ខេត្តប៉ៃលិន ៖ គេសង្កេតឃើញមានប្រជាពលរដ្ឋចំនួន៤នាក់ ដែលប្រកបមុខរបរជួសជុលកង្ហារ ឆ្នាំងបាយអគ្គិសនី និងចង្ក្រានហ្គាស បានធ្វើដំណើរឆ្លងដែនមកតាំងពីខេត្តសៀមរាប ចូលមកជួសជុលតាមភូមិនានាក្នុងខេត្តប៉ៃលិន ដើម្បីរកថវិកាសម្រាប់ផ្គត់ផ្គង់ជីវភាពប្រចាំថ្ងៃ លុះដល់ពេលយប់ ក៏នាំគ្នាឈប់សម្រាកនៅតាមវត្ត និងតាមទីធ្លាសាលាសង្កាត់ជាដើម។
ហេតុការណ៍ប្រទះឃើញប្រជាពលរដ្ឋប្រកបរបរបើកបរម៉ូតូរ៉ឺម៉ក ជួសជុលសម្ភារៈប្រើប្រាស់ផ្ទះបាយខាងលើនេះ បានកើតឡើងនៅវេលាម៉ោង៧និង៣០នាទីព្រឹក ថ្ងៃទី០៦ ខែមិថុនា ឆ្នាំ២០២២ នៅចំណុចបរិវេណវត្តពោធិ៍មារាម ស្ថិតក្នុងភូមិប៉ាហ៊ីត្បូង សង្កាត់ប៉ៃលិន ក្រុងប៉ៃលិន ខេត្តប៉ៃលិន។
បើតាមប្រភពព័ត៌មានពីបុរសម្នាក់មានឈ្មោះ ថៃ សឺង អាយុ៣៥ឆ្នាំ មានស្រុកកំណើតនៅខេត្ត សៀមរាប បានរៀបរាប់ឱ្យដឹងថា ៖ លោកហើយនឹងក្រុមអ្នកជួសជុលសម្ភារៈផ្ទះបាយចំនួន៣ម៉ូតូរ៉ឺម៉កផ្សេងទៀត បានបើកបរម៉ូតូរៀងៗខ្លួនចេញពីស្រុកកំណើតនៅខេត្តសៀមរាប ដើម្បីស្វែងរកជួសជុលកង្ហារ ចង្ក្រានហ្គាស និងសម្ភារៈផ្ទះបាយ ដែលប្រជាពលរដ្ឋប្រើខូច ទុកចោលឱ្យដំណើរការឡើងវិញ។
លោកបន្តទៀតថា ការជួសជុល គិតថ្លៃតាមការខូចខាតតិច ឬខ្លាំង ពោលគឺចាប់ពី៥០០០រៀលឡើងលើ ដោយលោកបានចេញមករកថវិកាក្នុងខេត្តប៉ៃលិន តាមរយៈជំនាញមួយនេះ អស់រយៈពេល៤ទៅ៥ថ្ងៃមកហើយ។ លុះពេលយប់ឡើង ខាងលោកតែងតែសុំព្រះសង្ឃស្នាក់នៅតាមវត្ត រហូតដល់ព្រឹក ទើបនាំគ្នាចេញដំណើរទៅតាមភូមិនានា លុះដល់ថ្ងៃត្រង់ទើបទិញបាយ និងម្ហូបអាហារយកទៅទទួលទានជួបជុំមិត្តភក្តិ រួចក៏នាំគ្នាបន្តបើកបរម៉ូតូជួសជុល រហូតដល់ល្ងាច ក៏ចូលទៅស្នាក់នៅតាមវត្ត ឬសាលាឃុំ ដោយមិនមានបញ្ហាអ្វីកើតឡើងនោះឡើយ។
លោកបញ្ជាក់ទៀតថា ក្នុង១ថ្ងៃៗ ម្នាក់ៗ អាចរកប្រាក់ចំណូលបានប្រហែលជា៥ម៉ឺន ទៅ១០ម៉ឺនរៀល លុះកាច់កងថ្លៃសាំង នៅសល់តិចតួចសម្រាប់ផ្ញើឱ្យប្រពន្ធកូននៅឯផ្ទះ ដើម្បីទិញម្ហូបអាហារសម្រាប់ផ្គត់ផ្គង់ជីវភាពប្រចាំថ្ងៃ។
លើសពីនេះ ការធ្វើដំណើរជួសជុលសម្ភារៈផ្ទះបាយនេះ គឺចេញទៅគ្រប់ទីកន្លែងតាមបណ្តាខេត្តនានា យប់កន្លែងណាសម្រាកនៅកន្លែងនោះ រហូតដល់រយៈពេល២ទៅ៣ខែ ទើបនាំគ្នាចូលផ្ទះម្តង។ ម្យ៉ាងវិញទៀត ខាងលោកក៏មានគ្រឿងបំលាស់គ្រប់ប្រភេទ ក្នុងការយកទៅជួសជុលសម្ភារៈប្រើប្រាស់ជូនប្រជាពលរដ្ឋផងដែរ៕
ចែករំលែកព័តមាននេះ