ជំងឺបេះដូងគឺជាមូលហេតុទី១នៃការស្លាប់នៅសហរដ្ឋអាមេរិក នេះបើយោងតាមសមាគមបេះដូងរបស់អាមេរិក ។ ដោយសារហេតុផលនេះ ការស្វែងរកមធ្យោបាយដើម្បីលើកកម្ពស់សុខភាពបេះដូងឲ្យបានល្អប្រសើរជាងមុនគឺជាការចាំបាច់ ។ ខាងក្រោមនេះជាវិធីងាយស្រួលមួយចំនួនក្នុងការកាត់បន្ថយហានិភ័យនៃជំងឺបេះដូង ៖
១-បំបាត់នូវទម្លាប់អាក្រក់ ៖ យោងតាមគេហទំព័រ Mayo Clinic សកម្មភាពដ៏គ្រោះថ្នាក់បំផុតទាក់ទងទៅនឹងសុខភាពបេះដូងគឺការជក់បារី ។ បារីនិងផលិតផលផ្សេងទៀតជាច្រើនមិនត្រឹមតែអាចបំផ្លាញសរសៃឈាម និងបេះដូងរបស់អ្នកនោះទេ សារជាតិកាបូនម៉ូណូអុកស៊ីតនៅក្នុងផ្សែងបារីក៏អាចនាំឱ្យសម្ពាធឈាមកើនឡើងផងដែរ ។ ជាលទ្ធផល បេះដូងរបស់អ្នកនឹងធ្វើការកាន់តែខ្លាំងឡើង ។ ផ្សែងបារីក្នុងកម្រិតណាក៏ដោយក៏មានបញ្ហាដល់សុខភាពដែរ សូម្បីតែការជក់បារីមិនទៀងទាត់ក៏មិនល្អសម្រាប់សុខភាពបេះដូងរបស់អ្នកដូចគ្នា ។
២-ធ្វើលំហាត់ប្រាណឱ្យបានទៀងទាត់ ៖ ការធ្វើលំហាត់ប្រាណធ្វើឲ្យរាងកាយរបស់អ្នករឹងមាំ និងកាត់បន្ថយហានិភ័យនៃជំងឺផ្សេងៗដូចជា ការកើនកូឡេស្តេរ៉ុល ឬជំងឺទឹកនោមផ្អែម ។ ការធ្វើលំហាត់ប្រាណរយៈពេល៣០នាទីក្នុងមួយថ្ងៃគ្រប់គ្រាន់ដើម្បីធ្វើឲ្យរាងកាយរបស់អ្នកមានសុខភាពល្អ ជាពិសេសសកម្មភាពហាត់ប្រាណដូចជាការដើរ ឬការរត់សុទ្ធតែជាប្រយោជន៍ទាំងអស់ ។ គេហទំព័រ Mayo Clinic បានរកឃើញថា ការធ្វើលំហាត់ប្រាណមិនថាក្នុងរូបភាពបែបណា សុទ្ធតែអាចជំរុញសុខភាពបេះដូង ហើយការចាប់ផ្តើមបន្តិចម្តងៗគឺជាវិធីធ្វើឲ្យរបៀបរស់នៅរបស់អ្នកកាន់តែសកម្មបន្ថែមទៀត ។
៣-ទទួលទានរបបអាហារឱ្យបានត្រឹមត្រឹវ ល្អចំពោះសុខភាពបេះដូង ៖ ដើម្បីទទួលបានសុខភាពបេះដូងល្អតម្រូវឱ្យមានការផ្លាស់ប្តូររបៀបរស់នៅដ៏លំបាក ប៉ុន្តែការផ្លាស់ប្តូររបបអាហារដែលល្អចំពោះសុខភាពបេះដូងគឺជាឱកាសក្នុងការភ្លក្សអាហារថ្មីៗ ។ សាច់ក្រហម និងអាហារកែច្នៃមានផលប៉ះពាល់យ៉ាងខ្លាំងចំពោះសុខុមាលភាពបេះដូង ប៉ុន្តែផ្លែឈើ បន្លែ និងធាតុផ្សេងៗទៀតអាចកាត់បន្ថយកម្រិតកូឡេស្តេរ៉ុល ឬសម្ពាធឈាមរបស់អ្នក ។
សមាគមបេះដូងរបស់អាមេរិក បានណែនាំឲ្យពលរដ្ឋយល់ដឹងអំពីស្លាកសញ្ញាអាហារូបត្ថម្ភ និងជៀសវាងសារធាតុខ្លាញ់ខ្ពស់ ជាតិខ្លាញ់គីមី និងសូដ្យូម ។ ផលិតផលធ្វើឡើងពីទឹកដោះគោមានជាតិខ្លាញ់ទាប និងផលិតផលបសុបក្សីគឺជាជម្រើសល្អក្នុងការពិចារណាសម្រាប់អ្នកដែលមិនចង់មានបញ្ហាបេះដូង ។ ទន្ទឹមនឹងនេះ អាហារល្អចំពោះសុខភាពបេះដូចជា ត្រី សណ្តែក គ្រាប់ធញ្ញជាតិ ផ្លែឈើ និងបន្លែគឺល្អបំផុតសម្រាប់សុខភាពទូទៅរបស់អ្នក ។
៤-បន្ថយភាពតានតឹងនិងជំងឺថប់អារម្មណ៍ ៖ ក្នុងជីវិតរបស់អ្នក វាអាចជាការផ្លាស់ប្តូររបៀបរស់ដ៏លំបាក ប៉ុន្តែវាមានសារៈសំខាន់ណាស់ចំពោះសុខភាពសរសៃឈាមបេះដូង។ ជាញឹកញាប់មនុស្សតែងតែដោះស្រាយបញ្ហាទាក់ទងនឹងភាពតានតឹងដោយការបរិភោគលើសកំណត់ ឬគិតអវិជ្ជមាន ដែលអាចនាំឱ្យមានបញ្ហាសុខភាព ។
ការធ្វើលំហាត់ប្រាណអាចជាវិធីដ៏មានប្រសិទ្ធភាពក្នុងការកាត់បន្ថយអារម្មណ៍អវិជ្ជាន ខណៈដែលសកម្មភាពដូចជាការតាំងសមាធិ ឬយូហ្គាក៏មានប្រយោជន៍ផងដែរ ។ ដូច្នេះការបន្ថយអារម្មណ៍ពីភាពតានតឹងប្រចាំថ្ងៃគួរតែព្យាយាមឱ្យកើតមាន ។
៥-សម្រកទម្ងន់ ៖ ការរក្សាទម្ងន់ដែលល្អចំពោះសុខភាពគឺជាជំហានសំខាន់មួយទៀតក្នុងការលើកកម្ពស់សុខភាពបេះដូង និងបន្ថយការប្រឈមនឹងគ្រោះថ្នាក់នៃជំងឺបេះដូង។ ខ្លាញ់ដ៏ច្រើននៅក្នុងខ្លួនអាចនាំឱ្យមានការកើនឡើងសម្ពាធឈាម និងជាតិកូឡេស្តេរ៉ុល ដែលធ្វើឱ្យបេះដូងរបស់អ្នកបំពេញតួនាទីរបស់វាកាន់តែលំបាកឡើង ៕
ចែករំលែកព័តមាននេះ