ខេត្តកំពង់ធំ ៖ រថយន្តតាកូម៉ាពណ៌ត្រីឆ្លូញពាក់ស្លាកលេខភ្នំពេញ 2Z-2263 ដឹកឈើប្រណិតចេញពីខេត្តព្រះវិហារមកជាប់អន្ទាក់សមត្ថកិច្ចចរាចរខេត្តកំពង់ធំចាប់ប្រគល់ឲ្យខាងមន្ត្រីជំនាញ។ ប្រភពព័ត៌មានដែលទទួលបានពីកម្លាំងសមត្ថកិច្ចនគរបាលចរាចរណ៍ខេត្តកំពង់ធំប្រាប់កាលពីយប់ថ្ងៃទី២០ ខែតុលា ឆ្នាំ២០១៦ថា នៅពេលដែលកម្លាំងសមត្ថកិច្ចចុះត្រួតពិនិត្យច្បាប់ចរាចរផ្លូវគោគនៅចំណុចភូមិឬស្សីដួច ឃុំសាលាវិស័យ ស្រុកប្រាសាទបល្ល័ង្កក៏ប្រទះឃើញរថយន្តតាកូម៉ាពណ៌ត្រីឆ្លូញពាក់ស្លាកលេខភ្នំពេញ 2Z-2263 ដឹកឈើប្រណិតពេញក៏បានធ្វើការឃាត់ទុកហើយទូរស័ព្ទប្រាប់សមត្ថកិច្ចមេព្រៃ និងខាងនគរបាលប្រឆាំងបទល្មើសសេដ្ឋកិច្ចតែត្រូវបានពួកលោកប្រាប់ថាសុទ្ធតែគ្នាឯងទេ។
ចំណែកខាងម្ចាស់រថយន្តប្រាប់ថាគេបានបង់លុយឲ្យអស់ហើយសមត្ថកិច្ចនៅតាមដងផ្លូវ ហេតុអីបែរជាខាងលោកចរាចរណ៍មកឃាត់ទៅវិញ ។ លោកប្រាប់ថាការឃាត់រថយន្តដឹកឈើនេះគឺឃាត់ប្រគល់ឲ្យខាងជំនាញទេ តែគេមិនឃើញមកក៏សម្រេចចិត្តទូរស័ព្ទប្រាប់ភ្នាក់ងារកោះសន្តិភាព វិញលោកក៏ហៅទូរស័ព្ទទៅប្រាប់លោក តឹប ញាតា នាយខ័ណរដ្ឋបាលព្រៃឈើកំពង់ធំ ក៏បានបញ្ជាកម្លាំងទៅនាំយករថយន្តល្មើសនោះមកកាន់ផ្នែករដ្ឋព្រៃឈើស្ទោង ដែលមានទីតាំងនៅក្នុងភូមិថ្នល់បែក ឃុំត្រពាំងឬស្សី ស្រុកកំពង់ស្វាយ ធ្វើការវាស់វែងទាំងយប់មានឈើប្រណិតប្រភេទធ្នង់ចំនួន៣០ដុំស្មើនឹង០,៩៥២ម៉ែត្រគូប។
នៅចំពោះមុខសមត្ថកិច្ចជនសង្ស័យដែលជាម្ចាស់រថយន្តបានសារភាពថា ខ្លួនឈ្មោះ លុយ សុភា ភេទប្រុស អាយុ៣០ឆ្នាំ រស់នៅភូមិស្វាយកាល ឃុំកកោះ ស្រុកសន្ទុកខេត្តកំពង់ធំ ឈើទាំងអស់នេះគេស៊ីឈ្នួលដឹកមកពីស្រុកឆែប ខេត្តព្រះវិហារ មកដាក់ឲ្យគេនៅក្នុងខេត្តកំពង់ធំ ចំណែកម្នាក់ទៀតឈ្មោះ សុខ ឈី ភេទប្រុស អាយុ១៨ឆ្នាំ ជាអ្នករស់នៅផ្ទះជិតខាងគ្នាគេក៏បបួលមកជាមួយទៅ។
ពាក់ព័ន្ធករណីខាងលើលោក សាយ ណូរ៉ា ព្រះរាជអាជ្ញារងអមសាលាដំបូងខេត្តកំពង់ធំ បានប្រាប់ កោះសន្តិភាព នៅថ្ងៃទី២១ ខែតុលា ឆ្នាំ២០១៦នេះថា លោកបានបញ្ជាឲ្យខាងជំនាញចាត់ការកសាងសំណុំរឿងបញ្ជូនមកកាន់សាលាដំបូងខេត្ត នៅរសៀថ្ងៃនេះហើយ ដើម្បីចាត់ការទៅតាមផ្លូវច្បាប់។ បើយោងតាមមាត្រា៩៨ កថាខណ្ឌទី២ចំណុចទី៥ នៃច្បាប់ប្រមូលផលអនុផលព្រៃឈើ ចំពោះប្រភេទឈើកម្រត្រូវដាក់ទណ្ឌកម្មចាប់ពី១ឆ្នាំទៅ៥ឆ្នាំ៕
ចែករំលែកព័តមាននេះ