ខេត្តកណ្តាល ៖ នគរបាលស្រុកអង្គស្នួលសហការជាមួយកម្លាំងប្រឆាំងគ្រឿងញៀ.ននៃស្នងការដ្ឋានខេត្ត បានបង្ក្រាបជំនួញគ្រឿងញៀ.ន ដោយរកឃើញគ្រឿងញៀ.នមួយចំនួនធំ និងបានឃាត់ខ្លួនជនសង្ស័យ២នាក់ប្តី-ប្រពន្ធ ចំណែក៤នាក់ផ្សេងទៀតកំពុងគេចខ្លួន ។ ការបង្ក្រាបនេះបានធ្វើឡើងកាលពីថ្ងៃទី២៩ ខែមេសា ឆ្នាំ២០២២កន្លងទៅ នៅផ្លូវជាតិលេខ៤១ ស្ថិតក្នុងភូមិព្រៃចម្ការ ឃុំលំហាច ស្រុកអង្គស្នួល ។
នគរបាលស្រុកអង្គស្នួលបានឱ្យដឹងថា ជនសង្ស័យមានចំនួន៦នាក់ តែចាប់បានតែ២នាក់ដែលជាប្តីប្រពន្ធ ។ ដោយស្ត្រីជាប្រពន្ធឈ្មោះ មឿន សាវន ហៅម៉ី អាយុ២៥ឆ្នាំ មានទីលំនៅក្នុងភូមិព្រៃខ្វាវ ឃុំរកាកោះ ស្រុកគងពិសី ខេត្តកំពង់ស្ពឺ មុខរបរជាអ្នកលក់ផលិតផល និងប្តីឈ្មោះ ជន ដារ៉ា អាយុ៣០ឆ្នាំ មុខរបរមិនពិតប្រាកដ ។ ចំណែកជនសង្ស័យ៤នាក់ទៀត កំពុងរត់គេចខ្លួន ។
ប្រភពដដែលបន្តថា កម្លាំងនគរបាលការិយាល័យប្រឆាំងគ្រឿងញៀ.នខេត្ត រួមជាមួយកម្លាំងប្រឆាំងគ្រឿងញៀ.នស្រុកអង្គស្នួល និងកម្លាំងប៉ុស្តិ៍លំហាច បានទទួលព័ត៌មានថា មុខសញ្ញាកំពុងជួញដូរថ្នាំញៀ.ននៅតាមផ្លូវជាតិ៤១ ចំណុចភូមិ-ឃុំខាងលើ ។ ភ្លាមៗនោះ កម្លាំងសមត្ថកិច្ចទៅដល់ចំណុចខាងលើ ក៏ឃើញមុខសញ្ញា២នាក់កំពុងជិះម៉ូតូតាមផ្លូវ ។ ដោយមានការសង្ស័យ ក៏បានឃាត់សួរនាំ និងត្រួតពិនិត្យឆែកឆេររកឃើញមានថ្នាំញៀ.នចំនួន៣កញ្ចប់លាក់នៅក្នុងកូនកាបូបរបស់ឈ្មោះ មឿន សាវន ហៅម៉ី ។
ហើយបើតាមចម្លើយរបស់ស្ត្រីឈ្មោះ មឿន សាវន និងប្តីឈ្មោះ ជន ដារ៉ា គឺថ្នាំញៀ.ននេះខ្លួនទិញពីឈ្មោះ ស្រ៊ុន ឆេង ភេទប្រុស អាយុប្រហែល៣៩ឆ្នាំ និងឈ្មោះ ឡេង ចាន់ថង ភេទប្រុស អាយុ៣១ឆ្នាំ ស្នាក់នៅក្នុងអាហារដ្ឋានឫស្សីផ្អែមសាងស្នេហ៍ ស្ថិតក្នុងភូមិទូករទេះ ឃុំលំហាចស្រុកអង្គស្នួល ដើម្បីយកមកលក់បន្ត ។
ដោយមានបទបញ្ជាពីលោកស្នងការនគរបាលខេត្ត និងមានការសម្របសម្រួលឯកភាពពីឯកឧត្តម លាវ ស្រេង ព្រះរាជអាជ្ញាអមសាលាដំបូងខេត្ត កម្លាំងសមត្ថកិច្ចក៏បានធ្វើការឆែកឆេរនៅក្នុងអាហារដ្ឋានឫស្សីផ្អែមសាងស្នេហ៍ ដែលជនសង្ស័យរត់គេចខ្លួនដេកស្នាក់នៅ ស្ថិតក្នុងភូមិទូករទេះ ឃុំលំហាច ស្រុកអង្គស្នួល ។
ជាលទ្ធផល រកឃើញមានម្សៅក្រាមសថ្លាសង្ស័យជាសារធាតុញៀ.នចំនួន៤កញ្ចប់ ម៉ូតូ៤គ្រឿង អាយកូម២គ្រឿង កាមេរ៉ាសុវតិ្ថភាព ព្រមទាំងឯកសារពាក់ពន្វ័មួយចំនួនទៀត ។ លុះនៅថ្ងៃទី៣០ ខែមេសា វេលាម៉ោង១១និង៥០នាទី
ព្រឹក ដោយមានបទបញ្ជាពីឯកឩត្តមព្រះរាជអាជ្ញាអមសាលាដំបូងខេត្ត ក៏បានបិទអាហារដ្ឋានឫស្សីផ្អែមសាងស្នេហ៍ ។
ចំណែកជនសង្ស័យទាំង២នាក់ប្តីប្រពន្ធ រួមជាមួយវត្ថុតាង ត្រូវបានបញ្ជូនទៅអធិការដ្ឋាននគរបាលស្រុកដើម្បីសាកសួរបន្ត និងកសាងសំណុំរឿងបញ្ជូនទៅសាលាដំបូង ៕
ចែករំលែកព័តមាននេះ