ខេត្តមណ្ឌលគិរី ៖ បច្ចុប្បន្ន នៅខេត្តមណ្ឌលគិរីមានក្រុមហ៊ុនចំនួន២ បានមកវិនិយោគលើវិស័យរ៉ែក្នុងស្រុកកែវសីមា ក្នុងនោះ គឺក្រុមហ៊ុនរ៉េនីហ្សង់ និងក្រុមហ៊ុនរ៉ុងឆេង ។ ក្រុមហ៊ុនទាំង២នេះ…
ខេត្តមណ្ឌលគិរី ៖ បច្ចុប្បន្ន នៅខេត្តមណ្ឌលគិរីមានក្រុមហ៊ុនចំនួន២ បានមកវិនិយោគលើវិស័យរ៉ែក្នុងស្រុកកែវសីមា ក្នុងនោះ គឺក្រុមហ៊ុនរ៉េនីហ្សង់ និងក្រុមហ៊ុនរ៉ុងឆេង ។ ក្រុមហ៊ុនទាំង២នេះ គឺសុទ្ធតែវិនិយោគលើអាជីវកម្មរ៉ែមាស ហើយក្រុមហ៊ុនរ៉ុងឆេង មិនទាន់បានដំណើរអាជីវកម្មនោះទេ ដោយកំពុងរៀបចំហេដ្ឋារចនាសម្ព័ន្ធ និងអគាររដ្ឋបាល ដូចនេះ មានតែក្រុមហ៊ុនរ៉េនីហ្សង់មួយប៉ុណ្ណោះ ដែលកំពុងដំណើរអាជីវកម្មចម្រាញ់រ៉ែមាស ។
លោក សាន់ ដារិទ្ធិ ប្រធានមន្ទីររ៉ែ និងថាមពលខេត្តមណ្ឌលគិរីបានឲ្យដឹងថា ដើម្បីអភិវឌ្ឍន៍វិស័យរ៉ែនៅខេត្តមណ្ឌលគិរីថ្មីៗនេះ មានក្រុមហ៊ុនចំនួន២ បានចុះមកពិនិត្យនិងធ្វើបុរេសេនានៅស្រុកកែវសីមា ផ្ដោតទៅលើរ៉ែមាស ។ ប្រធានមន្ទីរបន្តថា ក្រុមហ៊ុនរ៉េនីហ្សង់បានចាប់ផ្ដើមធ្វើអាជីវកម្មរ៉ែមាស ក្នុងអំឡុងខែមិថុនា ឆ្នាំ២០២១ រហូតដល់ដល់នេះ និងអាចចម្រាញ់រ៉ែមាសបានចន្លោះពី៦០គីឡូក្រាម ទៅ៨០គីឡូក្រាម ក្នុង១ខែ ហើយករណីពិសេសអាចផលិតបាន១០០គីឡូក្រាមក្នុង១ខែក៏មាន ដោយសរុបរយៈពេលជិត១ឆ្នាំមកនេះ ក្រុមហ៊ុនរ៉េនីហ្សង់ចម្រាញ់មាសបានប្រមាណ២តោន៧០គីឡូក្រាម ។
លោក សាន់ ដារិទ្ធិ បញ្ជាក់ថា ទៅលើការអភិឌ្ឍន៍វិស័យរ៉ែក្នុងខេត្តមណ្ឌលគិរី ក៏បានជួបប្រទះនិងការលំបាកខ្លះ ដោយខ្វះមន្ត្រីដើម្បីចុះពិនិត្យតាមក្រុមហ៊ុនធ្វើអាជីវកម្ម និងបង្ក្រាបបទល្មើសឲ្យទាន់ពេលវេលា ប៉ុន្តែចំណុចនេះមិនអាចបន្ទោសរាជរដ្ឋាភិបាលបានទេ ព្រោះប្រទេសកម្ពុជាបានជួបវិបត្តិកូវីដ១៩កន្លងមក ដោយរាជរដ្ឋាភិបាលក៏ត្រូវកាត់បន្ថយការចំណាយ ការជ្រើសរើសបុគ្គលិក ។
លោកក៏បានអំពាវនាវឲ្យដៃគូវិនិយោគទាំងក្នុងនិងក្រៅប្រទេស គួរចូលមកពិនិត្យសិក្សាធ្វើអាជីវកម្មនៅខេត្តមណ្ឌលគិរី ព្រោះមណ្ឌលគិរីសំបូរធនធានធម្មជាតិជាច្រើន ពិសេស គឺធនធានរ៉ែតែម្ដង ហើយរាជរដ្ឋាភិបាល ក៏បាននិងកំពុងគិតគូរបញ្ជូនក្រុមហ៊ុនចំនួន០៤ មកសិក្សាវិនិយោគលើវិស័យរ៉ែនៅខេត្តមណ្ឌលគិរីបន្ថែមទៀតផងដែរ ៕
ចែករំលែកព័តមាននេះ