រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា បុរស២នាក់ រួមជាមួយនឹងនារីម្នាក់ទៀត ទើបនឹងចេញពីក្លិបកម្សាន្ត រួចបើករថយន្តលឿនដូចហោះ ក៏រ៉េចង្កូតទៅបុកផ្ទប់របាំងថ្មពុះចែកទ្រូងផ្លូវ ហើយក៏ខ្ទាតរថយន្តទៅបុកផ្ទប់ជាមួយនឹងបង្គោលភ្លើងបន្ថែមទៀត បណ្តាលឲ្យអ្នកនៅក្នុងរថយន្តខ្ទាតចេញមកក្រៅរងរបួសធ្ងន់និងស្រាលសន្លប់ស្តូកស្តឹងពេញផ្លូវ បង្កឱ្យមានការភ្ញាក់ផ្អើលកាលពីវេលាម៉ោង៣ទៀបភ្លឺ ថ្ងៃទី៣១ ខែឧសភា ឆ្នាំ២០២២ នៅតាមបណ្តោយផ្លូវជាតិលេខ៥ ខាងជើងស្ពានជ្រោយចង្វា ទល់មុខការ៉ាសស៊ាំងតេលា ស្ថិតក្នុងសង្កាត់ស្រះចក ខណ្ឌដូនពេញ ។
ប្រភពព័ត៌មានពីប្រជាពលរដ្ឋដែលដឹងហេតុការណ៍ច្បាស់ បានប្រាប់ឱ្យដឹងថា មុនពេលកើតហេតុ ពួកគាត់ឃើញរថយន្តបង្កម៉ាក Starex ពណ៌ស ពាក់ស្លាក ភ្នំពេញ 2BA-379 ទើបនឹងចេញពីក្លិបកម្សាន្តមួយកន្លែង នៅឆ្ងាយពីកន្លែងកើតហេតុប្រមាណ១គីឡូម៉ែត្រ ធ្វើដំណើរតាមបណ្ដោយផ្លូវជាតិលេខ៥ ទិសដៅពីជើងទៅត្បូង ក្នុងល្បឿនលឿនដូចហោះ ខណៈពេលធ្វើដំណើរមកដល់ចំណុចកើតហេតុ ស្រាប់តែរថយន្តរ៉េចង្កូតទៅបុកផ្ទប់នឹងបង្កោលភ្លើងថ្មមួយដើម បណ្តាលបាក់ជាពីរកំណាត់ រួចដួលរលំប៉ះត្រូវផ្ទះរបស់ប្រជាពលរដ្ឋរងការខូចខាត ។
ប្រភពដដែលបន្តថា ចំណែករថយន្តវិញក៏បន្តខ្ទាតទៅបុកផ្ទប់ជាមួយនឹងដើមក្ងោកមួយដើមទៀតពេញទំហឹង បណ្តាលឲ្យរថយន្តវិលមួយជុំ រហូតខ្ទាតមនុស្សនៅក្នុងរថយន្តចេញមកក្រៅ រងរបួសធ្ងន់បុរស២នាក់ ចំណែកនារីម្នាក់ទៀតរបួសស្រាល។
ប្រភពដដែលបន្តទៀតថា នៅក្នុងហេតុការណ៍ខាងលើនោះ បណ្តាលឲ្យអ្នកបើករថយន្តខ្ទាតចេញពីរថយន្ដធ្លាក់បោ.កផ្ទប់នៅមុខផ្ទះពលរដ្ឋក្បែរដើមក្ងោក ធ្វើឱ្យរងរបួសធ្ងន់សន្លប់ដេកលៀនអណ្ដាតចេញក្រៅ ចំណែកឯបុរសជាអ្នករួមដំណើរក្បែរតៃកុងវិញក៏ខ្ទាតទៅឆ្ងាយជាងគេ រងរបួសបែកក្បាលសន្លប់ស្តូកស្តឹងផងដែរ និងនារីម្នាក់ទៀត ក៏ខ្ទាតទៅប៉ះផ្ទះប្រជាពលរដ្ឋរងរបួសស្រាល រីឯរថយន្តបង្កវិញរងការខូចខាតស្ទើរតែទាំងស្រុងតែម្តង។
ក្រោយពេលកើតហេតុ រថយន្តបង្កត្រូវបានសមត្ថកិច្ចធ្វើការវាស់វែងយកទៅរក្សាទុកបណ្តោះអាសន្ននៅការិយាល័យនគរបាលចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ បណ្តោះអាសន្ន ចំណែកជនរងគ្រោះវិញត្រូវបានរថយន្តសង្គ្រោះគ្លីនិកសម្ភពពន្លឺ ដឹកទៅព្យាបាលរបួស និងកំពុងសង្គ្រោះបន្ទាន់នៅគ្លីនិកផងដែរ ៕
ចែករំលែកព័តមាននេះ