រាជធានីភ្នំពេញ ៖ នៅទីបំផុត សម្តេចតេជោ ហ៊ុន សែន នាយករដ្ឋមន្ត្រី នារសៀលថ្ងៃទី២ ខែឧសភា ឆ្នាំ២០២២នេះ បានបញ្ចេញអត្តសញ្ញាណអនាគតចៅប្រសាស្រីដែលមានសម្រស់ផូរផង់ ហើយឈរជាប់នឹងចៅប្រុសបង្កើតរបស់សម្តេច នៅបណ្តាញសង្គមអ៊ីនស្តាក្រាម (IG) ផ្លូវការរបស់សម្តេចតេជោ ។
រូបថតមួយសន្លឹករបស់ចៅប្រុសមុខស្រស់ ខ្ពស់សង្ហាគ្រងឈុតអាវធំឈរជាប់នឹងក្មេងស្រីមុខស្រស់ច្រមុះស្រួច ថ្ពាល់ខួចសងខាង ហើយសម្តេចតេជោ ក៏បានសរសេរសារមួយឃ្លាយ៉ាងខ្លីដែលបង្កប់អត្ថន័យយ៉ាងជ្រាលជ្រៅថា «អនាគតចៅប្រសា ។ កុំព្យាយាមបំបែកក្មេង តែត្រូវណែនាំឱ្យពួកគេរៀនសូត្រ រហូតចប់មហាវិទ្យាល័យ ចាំរៀបការឱ្យ» ។
ក្រោយពីការបង្ហោះរូបភាពខាងលើ ក្នុងបណ្តាញសង្គម IG ក៏មានអ្នកគោរពស្រលាញ់សម្តេចតេជោ បញ្ចេញទស្សនៈជាច្រើន ដោយបងប្អូនខ្លះបាននិយាយពោលសរសើរទឹកចិត្តមេត្តាករុណារបស់សម្តេចនាយករដ្ឋមន្ត្រីថា «សម្តេចពុកពិតជាមានទឹកចិត្តមេត្តាករុណាណាស់» ។
សូមរម្លឹកថា សម្តេចតេជោ ហ៊ុន សែន បានប្រកាសនូវដំណឹងរីករាយក្នុងគ្រួសារអំពីអនាគតចៅប្រសាស្រីជាសាធារណៈ នាឱកាសសម្តេចអញ្ជើញទៅពិធីប្រកាសបិទយុទ្ធនាការចាក់វ៉ាក់សាំងបង្ការជំងឺកូវីដ-១៩ ជុំទី១ សម្រាប់ក្រុមអាយុចាប់ពី៦ឆ្នាំឡើង ក្នុងក្របខណ្ឌទូទាំងប្រទេស និងប្រកាសបើកយុទ្ធនាការចាក់វ៉ាក់សាំងបង្ការជំងឺកូវីដ-១៩ ជូនកុមារអាយុ៥ឆ្នាំ ដែលចាប់ផ្ដើមពីថ្ងៃច័ន្ទ ទី០១ ខែវិច្ឆិកា ឆ្នាំ២០២១ នៅវិមានសន្តិភាព រាជធានីភ្នំពេញ។
ចែករំលែកព័តមាននេះ