ពួកអ្នកចរចារាយការណ៍កាលពីថ្ងៃទី២២ តុលាថា ពួកចោរសមុទ្រសូម៉ាលីបានដោះលែងចំណាប់ខ្មាំងជនជាតិអាស៊ី២៦នាក់ ដែលចាប់ទុកតាំងពីជិត៥ឆ្នាំមកហើយ ក្រោយការប្លន់នាវានេសាទពួកគេឈ្មោះNAHAM 3 មក ។
ពួកអ្នកចរចារាយការណ៍កាលពីថ្ងៃទី២២ តុលាថា ពួកចោរសមុទ្រសូម៉ាលីបានដោះលែងចំណាប់ខ្មាំងជនជាតិអាស៊ី២៦នាក់ ដែលចាប់ទុកតាំងពីជិត៥ឆ្នាំមកហើយ ក្រោយការប្លន់នាវានេសាទពួកគេឈ្មោះNAHAM 3 មក ។
ចំណាប់ខ្មាំងទាំងនេះរស់នៅភាគច្រើនលើទឹកដីសូម៉ាលី ។ ក្រុមនាវិករបស់នាវា NAHAM 3 រួមមាននាវិកមកពីកម្ពុជា ចិន ឥណ្ឌូណេស៊ី ហ្វ៊ីលីពីន តៃវ៉ាន់ និងវៀតណាម ។
ក្នុងសេចក្តីប្រកាសមួយចេញផ្សាយដោយអង្គការ OCEANS BEYOND PIRACY លោកJOHN STEED អ្នកសម្របសម្រួលបណ្តាដៃគូជួយទ្រទ្រង់ដល់ចំណាប់ខ្មាំង HPS ដែលជាអ្នកចរចាឱ្យមានការដោះលែងនោះថ្លែងថា ចំណាប់ខ្មាំងទាំងនោះបច្ចុប្បន្នមានសន្តិសុខព្រោះស្ថិតក្នុងដៃអាជ្ញាធរក្រុងGALMUDUG ភាគកណ្តាលសូម៉ាលីរួចពួកគេនឹងត្រូវធ្វើមាតុភូមិនិវត្តន៍នាពេលបន្តិចទៀតតាមជើងយន្តហោះមនុស្សធម៌មួយរបស់អ.ស.ប រួចបន្ទាប់មកនឹងបញ្ជូនទៅកាន់ប្រទេសពួកគេ ។
ក្រោយការវាយប្រហារនាវាNAHAM3 ដោយពួកចោរសមុទ្រសូម៉ាលីកាលពីខែមីនាឆ្នាំ២០១២ ក្នុងដែនទឹកសីសែលមនុស្ស២៩នាក់ត្រូវចាប់ជាចំណាប់ខ្មាំង ក៏ប៉ុន្តែមនុស្សម្នាក់ស្លាប់ពេលវាយប្រហាររួចមនុស្សម្នាក់ទៀតស្លាប់ដោយសារជំងឺពេលជាប់ជាចំណាប់ខ្មាំង។ យោងតាមHPS ថា ពួកគេរស់នៅជាង៤ឆ្នាំកន្លះក្នុងលក្ខខណ្ឌយ៉ាងលំបាកលំបិនបំផុត ឃ្លាតឆ្ងាយពីគ្រួសារ ។ លោក JOHN STEED បញ្ជាក់ថា ការចរចាត្រូវបានធ្វើរយៈពេលដល់ទៅ១៨ខែ ។
ពេលមានវិបត្តិចោរសមុទ្រខ្លាំងកាលពីខែមករា ឆ្នាំ២០១១ចោរសមុទ្រឃុំទុកចំណាប់ខ្មាំង ដល់ទៅ៧៣៦នាក់ និងនាវា៣២គ្រឿង ។ បច្ចុប្បន្ននៅសល់ចំណាប់ខ្មាំងជនជាតិអីុរ៉ង់១០នាក់ កេនយ៉ា៣នាក់ ក្នុងដៃពួកចោរសមុទ្រ ៕
ចែករំលែកព័តមាននេះ