូបករណ៍នោះទេ ក្រោយពីគាត់បានស្តីប្រដៅពាក់ព័ន្ធទៅនឹងកូនអត់បានស្លៀកពាក់ឯកសណ្ឋានសិស្សចូលទៅទទួលអាហារូបករណ៍។
លោកបន្តទៀតថា ស្រ្តីខាងលើ នាំកូនទៅបើកអាហារូបករណ៍ បែរជាស្លៀកពាក់បែបក្មេងឃ្វាលគោ ព្រោះខាងសាលាតម្រូវ ឱ្យស្លៀកពាក់ឯកសណ្ឋានសិស្ស ដើម្បីថតរូបផ្ញើទៅឱ្យថ្នាក់លើ ដោយខាងលោកមិនប្រាប់ជាមុននោះទេ ព្រោះធ្លាប់ទទួលរយ:ពេល ២ដងមកហើយដែរ។
លោកបន្តទៀតថា បន្ទាប់ពីបានណែនាំ មានម្តាយសិស្សដទៃទៀត ដែលកូនស្លៀកពាក់មិនសមរម្យ បាននាំគ្នាទៅប្តូរសម្លៀកបំពាក់ រីឯនាងបែរជាមិនទៅហើយបន្តរករឿង ថែមទាំងមិនព្រមទទួលយកអាហារូបករណ៍នោះឡើយ ហើយខាងលោក ក៏បានផ្ទេរថវិកានេះ ទៅឱ្យសិស្សផ្សេងជំនួសវិញបាត់ទៅហើយ។
ចំណែកលោក តង់ ធារ៉ា ប្រធានមន្ទីរអប់រំយុវជន និងកីឡា ខេត្តប៉ៃលិន បានឱ្យដឹងថា ខាងលោក នឹងធ្វើការសម្របសម្រួល ដោះស្រាយបញ្ហានេះ បន្ទាប់ពីទទួលបានព័ត៌មានខាងលើ៕ នីយ៉ា
ចែករំលែកព័តមាននេះ