ខេត្តប៉ៃលិន ៖ អ្នកភូមិប៉ាហ៊ីជើង និងអាជីវករលក់ដូរនៅផ្សារថ្មីប៉ាហ៊ីជើង ហៅផ្សារជាងអូន ស្ថិតក្នុងភូមិប៉ាហ៊ីជើង សង្កាត់ប៉ៃលិន ក្រុងប៉ៃលិន បាននាំគ្នារអ៊ូរទាំ និងត្អូញត្អែរពីបញ្ហាក្លិនស្អុយសំរាមដែលគរទុកចោល អស់រយៈពេលជាង១០ថ្ងៃមកហើយ នៅតាមមុខផ្ទះ និង នៅក្នុងផ្សារ ។ ពួកគាត់ស្នើឱ្យអាជ្ញាធរក្រុងប៉ៃលិន សូមឱ្យមេការប្រមូលសំរាមខេត្តប៉ៃលិន ប្រញាប់កើបដឹកយកទៅចាក់ចោលផង ព្រោះពួកគាត់លំបាកទ្រាំខ្លាំងណាស់ ដោយសារជះក្លិនស្អុយខ្លាំងពេក បណ្តាលឱ្យអ្នកខ្លះទៅជាកើតជំងឺរលាកផ្លូវដង្ហើម និងឈឺក្បាលវិលមុខជាដើម ។
អ្នកភូមិឈ្មោះ ផល និងឈ្មោះ ធាវី បានរៀបរាប់ទាំងខឹងសម្បា និងបារម្ភពីសុខភាពផងថា អ្នកភូមិទ្រាំលែងបានតទៅទៀតហើយ ខណៈដែលសំរាមគរទុកនៅមុខផ្ទះអស់រយៈពេល១៥ថ្ងៃហើយ មិនឃើញខាងក្រុមហ៊ុនអនាម័យដឹកសំរាមខេត្តប៉ៃលិន មកប្រមូលទាល់តែសោះ ។
ក្លិនកាកសំណល់ផ្ទះបាយ ដូចជាក្បាលត្រី ស្រកាត្រី សម្បកបន្លែ សម្បកពងមាន់ពងទា ដែលច្រក
ថង់គរទុកអស់រយៈពេលជាច្រើនថ្ងៃ បានបញ្ចេញក្លិនស្អុយឆួលចូលពេញក្នុងផ្ទះ លំបាកដកដង្ហើម លំបាកហូបអាហារ ដេកលែងលក់ និងលំបាករស់នៅយ៉ាងខ្លាំង ។
ពួកគាត់ក៏បានរិះគន់ដែរថា ការបង់ប្រាក់ថៃ្លសំរាមគឺរៀងរាល់ខែ មិនដែលខាន១ថ្ងៃឡើយ ប៉ុន្តែអ្នកម៉ៅការហាក់ដូចជាមិនអើពើនឹងបញ្ហាសុខភាពរបស់ពួកគាត់ទាល់តែសោះ គួរតែ៣ទៅ៤ថ្ងៃ មកប្រមូលម្តង ព្រោះបើលើសពីនេះ នឹងបង្កបញ្ហាដល់សុខភាពអ្នកភូមិ ។
ចំណែកអ្នកភូមិប៉ាហ៊ីជើង ក៏បានធ្វើការរិះគន់អាជ្ញាធរក្រុង ក៏ដូចជាមេការប្រមូលសំរាមថា មិនយកចិត្តទុកដាក់ចំពោះសុខភាពរបស់ពួកគាត់ ដោយមិនគិតខ្វល់មកពិនិត្យមើលឱ្យបានត្រឹម ត្រូវ ។ ពួកគាត់មានការព្រួយបារម្ភពីសុវត្ថិភាព សុខភាពផ្លូវដង្ហើម ព្រោះអាចកើតជាជំងឺផ្សេងៗ ខណៈរាល់ថ្ងៃលំបាកក្នុងការរកប្រាក់មកចិញ្ចឹមជីវិតហើយ បែរជាមានបញ្ហាសុខភាពថែមទៀត ធ្វើឱ្យពួកគាត់កាន់តែក្រទៅៗ មិនអាចងើបខ្លួនរួចឡើយ ។ ពួកគាត់ស្នើសុំឱ្យថ្នាក់ដឹកនាំក្រុង ក៏ដូចជាខេត្ត គួរតែចុះពិនិត្យមើលបញ្ហាសំរាមទាំងនេះ បើនៅតែព្រងើយកន្តើយទៀត ពួកគាត់ពិតជាអស់សង្ឃឹមខ្លាំងណាស់ ។
ពាក់ព័ន្ធទៅនឹងបញ្ហានេះ លោក សែប សារ៉ាន់ ហៅចិន មេការអនាម័យប្រមូលសំរាមនៅផ្សារខេត្តប៉ៃលិន បានឱ្យដឹងថា ខាងគាត់ប្រមូលរាល់ថ្ងៃ គឺ៣ថ្ងៃប្រមូលម្តង តែដោយសារជាប់រវល់រៀបចំអាពាហ៍ពិពាហ៍កូន ទើបមិនបានយករថយន្តទៅប្រមូលដឹកចាក់ចោលនៅទីលានចាក់សំរាម ។ ប៉ុន្តែពេលនេះ បន្ទាប់ពីរួចធុរ: គឺគាត់ចាប់ផ្តើមដើរប្រមូលជាបណ្តើរៗនៅតាមផ្ទះប្រជាពលរដ្ឋ និងក្នុងផ្សារផងដែរ ។
ចំណែកលោក ចក់ រិទ្ធី អភិបាលរងក្រុងប៉ៃលិន បានឱ្យដឹងដែរថា ខាងលោកតែងតែណែនាំដល់មេការសំរាមខាងលើ ឱ្យចុះប្រមូលកម្ទេចកាកសំណល់គ្រប់កន្លែងគោលដៅរបស់ខ្លួនឱ្យទាន់ពេលវេលា ដោយមិនត្រូវទុកគរចោលឱ្យស្អុយរលួយបែបនេះទេ ។ លោកបន្តថា លោកក៏បានស្រែកតាមគ្រុបជារៀងរាល់ថ្ងៃ ហើយនៅពេលនេះ បន្ទាប់ពីបានទទួលសេចក្តីរាយការណ៍ថាអត់មានការប្រមូលសំរាមតាមភូមិយកទៅចាក់ចោល លោកនឹងទាក់ទងទៅខាងមេការឱ្យប្រមូលភ្លាម ៕
ចែករំលែកព័តមាននេះ