នៅទីបំផុត ភាគីថ្នាក់ដឹកនាំរបស់ ស៊ីធីអិន បានយល់ព្រមតាមសំណើររបស់តារាកំប្លែងនាយ ពាក់មី ហើយ បន្ទាប់ពីតារាកំប្លែងរូបនេះ និងតារាកំប្លែងមួយចំនួនទៀតបានព្រមានដើរចេញ
រាជធានីភ្នំពេញ ៖ នៅទីបំផុត ភាគីថ្នាក់ដឹកនាំរបស់ ស៊ីធីអិន បានយល់ព្រមតាមសំណើររបស់តារាកំប្លែងនាយ ពាក់មី ហើយ បន្ទាប់ពីតារាកំប្លែងរូបនេះ និងតារាកំប្លែងមួយចំនួនទៀតបានព្រមានដើរចេញ។
នាយ ពាក់មី រួមនឹងតារាកំប្លែងប្រមាណ៣នាក់ទៀត បានព្រមានដើរចេញពីស៊ីធីអិន ប្រសិនបើអ្នកគ្រប់គ្រងដឹកនាំថ្មីនៅបន្តការរឹតត្បិតខ្លាំងពេក។ យ៉ាងណា ក្រោយពីបង្ហោះសារទម្លាយមូលហេតុខាងលើនេះ នៅប៉ុន្មានម៉ោង បន្ទាប់តារាកំប្លែងរូបនេះបានសម្រេចលុបសារដែលខ្លួនបានបង្ហោះនោះចោលវិញ បន្ទាប់ពីមានការដោះស្រាយសមស្របពីថ្នាក់ដឹកនាំរបស់ស្ថានីយស៊ីធីអ៊ីន។
នាយ ពាក់មី បានបញ្ចេញសារថ្មីបញ្ជាក់ថា «ជូនដំណឹងបងប្អូនទាំងអស់គ្នា CTN បានដោះស្រាយសម្រួលដល់ខ្ញុំ ព្រមទាំងបុគ្គលិក នឹងក្រុមការងារហើយ អរគុណបងប្អូនទាំងអស់គ្នា»។ ក្នុងនោះដែរ នាយ ពាក់មី ក៏បានបញ្ជាក់ដែរថា «ក្រុមហ៊ុនបានស្មើអោយខ្ញុំលប់ផុសវិញ អរគុណក្រុមហ៊ុនសម្រាប់ដំណោះស្រាយសម្រាប់បុគ្គលិក»។
ជាការកត់សម្គាល់តារាកំប្លែងនាយ ពាក់មី បានធ្វើការព្រមានដើរចេញពីស្ថានីយទូរទស្សន៍ស៊ីធីអិន ទីដែលលោកបានជ្រកកោនអស់រយៈពេលជាច្រើនឆ្នាំមកនេះ។ មូលហេតុដែលលោកអាចសម្រេចចិត្តចាកចេញពីស៊ីធីអិននាពេលនេះ ត្រូវបានលោក ពាក់មី បញ្ជាក់ថា ដោយសារលោកហាក់មិនពេញចិត្តការដឹកនាំរបស់អ្នកគ្រប់គ្រងថ្មី ដោយសារមានភាពរឹតត្បិតខ្លាំងពេក។
តាមរយៈការបង្ហោះសារតាមហ្វេសប៊ុកតារាកំប្លែងរូបនេះ បានលើកឡើងថា «ខ្ញុំប្រហែលជាត្រូវឈប់ពីស៊ីធីអិនហើយបងប្អូន បើមិនក្រុមហ៊ុនដកចេញ ក៏ឈប់ខ្លួនឯងដែរ ដោយសារខ្ញុំមិនពេញចិត្តការដឹកនាំរបស់អ្នកគ្រប់គ្រងថ្មី»។
លោកបញ្ជាក់ថា «ខ្ញុំមិនចង់ចាកចេញពីស៊ីធីអិនដែលជាផ្ទះ ជាកន្លែងផ្តល់កំណើតសិល្បៈអោយខ្ញុំទេ តែខ្ញុំសុខចិត្តចេញមុខតវ៉ាខ្លះ នៅរឿងដែលរឹតត្បិតតឹងតែងពេក ធ្វើអោយបុគ្គលិកមានសម្ពាធ សង្ឃឹមថាកាឈប់របស់ខ្ញុំ នឹងអ្នកកំប្លែងផ្សេងទៀត អាចធ្វើអោយអ្នកគ្រប់គ្រងថ្មីគាត់មានកាបន្ធូរបន្ថយ នៅច្បាប់ថ្មីដែលតឹងតែងរបស់គាត់ខ្លះ ដើម្បីបុគ្គលិកដែលនៅគាត់បានសុខសប្បាយមិនសូវមានសម្ពាធ សូមអរគុណ» ។
គួររំលឹកថា ៖ ភ្ញាក់ផ្អើល! តារាកំប្លែងនាយ ពាក់មី ព្រមានដើរចេញពីស៊ីធីអិន ព្រោះតែមិនអាចទ្រាំបាន ៕
ចែករំលែកព័តមាននេះ