ខេត្តកណ្តាល ៖ គិតមកដល់ថ្ងៃទី២៧ ខែឧសភា ឆ្នាំ២០២២នេះ គឺដល់ថ្ងៃបុណ្យគម្រប់ ៧ថ្ងៃ របស់ស.ពវេជ្ជបណ្ឌិតវ័យក្មេងម្នាក់ ដែលធ្លាប់តែព្យាបាលជំងឺដល់ក្មេងៗ និងទារកជាច្រើននាក់…
ខេត្តកណ្តាល ៖ គិតមកដល់ថ្ងៃទី២៧ ខែឧសភា ឆ្នាំ២០២២នេះ គឺដល់ថ្ងៃបុណ្យគម្រប់ ៧ថ្ងៃ របស់ស.ពវេជ្ជបណ្ឌិតវ័យក្មេងម្នាក់ ដែលធ្លាប់តែព្យាបាលជំងឺដល់ក្មេងៗ និងទារកជាច្រើននាក់ អោយរស់រានមានជីវិត ប៉ុន្តែបែរជាត្រូវលាចាកលោកទាំងវ័យក្មេង ដោយសារតែជំងឺគាំងបេះដូង ។
លោកវេជ្ជបណ្ឌិត ធី សាមឺឌី ជាវេជ្ជបណ្ឌិតឯកទេសទារក និងកុមារប្រចាំនៅមន្ទីរពេទ្យព្រះអង្គឌួង បានទទួលមរណភាពកាលពីវេលាទាបភ្លឺ នៅថ្ងៃទី២២ ខែឧសភា ឆ្នាំ២០២២ ដោយជំងឺគាំងបេះដូង ចោលភរិយា និងកូន ២នាក់ ជាទីស្រលាញ់ ។
ស.ពវេជ្ជបណ្ឌិត ធី សាមឺឌី ដង្ហែរទៅបញ្ចុះនៅស្រុកកំណើត វេលាម៉ោង ៧និង៣០នាទីព្រឹកថ្ងៃចន្ទ ទី២៣ ខែឧសភា ឆ្នាំ២០២២ ក្នុងភូមិស៊ីធរកើត ឃុំស៊ីធរ ស្រុកខ្សាច់កណ្តាល ខេត្តកណ្តាល ។
ជាវេជ្ជបណ្ឌិតមួយរូបលោក ធី សាមឺឌី បានព្យាបាលជំងឺដល់ក្មេងៗ និងទារកដែលចូលមកសម្រាក និងព្យាបាលនៅមន្ទីរពេទ្យព្រះអង្គឌួង បានជាសះស្បើយពីជំងឺជាច្រើននាក់ ដោយលោកវេជ្ជបណ្ឌិតព្យាបាលយ៉ាងម៉ឺងម៉ាត់ ហ្មត់ចត់ និងយកចិត្តទុកដាក់ខ្ពស់បំផុត ក្នុងការព្យាបាលក្មេងៗ និងទារកទាំងអស់នោះ ។
លោកវេជ្ជបណ្ឌិត្យ គឺជាមិត្តភក្កិដ៏ល្អ ប្ដីដ៏ល្អ និងដ៏ស្លូតបូតម្នាក់ ដែលដឹកនាំក្រុមគ្រួសារប្រកបដោយសុភមង្គល និងស្នាមញញឹម ។ ការចាកចេញរបស់លោកវេជ្ជបណ្ឌិត គឺជាការបាត់បង់ធនធានមនុស្សមួយរូបដ៏សំខាន់ សម្រាប់ប្រទេសកម្ពុជា ក៏ដូចជាវិស័យសុខាភិបាល ។
ការបាត់បង់លោកវេជ្ជបណ្ឌិត ពិតជាគួរអោយសោកស្តាយ បន្ថែមលើនេះកាន់តែក្តុកក្តួលក្នុងចិត្តថែមទៀតនោះ នៅពេលឃើញសាររបស់ភរិយានៅអាឡោះអាល័យស្វាមីជាទីស្រលាញ់ពេញបេះដូង ដោយរូបនាងរៀបរាប់នៅលើហ្វេសប៊ុកដូច្នេះថា ៖ «ប្ដីល្អរបស់អូនអើយ បងអើយបង ហេតុអីបងអាយុខ្លីបែបនេះ បងសន្យាថា មើលថែរអូន និងកូនអោយរស់ដោយស្នាមញញឹម ហេតុអីថ្ងៃនេះ បងអោយទឹកភ្នែកមកអូន បងទៅចោលអូនមិនលាមួយម៉ាត់ ប្ដីអើយប្ដី បងជាគ្រូពេទ្យល្អ ស្លូតបូតណាស់ ហេតុអីក៏ព្រហ្មលិខិតពង្រាត់យើងទៅវិញបង ទ្រូងអូនស្ទើរប្រេះស្លាប់ហើយបង» ។
