ប្រទេសជប៉ុន ៖ តម្លៃប្រាក់ដុល្លារបានកើនឡើងកាលពីថ្ងៃចន្ទ បន្ទាប់ពីមានព័ត៌មានថា លោកស្រី Hillary Clinton របស់គណបក្សប្រជាធិបតេយ្យ មិនត្រូវបានប្តឹងពាក់ព័ន្ធនឹងរឿងអាស្រូវអីុម៉ែលរបស់លោកស្រីឡើយ
ប្រទេសជប៉ុន ៖ តម្លៃប្រាក់ដុល្លារបានកើនឡើងកាលពីថ្ងៃចន្ទ បន្ទាប់ពីមានព័ត៌មានថា លោកស្រី Hillary Clinton របស់គណបក្សប្រជាធិបតេយ្យ មិនត្រូវបានប្តឹងពាក់ព័ន្ធនឹងរឿងអាស្រូវអីុម៉ែលរបស់លោកស្រីឡើយ ដោយព័ត៌មាននេះបានផ្តល់ឱកាស១១ម៉ោងសម្រាប់លោកស្រី មុនការបោះឆ្នោតនាថ្ងៃទី៨ វិច្ឆិកា ។
FBI បាននិយាយកាលពីយប់ថ្ងៃអាទិត្យថា ពួកគេនៅប្រកាន់តាមការសម្រេចចិត្តមុន គឺមិនមានពាក្យបណ្តឹងអ្វីទៅលើលោកស្រី Clinton ឡើយ ។
តម្លៃប្រាក់ដុល្លារបានកើនឡើង១,២%ឯណោះ ។ ប៉ុន្តែវាបានធ្លាក់ចុះកាលពីសប្តាហ៍មុន បន្ទាប់ពីការស្ទង់មតិបានបង្ហាញពីការខិតជិតនៃគម្លាតក្នុងការបោះឆ្នោត ។
Masafumi Yamamoto អ្នកជំនាញផ្នែកយុទ្ធសាស្ត្រ ក្នុង Mizuho Securities នៅទីក្រុងតូក្យូ ឲ្យដឹងថា ៖ « តម្លៃប្រាក់ដុល្លារបានកើនឡើងព្រោះតែមានការធ្លាក់ចុះនៃការព្យាករណ៍ថា លោក Trump នឹងឈ្នះ ។ ប៉ុន្តែមកដល់ពេលនេះ មិនទាន់មានការទិញច្រើននៅឡើយទេ ព្រោះលោកស្រី Clinton អាចនឹងបន្តគោលនយោបាយទប់ស្កាត់តម្លៃប្រាក់ដុល្លារមិនឲ្យឡើងខ្លាំង ប្រសិនបើលោកស្រីឈ្នះ ហើយការព្យាករសេដ្ឋកិច្ចនៅបន្តមិនទាន់ច្បាស់លាស់ឡើយ » ។
Kyosuke Suzuki ប្រធាន Forex ក្នុង Societe Generale នៅទីក្រុងតូក្យូ ក៏បាននិយាយដែរថា ៖ « តម្លៃប្រាក់ដុល្លារបានកើនឡើងដោយសារការសម្រេចចិត្តរបស់ FBI ជួយដល់លោកស្រី Clinton ។ ខ្ញុំមិនបានមើលឃើញតម្លៃប្រាក់ដុល្លារកើនឡើងប៉ុន្មានទេ ប៉ុន្តែការប្រុងប្រយ័ត្ននៅតែកើតមានឡើងក្នុងទីផ្សារនាពេលបោះឆ្នោតនេះ » ។
គួរបញ្ជាក់ថា ការស្ទង់មតិថ្មីបំផុតដែលបានចេញកាលពីថ្ងៃអាទិត្យកន្លងមកបង្ហាញថា លោកស្រី Clinton កំពុងនាំមុខលោក Trump ផងដែរ ៕
ចែករំលែកព័តមាននេះ