ចាត់ទុកជាដំណឹងដ៏ភ្ញាក់ផ្អើលមួយ ក្នុងពេលដែលអ្នកអង្គម្ចាស់ នរោត្តម រស្មី ខែមុន្នី នឹងត្រូវបានជ្រើសរើសដើរតួជា តួអង្គឯកក្នុងខ្សែភាពយន្តហូលីវូដថ្មីមួយ នៅក្នុង
រាជធានីភ្នំពេញ ៖ ចាត់ទុកជាដំណឹងដ៏ភ្ញាក់ផ្អើលមួយ ក្នុងពេលដែលអ្នកអង្គម្ចាស់ នរោត្តម រស្មី ខែមុន្នី នឹងត្រូវបានជ្រើសរើសដើរតួជា តួអង្គឯកក្នុងខ្សែភាពយន្តហូលីវូដថ្មីមួយ នៅក្នុងសហរដ្ឋអាមេរិក ដែលនោះគឺជាការសម្ដែងតួអង្គឯកលើកដំបូងរបស់អ្នកអង្គម្ចាស់។ នេះបើយោងតាមការប្រកាសពីផេកហ្វេសប៊ុកដែលមានឈ្មោះថា «ស្រលាញ់» សម្តេចរាជបុត្រីព្រះអនុជ នរោត្តម អរុណរស្មី កាលពីថ្ងៃទី២១ ខែឧសភា ឆ្នាំ២០២២។
បើតាមការប្រកាសខាងលើនេះ បានបញ្ជាក់ថា អ្នកអង្គម្ចាស់នឹងចាប់ផ្ដើមថតខ្សែភាពយន្តនេះចាប់ពីខែក្រោយនេះទៅ ហើយនៅក្នុងខ្សែភាពយន្តថ្មីនេះ ក៏មានតារាបរទេសល្បីៗចូលរួមសម្ដែងផងដែរ ដែលរួមមានតារា TikTok Cheryl Porter និង Chris Olsen និង “American Idol” alum Pia Toscano ។
គួរបញ្ជាក់ថា អ្នកអង្គម្ចាស់ នរោត្តម រស្មី ខែមុន្នី គឺជាបុត្រានៃសម្ដេចរាជបុត្រីព្រះអនុជ នរោត្តម អរុណរស្មី ឧត្តមប្រឹក្សាផ្ទាល់ព្រះមហាក្សត្រ និងជាទីប្រឹក្សារាជរដ្ឋាភិបាល និងឯកឧត្តម កែវ ពុទ្ធរស្មី ឧត្តមប្រឹក្សាផ្ទាល់ព្រះមហាក្សត្រ និងជាសមាជិកក្រុមប្រឹក្សាធម្មនុញ្ញ ខណៈពេលអ្នកអង្គម្ចាស់ នរោត្តម រស្មីខែមុន្នី ត្រូវជាព្រះរាជនត្តា (ចៅប្រុស) នៃព្រះបរមរតនកោដ្ឋ ព្រះបាទសម្ដេចព្រះនរោត្ដម សីហនុ ។
ទ្រង់បានបញ្ចប់ការសិក្សាដោយជោគជ័យ នៅសហរដ្ឋអាមេរិក ក្នុងឆ្នាំ២០១៧ នៅឯ ( American Academy of Dramatic Arts) នៅទីក្រុង Los Angeles។ ទ្រង់បានប្រសូតនៅទីក្រុងចាកាតា ពេលដែលព្រះបិតារបស់ទ្រង់បានធ្វើជាទូតកម្ពុជា ប្រចាំប្រទេសឥណ្ឌូណេស៊ី។ បន្ទាប់មក អ្នកអង្គម្ចាស់នរោត្ដម រស្មីខែមុន្នី ក៏បានសិក្សានៅទីក្រុង Kuala Lumpur និងទីក្រុង ប៊ែកឡាំង ។
ពេលទ្រង់យាងត្រឡប់មកកម្ពុជា ទ្រង់ក៏បានបញ្ចប់ការសិក្សាដោយជោគជ័យនៅសាលាអន្តរជាតិភ្នំពេញ (ISPP) មុនពេលទ្រង់បានផ្លាស់ទៅបន្តការសិក្សានៅសហរដ្ឋអាមេរិក។ ទ្រង់បានទទួលគោរមងារជា អ្នកអង្គម្ចាស់ នរោត្ដម រស្មីខែមុន្នី ពីព្រះមហាក្សត្រនៃព្រះរាជាណាចក្រកម្ពុជា សម្ដេចព្រះបរមនាថនរោត្ដម សីហមុនី ដែលត្រូវជាព្រះបិតុលារបស់ទ្រង់។ កាលទ្រង់នៅវ័យកុមារ ត្រូវបានសម្ដេចព្រះបរមរតនកោដ្ឋ ព្រះបាទសម្ដេចនរោត្ដមសីហនុ សព្វព្រះរាជហរទ័យជាខ្លាំង ទៅលើទេពកោសល្យផ្នែកតន្ត្រីរបស់ទ្រង់៕
ចែករំលែកព័តមាននេះ