ភរិយារបស់ស.ពលោកវេជ្ជបណ្ឌិត រៀបរាប់បន្តថា «បងថាស្រលាញ់អូន បងតែងនិយាយប្រាប់កូនរាល់យប់ បងតែងអោយកូនយើងបង្រៀន យើងធ្វើសិស្ស អានតាមកូន រាល់មុនពេលគេង កូនយើងច្រៀង បងជាអ្នករាំ អោយអូនមើររាល់យប់ អូនឈឺជើង បងតែងយកអីមកអោយលាប បារម្ភប្រពន្ធគ្រប់ដង្ហើមចេញចូល បងថា យើងនឹងប្រឹងទៅមុខ អោយដល់គោលដៅ ប្ដីអើយ ០៣យប់ហើយ អូនគេងម្នាក់អែង គ្មានបង កូនយើងសួរថា ពេលណាបងមកវិញ ? កូនថា មានអ្នកណាឌុបកូនដើរលេងទៀត ? ហេតុអីលេងសើចជីវិតខ្ញុំម្ល៉េះ ប្ដីអើយ.. អោយអូនធ្វើអ្វីបន្តទៀត អូនគ្មានកម្លាំងទេបង ឈឺចាប់ណាស់បងអើយ! សុំទោស អូនជួយបងមិនបាន បងជាគ្រូពេទ្យចិត្តធម៌ ចិត្តធ្ងន់ ស្លូតបូត គ្រប់គ្នាច្រណែនអូនណាស់ ដែលមានបងជាប្ដី បងដឹងទេ អូនស្រលាញ់បងធំជាងជីវិតអូនទៀត បើដូរបាន អូនសូមអោយអូនស្លាប់ ជំនួសបង បងត្រូវជួយក្មេងៗច្រើនទៀតបង កូនយើង ត្រូវការបងមើលថែ ថ្ងៃទី២៥ ឧសភានេះ កូនយើងត្រូវចាក់វ៉ាក់សាំងហើយ បងបានអ្នកណាចាក់អោយកូនយើងទៅ គ្រូពេទ្យប្រចាំជីវិតអូនអើយ តើមានអ្នកមើលអូនទៀត ? អូនលេបថ្នាំងុយគេង តែគេងមិនលក់ ឃើញតែមុខបងរហូត ហេតុអីប្ដីអូន អាយុខ្លីយ៉ាងនេះ បងខំរៀនណាស់ ដើម្បីបានដូចបំណង តែឥឡូវបងទៅបាត់ មិនលាអូនមួយម៉ាត់ បងធ្វើបុណ្យណាស់ សូមបងទៅអោយបានសុខណា កុំបារម្ភអូននិងកូនអី អូននឹងរឹងមាំ ក្រោកឈរ ចិញ្ចឹមកូនយើងទាំង២ អោយល្អតាមដែលបងចង់បាន សូមជាតិក្រោយ អោយប្ដីអូន អាយុវែង និងជាដុកទ័រ ចិត្តល្អដូចជាតិនេះទៀត ហើយសូមអោយអូនបានជួប នឹងជាប្រពន្ធបងគ្រប់គ្រប់ជាតិ លាហើយប្ដីសំលាញ់» ។
