ខេត្តបន្ទាយមានជ័យ ៖ បើតាមសេចក្តីរាយការណ៍បានឱ្យដឹងថា ពលរដ្ឋបានប្រទះឃើញកង់និងទ្រនាប់ជើងនៅមាត់ទឹកប្រឡាយ ដោយសង្ស័យកម្លាំងសមត្ថកិច្ចក៏បានចុះរាវរក តែមិនឃើញ លុះយកយុថ្កាយុទ្ធការមកបោះទាញ ទើបជាប់រកឃើញតែម្តង បង្កឱ្យមានការភ្ញាក់ផ្អើលកាលពីវេលាម៉ោង២និង៤០នាទីរសៀល ថ្ងៃទី២៥ ខែឧសភា ឆ្នាំ២០២២ នៅចំណុចប្រឡាយស្ពានក្រឡ ស្ថិតក្នុងភូមិគោកទំលាប់ ឃុំបន្ទាយនាង ស្រុកមង្គលបូរី។
សេចក្តីរាយការណ៍បន្តថា សាកស.ពជនរងគ្រោះខាងលើនេះ មានឈ្មោះ ជួប កាក់ ភេទប្រុសអាយុ៣៦ឆ្នាំ រស់នៅភូមិគោកទំលាប់ ឃុំបន្ទាយនាង ស្រុកមង្គលបូរី។
បើតាមកម្លាំងនគរបាលប៉ុស្តិ៍ឃុំបន្ទាយនាង បានប្រាប់ថា នៅព្រឹកថ្ងៃទី២៥ ខែឧសភា ឆ្នាំ២០២២ មានប្រជាពលរដ្ឋប្រទះឃើញកង់ និងទ្រនាប់ជើងនៅមាត់ទឹកក្បាសស្ពានខាងកើតផ្លូវជាប់នឹងជាតិលេខ៦ ស្ថិតនៅភូមិគោកទំលាប់ ឃុំបន្ទាយនាង ស្រុកមង្គលបូរី ។ ដោយស្គាល់អត្តសញ្ញាណ ពលរដ្ឋក៏បានទៅប្រាប់សាច់ញាតិ ហើយក៏នាំគ្នាមករក តែរកមិនឃើញឡើយ បន្ទាប់មកក៏រាយការណ៍ជូនទៅអាជ្ញាធរឃុំបន្ទាយនាងតែម្តង។
កម្លាំងនគរបាលប៉ុស្តិ៍បានបញ្ជាក់ថា ក្រោយទទួលព័ត៌មានភ្លាម កម្លាំងនគរបាលប៉ុស្តិ៍ និងស្រុក ព្រមទាំងកម្លាំងយោធាតំបន់ប្រតិបត្តិការសឹករងស្រុក និងកងរាជអាវុធហត្ថស្រុក ប្រមាណជាង២០នាក់ បានចុះទៅរាវរក តែរកមិនឃើញនោះទេ ។ ក្រោយមកសមត្ថកិច្ចក៏បានទៅបិទទឹកផ្នែកខាងលើ ដើម្បីអោយស្រក បន្ទាប់មកកម្លាំងយោធាតំបន់ប្រតិបត្តិការសឹករងក៏បានយកយុថ្កាបោះចូលទឹក រួចទាញរាវរក ក៏ទាក់មកស្រាប់តែឃើញសាកស.ពជនរងគ្រោះដែលលិចទឹកនៅចំណុចអន្លង់ទឹកជ្រៅចំកណ្តាលតែម្តង ហើយក៏បានស្រង់ស.ពជនរងគ្រើមកលើគោកវិញ ដើម្បីធ្វើការពិនិត្យមើល។
កម្លាំងនគរបាលប៉ុស្តិ៍រូបនោះបានបញ្ជាក់ថា តាមការពិនិត្យសាកស.ពជនរងគ្រោះ គឺគ្មានស្លាកស្នាមអ្វីគួរឱ្យកត់សម្គាល់នោះ ដោយសង្ស័យថា ជនរងគ្រោះលង់ទឹកស្លា.ប់ ហើយចំពោះមូលហេតុអាចបណ្តាលមកពីជនរងគ្រោះចុះងូតទឹក តែទឹកហូរកួចខ្លាំងធ្វើជនរងគ្រោះលង់ទឹកស្លា.ប់នៅអំឡុងម៉ោង១យប់ចូលថ្ងៃទី២៥ ខែឧសភា ឆ្នាំ២០២២។ ក្រោយពេលពិនិត្យរួចហើយ សមត្ថកិច្ចបានប្រគល់សាកស.ពជនរងគ្រោះជូនសាច់ញាតិទទួលយកទៅធ្វើបុណ្យតាមប្រពៃណី។
បើតាមសាច់ញាតិបានអោយដឹងដែរថា ជនរងគ្រោះដែលស្លា.ប់ខាងលើនេះមានឈ្មោះ ជួប កាក់ ហើយក្រោយពេលប្រពន្ធរត់ចោលទៅយកប្តីថ្មី រយៈពេល៤ទៅ៥ឆ្នាំមកនេះជនរងគ្រោះខូចចិត្តផឹកស្រារហូតដល់រលាកស្រោមខួរកើតជាជំងឺសរសៃប្រសាទ និងដើរមិនសូវនៅផ្ទះនោះទេ អាចថា មុនលង់ទឹកស្លា.ប់ជនរងគ្រោះផឹកស្រាស្រវឹង ហើយក្តៅក៏ចុះងូតទឹក បណ្តាលលង់តែម្តង៕
ចែករំលែកព័តមាននេះ