រាជធានីភ្នំពេញ ៖ សាលាដំបូងរាជធានីភ្នំពេញ នាព្រឹកថ្ងៃទី២៤ ខែឧសភា ឆ្នាំ២០២២ បានប្រកាសសាលក្រមផ្តន្ទាទោសលើសំណុំរឿង «ឃា.តកម្ម» មួយ គឺឪពុចុងដែលយកជង្គង់សង្កត់ដើមទ្រូងកូនស្រី រហូតដល់ស្លា.ប់បាត់បង់ជីវិត ដោយតម្រូវឲ្យអនុវត្តក្នុងពន្ធនាគារកំណត់២០ឆ្នាំ គិតពីថ្ងៃចាប់ឃុំខ្លួន ។ សាលក្រមនេះ ទុកសិទ្ធិឲ្យប្តឹងឧទ្ធរណ៍តាមកំណត់ច្បាប់។
ជនជាប់ចោទខាងលើនេះមានឈ្មោះ សុខ រដ្ឋា ភេទប្រុស អាយុ២៩ឆ្នាំ មុខរបរមិនពិតប្រាកដ មានទីលំនៅផ្ទះជួល ផ្លូវលំ ស្ថិតក្នុងភូមិឫស្សី សង្កាត់ស្ទឹងមានជ័យទី២ ខណ្ឌមានជ័យ រាជធានីភ្នំពេញ (មានផ្ទុកសារធាតុញៀ.ន) ។
សូមជម្រាបថា ចៅក្រមស៊ើបសួរសាលាដំបូងរាជធានីភ្នំពេញ កាលពីរសៀលថ្ងៃទី២ ខែកក្កដា ឆ្នាំ២០២១ បានចេញដីកាសម្រេចឃុំខ្លួនជនសង្ស័យម្នាក់ជាឪពុកចុង ដែលប្រើជង្គង់សង្កត់សម្លា.ប់កូនស្រីអាយុ២ឆ្នាំ ដាក់ពន្ធនាគារជាបណ្តោះជាសន្ន ដោយរង់ចាំផ្តន្ទាទោសតាមផ្លូវច្បាប់។ ការសម្រេចឃុំខ្លួនពីសំណាក់លោកចៅក្រមស៊ើបសួរនោះ បន្ទាប់តំណាងអយ្យការអមសាលាដំបូងរាជធានីភ្នំពេញ បញ្ចប់ការសាកសួរលើសំណុំរឿងនេះ ដោយបានចោទប្រកាន់ជនសង្ស័យជាផ្លូវការពីបទ.ឃា.តកម្ម ។
សូមបញ្ជាក់ថា កាលពីវេលាម៉ោង១និង១៥នាទីរសៀល ថ្ងៃទី៣០ ខែមិថុនា ឆ្នាំ២០២១ នៅចំណុចផ្ទះជួលខាងលើ ជនសង្ស័យជាឪពុកចុងបានធ្វើសកម្មភាពយកជង្គង់សង្កត់លើទ្រូងកូនស្រីឈ្មោះ នន ស្រីនិច អាយុ២ឆ្នាំ បណ្តាលឲ្យស្លា.ប់ ដោយគ្រាន់តែក្មេងស្រីរងគ្រោះបានវា.យក្បាល និងយកជើងធូបចាក់ភ្នែកជនសង្ស័យលេង ធ្វើឲ្យឪពុកចុងនោះខឹង ហើយក៏បានចាប់ជនរងគ្រោះវា.យលើខ្លួនប្រាណ និងយកជង្គង់អុកពីលើដើមទ្រូងកូនស្រី បណ្ដាលឲ្យរបួសធ្ងន់ធ្ងរ រហូតដល់ស្លា.ប់តែម្តង ។ បន្ទាប់មក ជនសង្ស័យក៏បាននាំកុមារីនោះ ទៅឲ្យជីតារបស់គេឈ្មោះ ម៉ី ថុល ដោយភូតកុហកថា ខ្លួនរអិលជើងដួលក្នុងបន្ទប់ទឹកសង្កត់លើក្មេងស្រីរងគ្រោះ បណ្ដាលឲ្យស្លា.ប់ ។
តែទោះជាយ៉ាងណាក្តី ជីតាក្មេងរងគ្រោះបានរាយការណ៍ប្រាប់សមត្ថកិច្ចប៉ុស្តិ៍នគរបាលស្ទឹងមានជ័យទី២ ភ្លាមៗឲ្យបានដឹងពីហេតុការណ៍នេះ ពេលនោះកម្លាំងនគរបាលប៉ុស្តិ៍ និងនគរបាលផ្នែកជំនាញខណ្ឌមានជ័យ បានសហការជាមួយកម្លាំងការិយាល័យនគរបាលព្រហ្មទណ្ឌកម្រិតធ្ងន់ និងកម្លាំងការិយាល័យនគរបាលបច្ចេកទេសវិទ្យាសាស្ត្រ នៃស្នងការដ្ឋាននគរបាល រាជធានីភ្នំពេញ បានចុះស្រាវជ្រាវជាបន្ទាន់ ដោយមានការចូលរួមពីមន្ត្រីអង្គភាពការពារកុមារ ហៅកាត់ថា (CPU) បានពិនិត្យលើសាកស.ពជនរងគ្រោះឃើញថា មានស្លាកស្នាមជាំលើខ្លួនប្រាណជាច្រើនកន្លែង ដូច្នេះមិនអាចជាករណីរអិលជើងដួលសង្កត់លើ ដូចការអះអាងរបស់ជនសង្ស័យនោះទេ ។
បន្ទាប់មកសមត្ថកិច្ចក៏បានឈានដក់ការឃាត់ខ្លួនឪពុកចុងរូបនេះ និងបានសួរយកចម្លើយ រួចកសាងសំណុំរឿងបញ្ជូនទៅកាន់សាលាដំបូងរាជធានីភ្នំពេញ ចាត់ការតាមនីតិវិធី ៕
ចែករំលែកព័តមាននេះ