លោក សេង រិទ្ធី ប្រធានក្រុមប្រឹក្សាជំនុំជម្រះសាលាដំបូងរាជធានីភ្នំពេញ កាលពីថ្ងៃទី២៥ ខែមេសា ឆ្នាំ២០២២នេះ បានប្រកាសសាលក្រមផ្តន្ទាទោសលើសំណុំរឿងជនជាតិរុស្ស៊ីចំនួន២នាក់ និងស្ត្រីជនជាតិអ៊ុយក្រែន
រាជធានីភ្នំពេញ ៖ លោក សេង រិទ្ធី ប្រធានក្រុមប្រឹក្សាជំនុំជម្រះសាលាដំបូងរាជធានីភ្នំពេញ កាលពីថ្ងៃទី២៥ ខែមេសា ឆ្នាំ២០២២នេះ បានប្រកាសសាលក្រមផ្តន្ទាទោសលើសំណុំរឿងជនជាតិរុស្ស៊ីចំនួន២នាក់ និងស្ត្រីជនជាតិអ៊ុយក្រែនម្នាក់ ពាក់ព័ន្ធករណីលួចផលិត ដឹកជញ្ជូន និងជួញដូរគ្រឿងញៀ.នដោយខុសច្បាប់ នៅក្នុងប្រទេកម្ពុជាប្រមាណជាង២០គីឡូក្រាម ។
សាលក្រមផ្តន្ទាទោសជនជាប់ចោទ ៖ ១- ឈ្មោះ EVGENY KARAS ភេទប្រុស អាយុ៣២ឆ្នាំ ជនជាតិរុស្ស៊ី ដាក់ពន្ធនាគារកំណត់៣០ឆ្នាំ, ២- ផ្តន្ទាទោសឈ្មោះ DMITRIY KARAS ភេទប្រុស អាយុ៣០ឆ្នាំ ជនជាតិរុស្ស៊ី ដាក់ពន្ធនាគារកំណត់៣០ឆ្នាំ និងពិន័យជាប្រាក់ចូលថវិការដ្ឋម្នាក់ៗ៦០លានរៀល ។ និង៣- ផ្តន្ទាទោសឈ្មោះ BONDAR BNKO KARYNA ភេទស្រី អាយុ២១ឆ្នាំ ជនជាតិអ៊ុយក្រែន ដាក់ពន្ធនាគារកំណត់២៥ឆ្នាំ និងពិន័យជាប្រាក់ចូលថវិការដ្ឋចំនួន៤០លានរៀល ។
ជនជាប់ចោទទាំង៣នាក់ខាងលើនេះ ត្រូវបានលោក សាយ ណូរ៉ា ព្រះរាជអាជ្ញារងនៃអយ្យការអរសាលាដំបូងរាជធានីភ្នំពេញ ធ្វើការចោទពីបទ.ផលិត ដឹកជញ្ជូន និងជួញដូរដោយខុសច្បាប់នូវសារធាតុញៀ.ន ដែលប្រព្រឹត្តនៅរាជធានីភ្នំពេញ កាលពីឆ្នាំ២០១៧ រហូតដល់ថ្ងៃទី១៥ ខែកញ្ញា ឆ្នាំ២០២០ ដែលល្មើសនេះមានចែងតាមបញ្ញតិមាត្រា៤៧ មាត្រា៤២ និងមាត្រា៤៨ នៃច្បាប់ស្តីពីការត្រួតពិនិត្យគ្រឿងញៀ.ន ។
សំណុំរឿងនេះ ត្រូវបានសាលាដំបូងលើកយកមកបើកសវនាការសាកសួរដេញដោល កាលពីថ្ងៃទី២២ ខែមីនា រួចបានកំណត់យកថ្ងៃទី២៥ ខែមេសា ឆ្នាំ២០២២ ដើម្បីប្រកាសសាលក្រមផ្តន្ទាទោសលើជនជាប់ចោទទាំង៣នាក់ខាងលើនេះ ។
សូមរម្លឹកថា កាលពីថ្ងៃទី២១ ខែកញ្ញា ឆ្នាំ២០២០ កម្លាំងសមត្ថកិច្ចនគរបាលនាយកដ្ឋានសន្តិសុខផ្ទៃក្នុងក្រសួងមហាផ្ទៃ បានចុះបង្ក្រាបករណីផលិត ដឹកជញ្ជូន ជួញដូរដោយខុសច្បាប់នូវសារធាតុញៀ.នដោយទ្រង់ទ្រាយធំមួយករណី ដែលមានទីតាំងស្ថិតនៅសង្កាត់ចោមចៅ២ ខណ្ឌពោធិ៍សែនជ័យ រាជធានីភ្នំពេញ ដោយមានការរឹបអូសថ្នាំញៀ.នប្រមាណជាង២០គីឡូក្រាម ដែលជនសង្ស័យបានបង្កប់លាក់ក្នុងកញ្ចប់បញ្ញើ ក្នុងគោលបំណងផ្ញើចេញទៅក្រៅប្រទេស តាមរយៈក្រុមហ៊ុនមួយ ទិសដៅទៅកាន់អង់គ្លេស និងប្រទេសក្រិច តែត្រូវបានសមត្ថកិច្ចកម្ពុជា បង្ក្រាប និងទប់ស្កាត់ទាន់ពេលវេលា ៕
ចែករំលែកព័តមាននេះ