ស្ត្រីជាភរិយា ដែលប្រើប្រាស់គណនីហ្វេសប៊ុកឈ្មោះ (ម៉ាក់ នីសា) បានរៀបរាប់ទៀតថា «រូបនេះ គឺអូនថតអោយបងចុងក្រោយ ប្ដីអូនល្អលើសហើយដឹងទេ ៦ឆ្នាំ៣ខែហើយ ដែលយើងរៀបការ បងមិនដែលទៅណា ចោលអូនបាត់មួយយប់ទេ ទោះត្រូវថ្ងៃបងយាមពេទ្យ ក៏រត់មកផ្ទះជួយបិទទ្វារអោយប្រពន្ធ ហើយទៅយាមវិញ ប្រពន្ធឈរលក់យូរ មិនបានរត់ទៅជួយជំនួស អោយអូនអង្គុយ មិនអោយឈរយូរទេ ខ្លាចឈឺជើង ៦ឆ្នាំ អូនមិនដែលហត់ចិត្តសោះ បងថ្នមផ្លូវចិត្ត និងកាយប្រពន្ធណាស់ មកពីធ្វើការហត់ យ៉ាងណា ក៏រត់ថើបកូនសិនដែរ ជីវិតបងហត់នឿយណាស់ យើងតស៊ូជាមួយគ្នា តាំងពីញាំមីមួយកញ្ចប់២នាក់ យើងអត់ណាស់ កាល២០១៧ អូនយំ បងជូតទឹកភ្នែកអូនហើយ សុំទោសអូនថា នាំអូនមកពិបាកជាមួយ តែអូនពេញចិត្ត អូនសុខចិត្តគ្រប់យ៉ាងអោយតែបានក្បែរបង បងចាំទេ ? កាលយើងមានកូនទីមួយ បងសប្បាយចិត្ត នឹងកូនមុខដូចបង១០០% បងប្រាប់អូនថា បងនឹងធ្វើអោយអូនមានក្ដីសុខ ទោះបងគ្មានសម្ភារនិយមក៏ដោយ បងដឹងទេ ប្រពន្ធបងពេលនេះ មានអារម្មណ៏យ៉ាងណា ពេលបងទៅមិនលា មិនបំពេញសន្យា មិនមើលមុខអូន និងកូន អូនដឹងថា បងធ្វើការរាល់ថ្ងៃ លើសកម្លាំង ឈឺមិនប្រាប់អូន ខ្លាចអូនបារម្ភ ប្ដីដឹងទេ ការចាកចេញនេះ ប្រពន្ធបងជិតឆ្កួតហើយ ប្ដីអូនសង្ហាណាស់ ចំណេះដឹងខ្ពង់ខ្ពស់ មានចរិកស្លូតបូត ស្មោះត្រង់ណាស់ ៥ថ្ងៃហើយ ដែលបងទុកអូន អោយគេងគ្មានបង អូននឹកបង ចង់អោបបង អោយពេញដៃដូចមុន ចង់អោយបងកាន់ដៃអូនពេលគេង អូនស្រលាញ់ប្ដីណាស់ អូននឹងរក្សាការស្រលាញ់ប្ដីក្នុងបេះដូង អូនអស់មួយជីវិត នាទីចុងក្រោយ បងមានត្រឹមរូបថត អូននឹងសន្យាថា មើលកូនយើងទាំង២ អោយល្អបំផុត សូមប្ដីទៅកាន់សុគតិភព សូមជាតិក្រោយ កុំអាយុខ្លីចឹងទៀតណាបង សូមអោយបងល្អគ្រប់យ៉ាង ដូចជាតិនេះ ហើយកុំស្គាល់ពាក្យថា ហត់នឿយ អាយុវែង ដល់ចាស់កោងខ្នង លាហើយមនុស្សល្អរបស់អូនអើយ អូនដឹងថា បងបារម្ភរឿងអូនឈឺជើង តែបងកុំបារម្ភអី ពេលអូនឈឺ អូននឹងទៅពេទ្យខ្លួនអែង បងដឹងហើយថា ប្រពន្ធបងខ្លាំងគ្រប់យ៉ាង អូននឹងដើរទៅរួច អូនសន្យាណាប្ដីសំលាញ់ចិត្ត thy samedy» ។
យ៉ាងណា ក៏សូមចូលរួមរំលែកទុក្ខយ៉ាងក្រៀមក្រំបំផុត ចំពោះក្រុមគ្រួសារនៃសពលោកវេជ្ជបណ្ឌិត ហើយសូមវិញ្ញាណក្ខន្ធរបស់លោកវេជ្ជបណ្ឌិត ធី សាមឺឌី ទៅកាន់ឋានសុគតិភព កុំបីឃ្លៀងឃ្លាតឡើយ ៕
ចែករំលែកព័តមាននេះ