ប្រជាជនថៃចាត់ទុកព្រះចៅយូហួរ ជា«អាទិទេព» សូម្បីអ្នកប្រមាថឆ្កែរបស់ទ្រង់ក៏ត្រូវមានទោស
ស្រាវជ្រាវ ៖ យោងតាមលោក Nate Thayer អ្នកកាសែតសេរី និងធ្លាប់បានសំភាសន៍ផ្ទាល់ជាមួយ ប៉ុល ពត នៅក្នុងប្រទេសកម្ពុជាផងនោះ លោកបានសរសេរនៅលើ
ស្រាវជ្រាវ ៖ យោងតាមលោក Nate Thayer អ្នកកាសែតសេរី និងធ្លាប់បានសំភាសន៍ផ្ទាល់ជាមួយ ប៉ុល ពត នៅក្នុងប្រទេសកម្ពុជាផងនោះ លោកបានសរសេរនៅលើបណ្តាញសង្គមទំនាក់ទំនងហ្វេសប៊ុកកាលពីម៉ោង៤ និង៣១នាទីព្រឹកថ្ងៃទី១៤ តុលា ២០១៦ នេះថា ព្រះមហាក្សត្រថៃព្រះបាទ ភូមិបុល អាឌុលយ៉ាដេត (ព្រះចៅយូហួរ) បានសោយទិវង្គត នៅរសៀលថ្ងៃព្រហស្បត្តិ៍ ទី១៣ ខែតុលា ឆ្នាំ២០១៦ ហើយព្រះបរមរាជវាំងក៏បានប្រកាសថា ព្រះរាជាដែលត្រូវឡើងសោយរាជបន្តគឺ ព្រះបុត្រាស្នងរាជ្យ មហា វ៉ាជីរ៉ាឡុងកន Maha Vajiralongkorn ។
ទាំងព្រះបិតា និងព្រះរាជបុត្រា ត្រូវបានគេដឹងថា គឺជាអ្នកស្រឡាញ់ចូលចិត្តសត្វឆ្កែ ។ ប៉ុន្តែត្រូវចងចាំថា ការសរសេរពាក់ព័ន្ធនឹងសត្វឆ្កែរបស់ព្រះមហាក្សត្រ គឺជាទង្វើមួយដែលគ្រោះថ្នាក់នៅប្រទេសថៃ ។
រឿងរ៉ាវដំណើរដើមទង គឺវាដូច្នេះ ៖ កាលពីឆ្នាំ ១៩៩៨ ព្រះមហាក្សត្រថៃ ព្រះបាទ ភូមិបុល ទ្រង់បានយកឆ្កែដើរតាមផ្លូវមួយមកចិញ្ចឹម ហើយទ្រង់ប្រទាននាមឲ្យវាថា “តុងដែង” Tongdaeng។ ទ្រង់បានហៅសត្វឆ្កែញីនោះថា “ឆ្កែសាមញ្ញ ដែលមិនធម្មតា” និងនៅឆ្នាំ ២០០២ ទ្រង់បានសរសេរសៀវភៅមួយក្បាល ដែលលក់ដាច់បំផុតកាលនោះ អំពីសត្វឆ្កែរបស់ព្រះអង្គ ដែលមានចំណងជើងថា “សាច់រឿងរបស់តុងដែង” ។ ព្រះបាទ ភូមិបុល សរសេររៀបរាប់ថា “តុងដែង គឺជាឆ្កែដែលចេះគោរព និងចេះដឹងខុសត្រូវ ទាបខ្ពស់ ។ វាតែងតែអង្គុយទាបជាងស្តេចជានិច្ច ទោះបីជាពេលដែលស្តេចបីវាឡើងក៏ដោយ ។ វានឹងបន្ទាបខ្លួនទៅនឹងដី ហើយកំពិតត្រចៀកគោរពទ្រង់ ហាក់បីដូចជា វាចង់និយាយថា “ខ្ញុំមិនហ៊ានទេ ព្រះអង្គ” ។
អតីតអគ្គរដ្ឋទូតអាមេរិកនៅប្រទេសថៃ លោក Ralph Boyce បានកត់ត្រាទុកនៅកាលឆ្នាំ២០០៦ ថា ៖ “កំឡុងពេលក្នុងពិធីបរិភោគភោជនីយអាហារ ដែលបានរៀបចំដោយព្រះអង្គ ដើម្បីសម្តែងការគួរសមជាមួយ លោកអតីតប្រធានាធិបតី Bush កាលពីឆ្នាំ២០០៦ ទ្រង់បានបញ្ចេញឲ្យឃើញនូវព្រះចំណាប់អារម្មណ៍ លើសត្វចិញ្ចឹម ពេលសំណេះសំណាលដល់រឿងនេះ ។ ទ្រង់បានមានព្រះបន្ទូលជាច្រើនពាក់ព័ន្ធជាមួយនឹងសត្វឆ្កែ សំណព្វព្រះរាជហឬទ័យរបស់ទ្រង់ គឺ តុងដែង ។
