តារាកំប្លែងនាយ ពាក់ មី បានធ្វើការព្រមានដើរចេញពីស្ថានីយទូរទស្សន៍ស៊ីធីអិន ទីដែលលោកបានជ្រកកោនអស់រយៈពេលជាច្រើនឆ្នាំមកនេះ។ មូលហេតុដែលលោកអាចសម្រេចចិត្តចាកចេញពីស៊ីធីអិននាពេលនេះ ត្រូវបានលោក ពាក់ មី បញ្ជាក់ថា
រាជធានីភ្នំពេញ ៖ តារាកំប្លែងនាយ ពាក់ មី បានធ្វើការព្រមានដើរចេញពីស្ថានីយទូរទស្សន៍ស៊ីធីអិន ទីដែលលោកបានជ្រកកោនអស់រយៈពេលជាច្រើនឆ្នាំមកនេះ។ មូលហេតុដែលលោកអាចសម្រេចចិត្តចាកចេញពីស៊ីធីអិននាពេលនេះ ត្រូវបានលោក ពាក់ មី បញ្ជាក់ថា ដោយសារលោកហាក់មិនពេញចិត្តការដឹកនាំរបស់អ្នកគ្រប់គ្រងថ្មី ដោយសារមានភាពរឹតត្បិតខ្លាំងពេក។
តាមរយៈការបង្ហោះសារតាមហ្វេសប៊ុក តារាកំប្លែងរូបនេះបានលើកឡើងថា «ខ្ញុំប្រហែលជាត្រូវឈប់ពីស៊ីធីអិនហើយបងប្អូន បើមិនក្រុមហ៊ុនដកចេញ ក៏ឈប់ខ្លួនឯងដែរ ដោយសារខ្ញុំមិនពេញចិត្តការដឹកនាំរបស់អ្នកគ្រប់គ្រងថ្មី»។
លោកបញ្ជាក់ថា «ខ្ញុំមិនចង់ចាកចេញពីស៊ីធីអិនដែលជាផ្ទះ ជាកន្លែងផ្តល់កំណើតសិល្បៈអោយខ្ញុំទេ តែខ្ញុំសុខចិត្តចេញមុខតវ៉ាខ្លះ នៅរឿងដែលរឹតត្បិតតឹងតែងពេកធ្វើអោយបុគ្គលិកមានសម្ពាធ សង្ឃឹមថាការឈប់របស់ខ្ញុំ នឹងអ្នកកំប្លែងផ្សេងទៀត អាចធ្វើអោយអ្នកគ្រប់គ្រងថ្មីគាត់មានការបន្ធូរបន្ថយ នៅច្បាប់ថ្មីដែលតឹងតែងរបស់គាត់ខ្លះ ដើម្បីបុគ្គលិកដែលនៅគាត់បានសុខសប្បាយមិនសូវមានសម្ពាធ សូមអរគុណ» ។
ជុំវិញបញ្ហាខាងលើនេះ លោក សុវណ្ណ រឹទ្ធី ហៅតា វ៉ិច ទ័រ ដែលជាអ្នកដឹកនាំកម្មវិធីកំសាន្តនៅស្ថានីយទូរទស្សន៍ CTN បានអះអាងប្រាប់កោះសន្តិភាពតាមសារអេឡិចត្រូនិចថា «អ្វីដែលលោក ពាក់ មី បានសរសេរបង្ហោះនេះ គឺជាការពិត ដោយសារអ្នកគ្រប់គ្រងថ្មីមានការរឹតត្បិតបុគ្គលិកខ្លាំងពេក»។
យ៉ាងណា ការប្រកាសរបស់នាយ ពាក់ មី ខាងលើនេះ បានធ្វើអោយមហាជនសម្តែងការភ្ញាក់ផ្អើលយ៉ាងខ្លាំង ក្នុងពេលដែលសុខៗលោកបែរជាព្រមានពីការដើរចេញពីស៊ីធីអិន ដែលជាទីលោកបានចាប់ភាពល្បីល្បាញក្នុងសិល្បៈអស់ជាច្រើនឆ្នាំមកនេះ៕
ចែករំលែកព័តមាននេះ