បន្ទាយមានជ័យ៖ ប្រធានមន្ទីរកសិកម្ម រុក្ខាប្រមាញ់ និងនេសាទ ខេត្ត បានឱ្យដឹងថា នៅ​ស្រុកមង្គលបុរី មាន ៤ឃុំ ដែលមានស្រូវប្រមាណ ៤ពាន់ហិកតា បានរងផលប៉ះពាល់ ដោយគ្មានទឹក ព្រោះរាំងស្ងួត។ ក្នុងនោះ ងាប់ស្រូវខូចអស់ទាំងស្រុង ២ពាន់ហិកតាហើយ រហូតដល់ថ្ងៃទី២ ខែមិថុនា ឆ្នាំ២០២២។

លោក ប៉ាង វណ្ណាសេដ្ឋ ប្រធានមន្ទីរកសិកម្ម រុក្ខាប្រមាញ់ និងនេសាទ ខេត្តបន្ទាយមានជ័យ​បានប្រាប់ថា នៅខេត្តបន្ទាយមានជ័យ មានស្រុកមង្គលបូរី ដែលមាន ៤ឃុំ រងផលប៉ះពាល់​ដោយសារគ្រោះរាំងស្ងួត ធ្វើឱ្យ​ស្រូវប្រមាណ ៤ពាន់ហិកតា រងផលប៉ះពាល់ គ្មានទឹក។ ក្នុងនោះ ដីប្រេះបែកក្រហែង រាំងស្ងួត ក្រៀមស្វិតងាប់ស្រូវ ដែលទើបដុះ។ គ្រោះរាំងស្ងួត បណ្តាលឱ្យងាប់ស្រូវនោះ កើតឡើង នៅ​ឃុំសឿ ឃុំចំណោម ឃុំរហាត់ទឹក និង​ឃុំបត់ត្រង់។

ចំណែក​លោក ឡាយ សុធី អនុប្រធានមន្ទីរធនធានទឹក និងឧតុនិយម ខេត្តបន្ទាយមានជ័យ បានប្រាប់ថា ក្រោយសំណង់អូរសណ្តាន់ ក្នុង​ឃុំព្រៃខ្ពស់ ស្រុកបវិល ខេត្តបាត់ដំបង ដែលរងគ្រោះ ដោយទឹកជំនន់ បានខូច គឺត្រូវបានក្រសួងធនធានទឹក និងឧតុនិយម កសាងឡើងវិញ ហើយត្រូវបានបិទ​មុខទឹកមួយចំនួន មិនអោយហូរតាមប្រឡាយមេ បណ្តាលឱ្យប៉ះពាល់​ស្រូវប្រជាកសិករ គ្មានទឹក នៅឃុំមួយចំនួន ដែលកំពុង​បង្កបង្កើនផលស្រូវ នៅផ្នែកខាងលិច​ដងស្ទឹង ហើយ​ប្រឈមខ្វះទឹក ដាក់ស្រូវ ដែលប៉ះពាល់ ក្រៀមស្វិតចំនួន ១.៧០០ហិកតា មាន៤ភូមិ ក្នុងឃុំសឿ ក្នុង​ស្រុកមង្គលបូរី។

លោកបានបញ្ជាក់ថា​ ប៉ុន្តែ​ជាការណែនាំពីរដ្ឋមន្ត្រីក្រសួងធនធានទឹក និងឧតុនិយម ហើយក្រុមការងារមន្ទីរជំនាញ បានយកម៉ាស៊ីនបូមទឹក ចំនួន ៤គ្រឿង ខ្នាត ៦៥សេះ បានចុះជួយអន្តរាគមន៍ បូមទឹក ទម្លាក់ចូលតាមប្រឡាយមេ ដើម្បីឱ្យប្រជាកសិករ មានទឹកបូមបញ្ចូល​ស្រូវដែលកំពុងខ្វះទឹក ក្នុងឃុំទាំង ៤នោះហើយ​។

លោក ជា ទី មេឃុំសឿ ស្រុកមង្គលបូរី បានបញ្ជាក់ថា មូលហេតុដែលប្រជាកសិករ​ ​ខ្វះទឹកបូមបញ្ចូលស្រូវ ហើយមានកន្លែងខ្លះ ស្រូវ​ត្រូវបានស្វិតងាប់ នៅផ្នែកខាងលិចដងស្ទឹង អាចប្រឈមមានឃុំសឿ ឃុំចំណោម និងឃុំរហាត់ទឹក ក្នុងស្រុកមង្គលបូរី ដោយសារតែ​ក្រសួងធនធានទឹក និងឧតុនិយម បានកសាងសំណង់អូរសណ្តាន់ ហើយ​ត្រូវបានបិទ​មិនឱ្យទឹកធ្លាក់ ចូលតាមប្រឡាយមេ ផ្នែកខាងក្រោម ទើបបណ្តាលឱ្យ​គ្មានទឹកបញ្ចូលស្រែស្រូវ ហើយស្រូវត្រូវបានក្រៀមស្វិត និងងាប់ជាបណ្តើរៗហើយ។ ប៉ុន្តែពេលនេះ ក្រសួងធនធានទឹក និងឧតុនិយម បានអន្តរាគមន៍ ដោយបូមទម្លាក់ ចូលប្រឡាយមេ ទើបប្រជាកសិករយើង បានបូមបញ្ចូលស្រូវជាបណ្តើរៗ ហើយ​៕ ប៊ុន ធឿន