សូមបញ្ជាក់ថា ការដែលនិយាយពាក់ព័ន្ធជាមួយនឹងសត្វឆ្កែរបស់ខ្សែរាជវង្ស ជាពិសេសទាក់ទងនឹង «តុងដែង» គឹត្រូវមានទោស ។ រឿងពិតជាក់ស្តែង បុរសម្នាក់ឈ្មោះ ថាណាខន ត្រូវបានជាប់ឃុំខ្លួនពីបទនិយាយប៉ះពាល់សត្វឆ្កែរបស់ព្រះរាជា ភូមិបុល ដែលសម្រេចចិត្តឲ្យជាប់គុក៣៧ឆ្នាំ ។
មិនថា ព្រះបាទ ភូមិបុល ទេ ដែលព្រះសព្វព្រះរាជហឬទ័យជាមួយសត្វឆ្កែ។ ព្រះរាជ្យបុត្រាគ្រង់រាជ្យ មហា វ៉ាជីរ៉ាឡុងកន ក៏សព្វព្រះរាជហឬទ័យ និងមានសត្វឆ្កែមួយដែរ ដែលមានឈ្មោះថា ហ្វ៊ូហ្វ៊ូ Foo-Foo។
កាលពីខែឧសភា ឆ្នាំ២០១៤ ព្រះរាជបុត្រមហា វ៉ាជីរ៉ាឡុងកន និងព្រះនាង ស្រីរស្ម៊ី បានត្រូវមហាជនឃើញតាមរយៈវីដេអូមួយ ដែលក្នុងនោះ ព្រះនាងបានប្រទានចំណីដល់សត្វឆ្កែ ហ្វ៊ូហ្វ៊ូ ក្នុងខណៈពេលដែលទ្រង់កំពុងស្លៀក ប៊ីគីនី នៅពិធីខួបកំណើត ក្នុងព្រះបរមរាជវាំង ។ «ហ្វ៊ូហ្វ៊ូ» ត្រូវបានព្រះរាជបុត្រតែងតាំងធ្វើជា សេនាប្រមុខទ័ពជើងអាកាស ។
សត្វឆ្កែដែលជាសេនាប្រមុខទ័ពជើងអាកាសនេះ បានងាប់(ស្លាប់) នៅអាយុ១៧ឆ្នាំ កាលពីឆ្នាំ២០១៥ ហើយសាកសពរបស់ ហ្វ៊ូហ្វ៊ូ ត្រូវបានគេធ្វើបុណ្យតាមព្រះពុទ្ធសាសនា អស់រយៈពេល៤ថ្ងៃ ដោយមាន ពិធីដុះលាងខ្លួន ពិធីពាក់ខោអាវថ្មីឲ្យ ពិធីសូត្រធម៌ទេសនា និងមានធ្វើមេនថែមទៀតផង ។
កាលឆ្នាំ២០១៥ លោកអតីតអគ្គរដ្ឋទូតអាមេរិកប្រចាំប្រទេសថៃ Ralph Boyce បានសរសេរថា “លោកបានចូលរួមពិធីជប់លៀងពេលល្ងាចមួយ ដែលពេលនោះក៏មាន សេនាប្រមុខទ័ពអាកាស ហ្វ៊ូហ្វ៊ូ ចូលរួមដែរ ។ ហ្វ៊ូហ្វ៊ូ មានវត្តមាន ក្នុងឈុតសំលៀកបំពាក់ផ្លូវការ ជាមួយនឹងស្រោមដៃពាក់ស្រោបលើក្រញ៉ាំជើង ។ ពេលនោះ ហ្វ៊ូហ្វ៊ូបានលួចផឹកស្រារបស់ភ្ញៀវ ” ។
