សំណុំរឿងស្នេហាលោក កឹម សុខា និងស្រីមុំ តុលាការបើកសវនាការវិនិច្ឆ័យអ្នកសូកប៉ាន់សាក្សី
រាជធានីភ្នំពេញ ៖ មន្ត្រីតុលាការកំពូលថ្លែងថា នៅព្រឹកថ្ងៃទី២៣ ខែវិច្ឆិកា ខាងមុខនេះ តុលាការកំពូលគ្រោងនឹងបើកសវនាការលើសំណុំរឿង
រាជធានីភ្នំពេញ ៖ មន្ត្រីតុលាការកំពូលថ្លែងថា នៅព្រឹកថ្ងៃទី២៣ ខែវិច្ឆិកា ខាងមុខនេះ តុលាការកំពូលគ្រោងនឹងបើកសវនាការលើសំណុំរឿងបណ្តឹងសាទុក្ខរបស់បុគ្គលិកសមាគមការពារសិទ្ធិមនុស្សអាដហុកចំនួន៣នាក់ ដែលបានប្តឹងសាទុក្ខប្រឆាំងនឹងការសម្រេចរបស់សាលាឧទ្ធរណ៍ ដែលបន្តឃុំខ្លួនពួកគាត់ក្នុងចំណោម៤នាក់ ។
សវនាការនេះ គ្រោងនឹងដឹកនាំដោយលោកស្រី គិម សត្ថាវី ជាប្រធានក្រុមប្រឹក្សាជំនុំជម្រះ និងលោក ឈួន ចាន់ថា ជាតំណាងមហាអយ្យការ ។ កម្មវត្ថុនៃសវនាការនេះ គឺបណ្តឹងសុំមោឃភាពនីតិវិធីរបស់សាលាដំបូងរាជធានីភ្នំពេញ ។
យោងតាមដីការបស់តុលាការកំពូល គឺបង្គាប់ឲ្យពន្ធនាគារនាំខ្លួនជនជាប់ចោទជាដើមបណ្តឹងសាទុក្ខចំនួន៣នាក់ គឺលោក ណៃ វ៉ង់ដា អាយុ៤២ឆ្នាំ លោក នី សុខា អាយុ៥១ឆ្នាំ និងលោក យី សុខសាន្ត អាយុ៥៣ឆ្នាំ ។ ជនជាប់ចោទទាំង៣នាក់ កំពុងជាប់ឃុំនៅពន្ធនាគារព្រៃស(ម១) ត្រូវនាំមកកាន់តុលាការកំពូលនៅថ្ងៃទី២៣ ខែវិច្ឆិកា ឆ្នាំ២០១៦ខាងមុខនេះ ដើម្បីចូលរួមសវនាការ ។
តុលាការបានចោទប្រកាន់ជនជាប់ចោទទាំង៣នាក់ក្នុងចំណោម៤នាក់ ពីបទសូកប៉ាន់សាក្សី និងបានសម្រេចដាក់ឲ្យស្ថិតនៅក្រោមការត្រួតពិនិត្យពីបទ«សូកប៉ាន់សាក្សី» ប្រព្រឹត្តនៅក្នុងរាជធានីភ្នំពេញ កំឡុងខែមីនា-មេសាឆ្នាំ២០១៦ និងផ្តន្ទាទោសតាមបញ្ញត្តិមាត្រា៥៤៨នៃក្រមព្រហ្មទណ្ខ ។
ជនជាប់ចោទ៤នាក់ជាបុគ្គលិកជាន់ខ្ពស់នៃសមាគមអាដហុក ត្រូវបានឃាត់ខ្លួនដោយអង្គភាពប្រឆាំងអំពើពុករលួយ ដែលបានបើកការស៊ើបអង្កេតមួយលើសំណុំរឿងខ្សែអាត់សំឡេងសាសងស្នេហារវាងនាង ខុម ចាន់តារាទី ហៅស្រីមុំអាយុ២៦ឆ្នាំ និងលោក កឹម សុខា អនុប្រធានគណបក្សសង្គ្រោះជាតិ ។
ក្នុងសំណុំរឿងនេះផងដែរ តុលាការក៏បានកោះហៅលោក ធន សារាយ ប្រធានសមាគមអាដហុកចូលបំភ្លឺក្នុងនាមជាសាក្សីពីបទសូកប៉ាន់សាក្សីនេះ តែលោកមិនទាន់បានចូលខ្លួនតាមដីកាកោះហៅរបស់សាលាដំបូងរាជធានីភ្នំពេញនៅឡើយទេ ដោយសារលោកកំពុងស្ថិតនៅក្រៅប្រទេស ។
ជនជាប់ចោទចំនួន៣នាក់ បានប្តឹងឧទ្ធរណ៍ប្រឆាំងនឹងនីតិវិធីឃុំខ្លួន ឬប្តឹងសុំមោឃភាពនីតិវិធី ក៏ប៉ុន្តែតុលាការថ្នាក់ក្រោមចំនួន២បានច្រានចោលការស្នើសុំនេះ ៕
ចែករំលែកព័តមាននេះ