ស្រាវជ្រាវ ៖ មន្ត្រីស្ថិតិរបស់ប្រទេសភូមា បង្ហើបឱ្យដឹងថា ចំនួនភ្ញៀវទេសចរធ្វើដំណើរទស្សនកិច្ចនៅភូមាកើនលើស២០% ក្នុងអំឡុងខែមករា ឆ្នាំ២០១១និងក្នុងអំឡុងពេលមុននេះមានការបញ្ជាក់ថា ចំនួនភ្ញៀវទេសចរបានកើនឡើងជាបន្តបន្ទាប់នៅក្នុងឆ្នាំ២០១០ កន្លងទៅ ។
ក្រសួងទេសចរណ៍ និងសណ្ឋាគារប្រទេសភូមា បញ្ជាក់ថា ភ្ញៀវទេសចរចំនួន៣៥.៩៦៥នាក់ បានធ្វើដំណើរឆ្លងកាត់ក្រុងរ៉ង់ហ្គូន ជារាជធានីបុរាណរបស់ភូមានៅក្នុងខែមករា ឆ្នាំ២០១១ ដោយកើនលើសពី២១,៤៣% ពីចំនួន២៩.៦១៨នាក់ ក្នុងខែមករា ២០១០ ចាត់ទុកថា ជាការកើនឡើងបន្តបន្ទាប់គ្នាជាលើកទី៣ ខណៈដែលនៅខែមករា ឆ្នាំ២០០៩ មានភ្ញៀវទេសចរត្រឹមតែ១៩.០៩៤នាក់ ។ ក្រសួងទេសចរណ៍បានបន្តថា ភ្ញៀវទេសចរដែលធ្វើដំណើរដោយផ្ទាល់ខ្លួនមិនឆ្លងកាត់តំណាង មានចំនួនច្រើនដល់ទៅ២៤.០២៤នាក់ កើនឡើងប្រហែល៤៧,៧% ពីខែមករា ឆ្នាំ២០១០។ ក្រៅពីនេះភ្ញៀវទេសចរច្រើនជាង៥៤% មកពីទ្វីបអាស៊ី ដោយភាគច្រើនមកពីប្រទេសថៃ ចំនួន៥.៧៣៧នាក់ និងកូរ៉េខាងត្បូងចំនួន២.៦០៨នាក់ ខណៈដែលប្រទេសបារាំង គឺជាអ្នកនាំមុខក្នុងក្រុមប្រទេសពីតំបន់អឺរ៉ុប មានចំនួន២.៧៧១នាក់ បន្ទាប់មកប្រទេសអាល្លឺម៉ង់១.៩៣៦នាក់ និងអង់គ្លេសមានចំនួន១.២២៥នាក់ ។
ចំណែកតំណាងមកពីឧស្សាហកម្មទេសចរណ៍រមែងផ្តោតទៅលើក្តីសង្ឃឹមថា ចំនួនភ្ញៀវទេសចរដែលធ្វើដំណើរដោយផ្ទាល់ខ្លួននឹងនៅមានការកើនឡើង ។ នាយកក្រុមហ៊ុន «វ៉ាន់ដឺហ្វូល ហ្គោលឌែន អ៊ែន ត្រាវែល» បញ្ជាក់ថា ភ្ញៀវទេសចរដែលធ្វើដំណើរដោយផ្ទាល់ខ្លួនទៅក្នុងប្រទេសភូមា ភាគច្រើនមកពីប្រទេសនៅតំបន់អឺរ៉ុប ជាពិសេសពីប្រទេសបារាំង អាល្លឺម៉ង់ និងអ៊ីតាលី ហើយក៏សង្ឃឹមថា នឹងបានឃើញភ្ញឿវទេសចរក្រុមប្រភេទនេះ មកពីប្រទេសអេស្ប៉ាញ កើនឡើងក្នុងអំឡុងពេលមានព្យុះបោកបក់ដែរ។
ចំណែកភ្ញៀវទេសចរដែលធ្វើដំណើរដោយក្រុមហ៊ុនទេសចរណ៍ ធ្លាក់ចុះយ៉ាងច្រើននៅសល់ត្រឹមតែ៨៥៦នាក់ ធៀបនឹងខែមករា ២០១០ ដែលមានចំនួនដល់ទៅ៤.០៤៨នាក់ ។ រីឯអ្នកធ្វើដំណើរទស្សនកិច្ចនៅប្រទេសភូមា ដោយទិដ្ឋាការជំនួញ និងទិដ្ឋាការការងារសង្គម កើនឡើងប្រហែល៤២,៥% និង៩,៨% ៕
ចែករំលែកព័តមាននេះ