ក្នុងពិធីជប់លៀងនោះ លោកអតីតអគ្គរដ្ឋទូត Ralph បានអង្គុយជិតព្រះនាង ស្រីរស្ម៊ី ហើយក៏សាកនិយាយលេងជាមួយព្រះនាងពីរឿងសត្វឆ្កែ។ លោកបានសរសេររៀបរាប់ថា “ខ្ញុំនិយាយពាក់ព័ន្ធជាមួយព្រះនាង សារីនដន (បុត្រីរបស់ព្រះរាជាភូមិបុល) ថា ព្រះនាងមានសត្វឆ្កែធំមួយ ហើយខ្ញុំក៏សួរព្រះនាង ស្រីរស្ម៊ីថា ស្គាល់ពូជសត្វឆ្កែដែរឬអត់ ។ តែព្រះនាងស្រីរស្ម៊ី ប្រែប្រួលឥរិយាបទភ្លាម ហើយមានបន្ទូលថា ព្រះនាងមិនបានជ្រាបពីរឿងរ៉ាវរបស់ព្រះនាង សារ៊ីនដនទេ ” ។
ព្រះអង្គម្ចាស់ មហា ចក្រី សារីនដន Maha Chakri Sirindhon ដែលគឺជាអ្នកស្រឡាញ់សត្វ ត្រូវបានប្រជាជនស្រឡាញ់និងចូលចិត្ត ហើយសង្ឃឹមថា ព្រះនាងនឺងឡើងគ្រងរាជ្យ តែការរំពឹងនេះត្រូវបានច្រានចោលដោយសារតែដឹងថា ព្រះរាជ្យបុត្រា មហា វ៉ាជីរ៉ាឡុងកន នឹងឡើងគ្រង់រាជ្យជំនួស ។
នៅក្នុងកាសែត Nation បានចុះផ្សាយថា ចៅរបស់សត្វឆ្កែតុងដែង ដែលព្រះរាជា ភូមិបុល សព្វព្រះរាហឬទ័យ ឈ្មោះថា Khun Kaonieow Mamuang បានឡើងសម្តែងនៅក្នុងពិធីសម្តែងរបស់សត្វចិញ្ចឹមលើកទី៦ នៅសួនច្បារមាត់ទន្លេ Nakhon Pathom ។ ទោះបីជាក្តៅបែកផ្សែងយ៉ាងណាក្តី ក៏សិស្សានុសិស្សនៅអង្គុយចាំមើលការសម្តែងរបស់ Khun Kaonieow Mamuang ដែរ ។ នៅក្នុងភាសាថៃ ពាក្យថា “ឃុន” មានន័យថា ឋានៈខ្ពស់ស្មើទៅនឹងអ្នកដែលគេនិយាយសំដៅទៅលើ ។
កាសែត Nation ក៏បានសរសេរបន្តថា ៖ “ជាមួយនឹងពាក្យសរសើរ និងលើកទឹកចិត្ត ចៅរបស់«តុងដែង» Khun Kaonieow Mamuang បានសម្តែងចេញក្បាច់ស្នៀតពិសេសៗ ជាច្រើនដូចជា ៖ រត់ អង្គុយ និង ត្រឡប់ខ្លួន ទៅតាមការបញ្ជារបស់អ្នកបង្ហាត់ ។ វាក៏បានឈរលើដប ហើយដើរលើខ្សែ តែអ្វីដែលកាន់តែពិសេសនោះគឺ ការលោតកាត់កងភ្លើងដោយជោគជ័យ” ។
ក្នុងអត្ថបទកាសែតនោះ ក៏បានសរសេរអំពីសត្វឆ្កែសំណព្វរបស់ព្រះរាជបុត្រាវិញម្តង គឺសេនាប្រមុខកងទ័ពជើងអាកាស «ហ្វ៊ូហ្វ៊ូ» ថា ហ្វ៊ូហ្វ៊ូ ក៏មានសមត្ថភាពសម្តែងគួរឲ្យទាក់ទាញដែរ ។
អស់ពីសរសេរអំពីចៅរបស់តុងដែង និងហ្វ៊ូហ្វ៊ូ រួចមក អ្នកកាសែតក៏បានសរសេរអំពីសមត្ថភាពពិសេសរបស់ កូនតុងដែង និងចៅតុងដែង ផងដែរ ថា៖ “នៅថ្ងៃនេះ (ថ្ងៃចុះផ្សាយកាសែត) គឺជាវេនសម្តែងរបស់ ប្អូនស្រីរបស់ Khun Kaonieow Mamuang ដែលមានឈ្មោះថា Khun Kaogriapwao ហើយនៅថ្ងៃស្អែកម៉ោង៣រសៀល នឹងត្រូវជាវេនសម្តែងរបស់ ចៅប្រុសរបស់តុងដែងមានឈ្មោះថា Khun Nilapatta ៕
ចែករំលែកព័តមាននេះ