នគរបាលស្រុកកោះធំឃាត់ខ្លួនមេឆ្នោតដុះស្លែ និងកូនកញ្ច្រែង
ខេត្តកណ្តាល ៖ នគរបាលស្រុកកោះធំបានចុះធ្វើការបង្ក្រាបទីតាំងកត់កន្ទុយលេខខុសច្បាប់មួយកន្លែងកាលពីវេលាម៉ោង២ និង៣០នាទីរសៀល ថ្ងៃទី២៥ ខែតុលា ឆ្នាំ២០១៦ …
ខេត្តកណ្តាល ៖ នគរបាលស្រុកកោះធំបានចុះធ្វើការបង្ក្រាបទីតាំងកត់កន្ទុយលេខខុសច្បាប់មួយកន្លែងកាលពីវេលាម៉ោង២ និង៣០នាទីរសៀល ថ្ងៃទី២៥ ខែតុលា ឆ្នាំ២០១៦ នៅចំណុច ភូមិព្រែកបិ ឃុំកោះធំ(ខ) ស្រុកកោះធំ ដោយបានឃាត់ខ្លួនស្ត្រីជាមេន្ទុយលេខដុះស្លែម្នាក់ និងកូនកញ្ច្រែងដើរកត់ម្នាក់ ។
លោក ឈឿន ប៊ុនឆន ឣធិការនគរបាលស្រុកកោះធំ បានឲ្យដឹងថា ជនសង្ស័យដែលត្រូវបានឃាត់ខ្លួន ១-ឈ្មោះ ងន ទៀង ភេទស្រី អាយុ៣៥ឆ្នាំ ជនជាតិខ្មែរ មានទីលំនៅភូមិឃុំកើតហេតុ មុខរបរកត់កន្ទុយលេខ និង ២-ឈ្មោះ គា មុំ ភេទស្រី អាយុ ៣៧ឆ្នាំ ជនជាតិខ្មែរ មានទីលំនៅភូមិឃុំកើត មុខរបរ បើកល្បែងស៊ីសង (មេកន្ទុយលេខ) ។ ក្នុងពេលឃាត់ខ្លួន សមត្ថកិច្ចដកហូតបានក្រដាសកត់កន្ទុយលេខមានលេខចំនួន១សន្លឹក, ចុងសន្លឹកកន្ទុយលេខមួយចំនួន, ប្រាក់ខ្មែរចំនួន១០៣.០០០រៀល, ទូរស័ព្ទដៃម៉ាកណូគាចុចពិល១គ្រឿង, ម៉ាក Samsung Galaxy Tab 4 ១គ្រឿង និង iPad Mini ១គ្រឿង ។
លោកឣធិការបញ្ជាក់ទៀតថា ក្រោយទទួលបានទទួលព័ត៌មានពីប្រជាពលរដ្ឋល្អថា មានការលេងល្បែងស៊ីសងខុសច្បាប់ (កន្ទុយលេខ) នៅចំណុចកើតហេតុខាងលើ កម្លាំងជំនាញបានស្រាវជ្រាវហើយបានជួបមុខសញ្ញាសង្ស័យម្នាក់ឈ្មោះ ងន ទៀង កំពុងធ្វើសកម្មភាពដើរកត់កន្ទុយលេខ ពេលនោះកម្លាំងជំនាញបានធ្វើការឃាត់ខ្លួនជនសង្ស័យរូបនេះ រួមជាមួយក្រដាសកត់កន្ទុយលេខ និងចុងសន្លឹកកត់កន្ទុយលេខ ព្រមទាំងប្រាក់រៀលមួយចំនួនមកកាន់អធិការដ្ឋានដើម្បីធ្វើការសាកសួរ ។
នៅចំពោះមុខសមត្ថកិច្ច ឈ្មោះ ងន ទៀង បានឆ្លើយសារភាពថា ខ្លួនពិតជាបានធ្វើសកម្មភាពកត់កន្ទុយលេខប្រាកដមែន ដោយកត់បានយកទៅឲ្យមេទទួលស៊ីសងឈ្មោះ គា មុំ ។ លុះនៅវេលាម៉ោង៤ និង១៥នាទីថ្ងៃដដែល សមត្ថកិច្ចបានបន្តស្រាវជ្រាវរហូតបាននាំខ្លួនឈ្មោះ គា មុំ រួមជាមួយ iPad Mini ១គ្រឿង និងទូរស័ព្ទដៃម៉ាក Samsung Galaxy Tab 4 ១គ្រឿង ដែលជារបស់ជនសង្ស័យមកកាន់អធិការដ្ឋាន ។
នៅចំពោះមុខសមត្ថកិច្ចជនសង្ស័យឈ្មោះ គា មុំ បានឆ្លើយសារភាពថា រូបខ្លួនពិតជាបានបើកទទួលស៊ីសងកន្ទុយលេខ ហើយឈ្មោះ ងន ទៀង គឺពិតជាអ្នកកត់កន្ទុយលេខយកមកឲ្យខ្លួនប្រាកដមែន ។
បច្ចុប្បន្នជនសង្ស័យទាំង២នាក់ រួមនិងវត្ថុតាងខាងលើ ត្រូវបាននគរបាលកសាងសំណុំរឿងបញ្ជូនទៅសាលាដំបូងខេត្តកណ្តាល ចាត់ការតាមច្បាប់ ៕
ចែករំលែកព័តមាននេះ