បុរស២នាក់បានរងរបួសធ្ងន់ ហើយត្រូវបានបញ្ជូនទៅសង្គ្រោះនៅគ្លីនិកឯកជនភ្លាមៗ បន្ទាប់ពីជិះម៉ូតូចេញពីទិញកាតទូរស័ព្ទវិញ ក៏ស្រាប់តែត្រូវ
រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា បុរស២នាក់បានរងរបួសធ្ងន់ ហើយត្រូវបានបញ្ជូនទៅសង្គ្រោះនៅគ្លីនិកឯកជនភ្លាមៗ បន្ទាប់ពីជិះម៉ូតូចេញពីទិញកាតទូរស័ព្ទវិញ ក៏ស្រាប់តែត្រូវជនសង្ស័យមួយក្រុមជិះម៉ូតូដេញតាមធាក់ បណ្តាលអោយជនរងគ្រោះដួលម៉ូតូអូសជាច្រើនម៉ែត្រ បង្កឱ្យមានការភ្ញាក់ផ្អើលកាលពីវេលាម៉ោង២រំលងអធ្រាត្រឈានចូលថ្ងៃទី៦ ខែមិថុនា ឆ្នាំ២០២២ នៅជិតវត្តកំសាន្ដ ផ្លូវ៣៦៩ ស្ថិតក្នុងភូមិព្រះពន្លា សង្កាត់ព្រែកប្រា ខណ្ឌច្បារអំពៅ ។
សេចក្តីរាយការណ៍បន្តថា ជនរងគ្រោះទាំង២នាក់ខាងលើ មិនបានអោយស្គាល់អត្តសញ្ញាណនោះទេ គ្រាន់តែដឹងថា ជិះម៉ូតូម៉ាកហុងដាឌ្រីម ពណ៌ខ្មៅ ពាក់ស្លាកលេខ ភ្នំពេញ 1X1404 ។
យោងតាមប្រភពព័ត៌មានពីកន្លែងកើតហេតុ បានអោយដឹងថា មុនពេលកើតហេតុ គេឃើញបុរសជាជនរងគ្រោះ២នាក់បានជិះម៉ូតូមួយគ្រឿងម៉ាកហុងដាឌ្រីម ពណ៌ខ្មៅ ធ្វើដំណើរតាមបណ្ដោយផ្លូវ៣៦៩ ក្នុងទិសដៅពីជើងទៅត្បូង គាប់ជួនពេលនោះ ដោយមិនដឹងថា តើមានរឿងអ្វីនោះទេ? ក៏ស្រាប់តែលេចមុខជនសង្ស័យមួយក្រុមទៀតបានជិះម៉ូតូម៉ាក winer x ពណ៌ក្រហម មិនចាំស្លាកលេខ បានដេញវា.យ និងធាក់ម៉ូតូជនរងគ្រោះ បណ្តាលឲ្យម៉ូតូទាំងពីរគ្រឿង (ទាំងម៉ូតូជនរងគ្រោះ និងម៉ូតូជនសង្ស័យ) ដួលអូសជាច្រើនម៉ែត្រ ដែលធ្វើអោយជនរងគ្រោះដែលជិះម៉ូតូម៉ាកហុងដាឌ្រីមនោះ ដួលរណូករណែល រងរបួសបែកមុខបែកមាត់ និងក្បាល ហើយត្រូវបានបញ្ជូនទៅសង្គ្រោះនៅគ្លីនិកឯកជនភ្លាមៗ ។
ប្រភពដដែលបន្តថា ចំណែកឯភាគីម្ខាងទៀតដែលជាជនបង្ក បាននាំគ្នាលើកម៉ូតូ រួចជិះរត់គេចខ្លួនបាត់ស្រមោល ដោយបានបន្សល់ទុកតែស្បែកជើងចំនួន៣គូនៅនឹងកន្លែងកើតហេតុតែប៉ុណ្ណោះ ។
ពាក់ព័ន្ធករណីខាងលើនេះដែរ លុះបន្តិចក្រោយមក គេឃើញមានមិត្តភ័ក្តិរបស់ជនរងគ្រោះទៅដល់កន្លែងកើតហេតុ ហើយក៏បាននិយាយថា ជនរងគ្រោះទាំង២នាក់បានជិះម៉ូតូថា មកទិញកាតទូរស័ព្ទមួយភ្លែត ក៏ស្រាប់តែជួបរឿងបែបនេះទៅ ។
ក្រោយពេលកើតហេតុ នៅសល់តែម៉ូតូហុងដាឌ្រីម ដែលជារបស់ជនរងគ្រោះ ហើយក៏ត្រូវបានបងប្អូនប្រជាពលរដ្ឋរាយការណ៍ជូនសមត្ថកិច្ចមូលដ្ឋាន អោយមកទទួលយកទៅរក្សាទុកនៅប៉ុស្តិ៍នគរបាលរដ្ឋបាលព្រែកប្រា ដើម្បីរង់ចាំប្រគល់អោយជនរងគ្រោះវិញ ៕
ចែករំលែកព័តមាននេះ