រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា បុរសម្នាក់ត្រូវសមត្ថកិច្ចប៉ុស្តិ៍នរគបាលរដ្ឋបាលបឹងសាឡាង នាំខ្លួនយកទៅធ្វើការសាកសួរ បន្ទាប់ពីធ្វើសកម្មភាពយកកាមេរ៉ាទូរស័ព្ទដៃលួចថតប្រពន្ធគេកំពុងតែងូតទឹកក្នុងបន្ទប់ទឹក ហេតុការណ៍នេះបង្កឱ្យមានការភ្ញាក់ផ្អើលកាលពីវេលាម៉ោង៨និង៣០នាទីយប់ ថ្ងៃទី២៦ ខែឧសភា ឆ្នាំ២០២២ នៅត្រង់ចំណុចបន្ទប់ជួលក្បែរប៉ុស្តិ៍នរគបាលរដ្ឋបាលបឹងសាឡាង តាមបណ្ដោយផ្លូវលំ ស្ថិតក្នុងសង្កាត់បឹងសាឡាង ខណ្ឌទួលគោក។
បើតាមសម្តីពីស្ត្រីរងគ្រោះបានឲ្យដឹងថា គាត់និងប្តីបានមកស្នាក់នៅបន្ទប់ជួលកើតហេតុនេះជាច្រើនខែមកហើយ ។ ចំណែកឯជនសង្ស័យវិញមិនបានស្គាល់ឈ្មោះទេ គឺជាអ្នកដែលស្នាក់នៅបន្ទប់ជួលជាប់គ្នាជាមួយនឹងបន្ទប់របស់គាត់ដែរ ។ ហើយនៅមុនពេលកើតហេតុ ប្តីរបស់គាត់បានចេញទៅទិញម្ហូបនៅខាងក្រៅ ចំណែករូបគាត់វិញ (ស្ត្រីរងគ្រោះ) នៅក្នុងបន្ទប់ចាំប្តីតែម្នាក់ឯង។
ស្ត្រីរងគ្រោះបន្តថា បន្ទាប់មក ដោយសារតែប្តីរបស់គាត់មិនទាន់ត្រឡប់មកវិញ គាត់ក៏បានដោះសម្លៀកបំពាក់ចូលទៅងូតទឹកនៅក្នុងបន្ទប់ទឹក តែដោយសារអំពូលភ្លើងក្នុងបន្ទប់ទឹកនោះវាបានដាច់ ទើបគាត់ងូតទឹកដោយចំហទ្វារបន្ទប់ទឹក ដើម្បីឲ្យមានពន្លឺជះចូលមិនសូវងងឹត ។
ស្ត្រីរងគ្រោះបន្តទៀតថា ក្រោយពីងូតទឹករួច គាត់ (ស្ត្រីរងគ្រោះ) ក៏បានដើរចេញមកយកកន្សែងពោះគោដែលនៅជិតទ្វារបន្ទប់ទឹក ខណៈពេលនោះគាត់ក៏បានក្រឡេកមើលទៅប្រឡោះមួយនៅលើជញ្ជាំងដែលនៅទល់មុខបន្ទប់ទឹក ក្នុងបន្ទប់ជួលរបស់គាត់ ឃើញមានស្នាមប្រឡោះមួយ ដែលពីមុនមកម្ចាស់ផ្ទះបានដាក់ទុយោបង្ហូរទឹក តែក្រោយមកក៏បានដោះទុយោនោះចេញវិញ ទើបបន្សល់ទុកប្រឡោះរហូតមក។ ប៉ុន្តែនៅពេលដែលគាត់ក្រឡេកមើលទៅប្រឡោះនោះ គាត់បានគិតថា ដូចជាមានអ្វីប្លែកខុសពីធម្មតា រួចគាត់ក៏បានព្យាយាមមើលបួនទៅប្រាំដង ទើបដឹងថា នោះជាកាមេរ៉ាទូរស័ព្ទដៃ។ បន្ទាប់មក គាត់ក៏ប្រញាប់ប្រញាល់ទូរស័ព្ទហៅប្តីរបស់គាត់ និងប្រាប់ទៅកាន់ម្ចាស់ផ្ទះភ្លាមៗតែម្តង។
ក្រោយមកម្ចាស់ផ្ទះក៏បានមកដល់ និងបានហៅបុរសជាជនសង្ស័យនោះចេញមកនិយាយគ្នា តែពេលដែលសួរនាំបុរសដែលជាជនសង្ស័យរូបនោះបានប្រកែកដោះសារថា «មិនដឹងរឿងអ្វីនោះទេ»។ ខណៈពេលនោះ ប្តីរបស់នារីរងគ្រោះក៏បានសុំទូរស័ព្ទដៃពីរបុរសដែលសង្ស័យថាជាជនសង្ស័យនោះ យកមកឆែកមើល ដើម្បីឲ្យបានដឹងច្បាស់ទាំងអស់គ្នា តែបុរសជាជនសង្ស័យមិនព្រមអោយនោះទេ។
មួយសន្ទុះក្រោយមក ទើបបុរសជាជនសង្ស័យព្រមប្រគល់ទូរស័ព្ទដៃរបស់ខ្លួនឲ្យទៅប្តីរបស់នារីរងគ្រោះ ដើម្បីឆែកមើល។ បន្ទាប់ពីឆែកមើល ក៏ស្រាប់តែបានឃើញវីដេអូនារីរងគ្រោះកំពុងតែងូតទឹកនៅក្នុងទូរស័ព្ទដៃរបស់ជនសង្ស័យពិតប្រាកដមែន ដោយជនសង្ស័យបានព្យាយាមលុបចេញពីទូរស័ព្ទ តែលុបមិនទាន់អស់។ បន្ទាប់មកម្ចាស់ផ្ទះក៏បានរាយការណ៍ជូនសមត្ថកិច្ចមូលដ្ឋាន ឲ្យចុះទៅធ្វើការអន្តរាគមន៍ភ្លាមៗតែម្ដង។
ក្រោយពេលកើតហេតុ ជនសង្ស័យ រួមទាំងវត្ថុតាំង ត្រូវបានសមត្ថកិច្ចនាំយកទៅធ្វើការសាកសួរនៅប៉ុស្តិ៍នគរបាលរដ្ឋបាលបឹងសាឡាង ដើម្បីកសាងសំណុំរឿងរង់ចាំចាត់ការទៅតាមនីតិវិធីជាបន្តទៀត ៕
ចែករំលែកព័តមាននេះ