មនុស្ស៣នាក់នៅសង្កាត់ចោមចៅ ស្លា.ប់ក្នុងថ្ងៃតែមួយ
រាជធានីភ្នំពេញ ៖ មនុស្សចំនួន៣នាក់ បានស្លា.ប់ជាបន្តបន្ទាប់ ក្នុងថ្ងៃតែមួយនៅក្នុងសង្កាត់ចោមចៅ ខណ្ឌពោធិ៍ សែនជ័យ ប៉ុន្តែនៅទីតាំងផ្សេងៗពីគ្នា ក្នុងនោះមានបុរសម្នាក់
រាជធានីភ្នំពេញ ៖ មនុស្សចំនួន៣នាក់ បានស្លាប់ជាបន្តបន្ទាប់ ក្នុងថ្ងៃតែមួយនៅក្នុងសង្កាត់ចោមចៅ ខណ្ឌពោធិ៍ សែនជ័យ ប៉ុន្តែនៅទីតាំងផ្សេងៗពីគ្នា ក្នុងនោះមានបុរសម្នាក់ និងស្រីម្នាក់ បានស្លាប់នៅក្នុងបន្ទប់ ផ្ទះជួលដែលពួកគាត់ស្នាក់នៅ ក្នុងភូមិទួលពង្រ សង្កាត់ចោមចៅ នាវេលាព្រឹក ថ្ងៃទី១៨ ខែតុលា ឆ្នាំ២០១៦ ដែលបណ្ដាលមកពីជំងឺគាំង បេះដូងឬខ្យល់គ។ក្រោយពេលមានហេតុការណ៍បែបនេះ កម្លាំងនគរបាល មូលដ្ឋានបានចុះទៅ ពិនិត្យមើលហើយមិនមានការប្ដឹងផ្ដល់ពីសំណាក់ក្រុមគ្រួសារនោះទេ បន្ទាប់មកសាកសពត្រូវក្រុមគ្រួសារនាំយកទៅធ្វើបុណ្យតាមប្រពៃណីនៅស្រុកកំណើត។
បុរសរងគ្រោះដែលស្លាប់ឈ្មោះ ខេង យ៉ត ភេទប្រុស អាយុ៤៥ឆ្នាំ ស្នាក់នៅផ្ទះជួលភូមិទួលពង្រ សង្កាត់ចោមចៅខណ្ឌពោធិ៍សែនជ័យ។ មានស្រុកកំណើតនៅ ភូមិគាស់ក្រឡ ឃុំគាស់ក្រឡ ស្រុកមោងឬស្សី ខេត្តបាត់ដំបង។មានប្រពន្ធឈ្មោះ ឈឿង សុផល អាយុ៤៧ឆ្នាំ ដែលមានមុខរបរកម្មកររោងចក្រ ស្នាក់នៅផ្ទះជួលជាមួយគ្នា ស្រុកកំណើតនៅភូមិទួលអំពិល ស្រុកមោងឬស្សី ខេត្តបាត់ដំបង ដែលមានកូនស្រីម្នាក់នៅក្នុងបន្ទុកគ្រួសារ។ បុរសនេះស្លាប់នៅក្នុងបុរីរុងរឿង ភូមិទួលពង្រ រីឯស្ត្រីម្នាក់ទៀត ដែលបានស្លាប់បន្ទាប់ដែរ មិនត្រូវបានគេស្គាល់ឈ្មោះឡើយ។
ដោយឡែកអ្នកស្លាប់ចុងក្រោយគេ គឺជាមនុស្សវិកលចរិត ដែលត្រូវបាន ប្រជាពលរដ្ឋបានប្រទះឃើញ អង្គុយស្លាប់នៅតាមចិញ្ចើមផ្លូវមួយកន្លែង ស្ថិតនៅជាប់ហាងលក់ស៊ុប យីហោ《កូនភ្លោះ》នៅ តាមបណ្ដោយផ្លូវវេងស្រេង ក្នុងភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យ និងបានបង្កឲ្យមានការភ្ញាក់ផ្អើលកាលពីវេលាម៉ោង២និង៥០នាទីរសៀល ថ្ងៃដដែលនោះដែរ។ សាកសពមិនត្រូវស្គាល់អត្តសញ្ញាណឡើយ តាមការប៉ាន់ស្មានគាត់មាន អាយុជាង៥០ឆ្នាំ ជាមនុស្សវិកលចរឹត និងមានចាក់សាក់នៅលើ ដៃទាំងសងខាង និងនៅលើស្មា គាត់គឺជាមនុស្សវិកលចរឹត ដែលការស្លាប់នោះត្រូវបាន នគរបាលពិនិត្យឃើញថា បណ្ដាលមកពីខ្យល់គ ។
ប្រជាពលរដ្ឋបានឲ្យដឹងថា កន្លងមកពួកគាត់តែងតែបានឃើញ បុរសរងគ្រោះខាងលើ ដើរចុះឡើងៗតាម បណ្តោយផ្លូវវេងស្រេង ពីខាងទឹកដីខណ្ឌមានជ័យ ចូលមកខណ្ឌពោធិ៍សែនជ័យ និងពីខណ្ឌពោធិ៍សែន ជ័យទៅកាន់ ខណ្ឌមានជ័យ បកទៅបកមក។ដោយឡែកនៅថ្ងៃកើតហេតុ វេលាម៉ោង១០និង៣០នាទីព្រឹក គាត់បានដើរបណ្តើរ និយាយបណ្តើរ ព្រមទាំងច្រៀងបណ្តើរ រហូតមកដល់ចំណុចខាងលើ បានចូលទៅអង្គុយលើស្មៅចិញ្ចើមផ្លូវ ច្រកចូលផ្ទះប្រជាពលរដ្ឋ ជាប់ហាងលក់ស៊ុបយីហោ កូនភ្លោះ នោះ។ ខណៈកំពុងអង្គុយនោះ ពួកគាត់បានឃើញបុរសរងគ្រោះខាងលើ និយាយផង បញ្ចេញកាយវិការផង ធ្វើដូចជាតួសម្ដែងអ្វីមួយ តែពុំមានអ្នកណា រវល់ ឬចាប់អារម្មណ៍ឡើយ ព្រោះដឹងថាគាត់ជាមនុស្សវិកលចរឹត និងតែងតែបែបនេះឯង។
លុះរហូតដល់វេលារសៀលថ្ងៃដដែលនេះ ក៏ស្រាប់តែ ប្រទះឃើញគាត់អង្គុយ មិនកម្រើកសោះ ហើយដោយមានការងឿងឆ្ងល់ ក៏បាននាំគ្នាចូលទៅមើល ទើបដឹងថាគាត់បានស្លាប់បាត់ទៅហើយ ទើបមានការភ្ញាក់ផ្អើល ហើយរាយការណ៍ជូននគរបាល ឲ្យចុះមកពិនិត្យមើលជាក់ស្តែង និងនាំយកទៅតម្កល់នៅឈាបនដ្ឋានវត្តគោកបញ្ជាន់រង់ចាំក្រែងមានសាច់ញាតិទៅទទួលយកធ្វើបុណ្យ៕
ចែករំលែកព័តមាននេះ