រាជធានីភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីកម្ពុជាបានប្រកាសថា រាជរដ្ឋាភិបាលប្រឆាំងដាច់ខាតចំពោះអ្នកមានអំណាច និងមានលុយ ទៅជ្រកក្រោមរូបភាពពលរដ្ឋកាប់ទន្ទ្រានដីហាមឃាត់នៅបឹងទន្លេសាប ។ ទន្ទឹមនឹងនោះ សម្តេចបានចេញបញ្ជាទៅឧបនាយករដ្ឋមន្ត្រី ជា សុផារា និងក្រសួងធនធានទឹកពិនិត្យមើលថា តើកន្លែងណាគោករាក់ ហើយត្រូវបូមស្តាឡើងវិញ ។
នេះបើយោងតាមសម្តេចតេជោ បានថ្លែងសារពិសេសជូនបងប្អូនជនរួមជាតិស្តីអំពីបញ្ហាបឹងទន្លេសាប នាព្រឹកថ្ងៃទី២៧ ខែឧសភាឆ្នាំ២០២២។
សម្តេចតេជោ បានបញ្ជាក់ថា ភូមិឋាន និងតាំងទីលំនៅរបស់ប្រជាពលរដ្ឋ ដែលមានតាំងពីយូរលង់ណាស់មកហើយនោះ មិនអាចរុះរើចេញបាននោះឡើយ ដូច្នេះឯកឧត្តមឧបនាយករដ្ឋមន្ត្រី ជា សុផារ៉ា ក្រសួងធនធានទឹក ក្រសួងកសិកម្ម និងអាជ្ញាធរខេត្ត ត្រូវធ្វើការពិនិត្យមើលថា តើកន្លែងណាគោករាក់ ហើយត្រូវបូមស្តាឡើងវិញ ។
ជាមួយគ្នានេះដែរ សម្តេចតេជោ សូមអំពាវនាវប្រជាពលរដ្ឋទាំងអស់ដែលបានទទួលដីធ្លីនៅកន្លែងបង្កបង្កើនផលហើយ សូមមេត្តាកុំកាប់រានដីដែលនៅជិតខាងនេះបន្តទៅទៀត ដើម្បីពង្រីកដីរបស់យើងឲ្យកាន់តែធំ ហើយកុំឲ្យអ្នកពីក្រៅតំបន់នេះ ជាឈ្មួញ ឬជាអ្នមានអំណាចទៅឃុបឃឹតជាមួយប្រជាពលរដ្ឋនៅតំបន់នោះ ហើយកាប់រានយកផ្ទៃដីរាប់រយ រាប់ពាន់ហិកតា ហើយជួលឲ្យប្រជាពលរដ្ឋដូចរយៈពេលកន្លងទៅ តែយើងចាំបាច់ត្រូវតែធ្វើសកម្មភាពលើបញ្ហានេះ ។
សម្តេចបានបន្ថែមថា យើងប្រឆាំងដាច់ខាតជាមួយនឹងការប្រើសិទ្ធអំណាច របស់អ្នកមានអំណាច និងប្រើប្រាស់ទឹកលុយរបស់អ្នកមានប្រាក់ ដើម្បីទៅជ្រកក្រោមស្លាករូបភាពប្រជាពលរដ្ឋ ហើយដណ្តើមកាន់កាប់ទន្ទ្រានយកដីទៅធ្វើជាផលប្រយោជន៍របស់ខ្លួន ប៉ុន្តែយើងគាំទ្រលើកទឹកចិត្ត និងការគាំពារចំពោះប្រជាពលរដ្ឋ ដែលរកស៊ីសុចរិត ហើយដែលបានបង្កបង្កើនផលលើផ្ទៃដីនេះ រយៈពេលយូរមកហើយ អ៊ីចឹងជម្រើសមានតែកែលិខិតបទដ្ឋាន ដូរនិយាមការរួចហើយ បោះបង្គោលសារជាថ្មី ផ្ទៃដីនៅតំបន់នេះដែលគាត់បានបង្កបង្កើនផល យូរមកហើយនោះ ឲ្យគាត់បង្កបង្កើនផល ។
សម្ដេចតេជោ ហ៊ុន សែន សង្ឃឹមថា អាជ្ញាធរពាក់ព័ន្ធ និងប្រជាពលរដ្ឋ នឹងចូលរួមអនុវត្តនូវកិច្ចការងារនេះប្រកបដោយលទ្ធផលល្អ និងមានប្រសិទ្ធភាព ដើម្បីផលប្រយោជន៍ប្រជាជន ៕
ចែករំលែកព័តមាននេះ