ដំរីព្រៃមួយហ្វូង ចេញមករកចំណីជិតចម្ការអ្នកភូមិ
- មណ្ឌលគិរី
ខេត្តមណ្ឌលគិរី ៖ លោក ហាន សាខន នាយកដែនជម្រកការពារសត្វព្រៃកែសីមា បានឲ្យដឹងថា ហ្វូងដំរីព្រៃមួយ
ខេត្តមណ្ឌលគិរី ៖ លោក ហាន សាខន នាយកដែនជម្រកការពារសត្វព្រៃកែសីមា បានឲ្យដឹងថា ហ្វូងដំរីព្រៃមួយក្រុមមានធំនិងកូនតូចៗ៣ក្បាល ដាច់ពីហ្វូងធំ បានចេញមករកចំណីឬផឹកទឹកនៅជិតចំការរបស់ប្រជាពលរដ្ឋក្នុងភូមិអូរអាម ឃុំស្រែខ្ទុម ស្រុកកែវសីមា កាលពីព្រឹកថ្ងៃទី ២៣ ខែមេសា ឆ្នាំ២០២២។
លោក ហ៊ន សាខន បន្តថា ហ្វូងដំរីព្រៃនេះ បានបង្ហាញខ្លួន តែពួកវាមិនបានបង្កឲ្យមនុស្សណាម្នាក់ភ័.យខ្លា.ច ឬរងរបួសនោះទេ ប៉ុន្តែដំរីព្រៃដែលមានទាំងញីទាំងឈ្មោលតូចធំទាំងនេះ វាបាននាំគ្នាស៊ីចេក ដំឡូង ដូងរបស់ប្រជាពលរដ្ឋនៅតាមចម្ការមួយចំនួន។ ពលរដ្ឋខ្លះ បានប្រើប្រាស់មធ្យោបាយផ្សេងៗ ដើម្បីរំខានដំរី ដូចជាការធ្វើក្តារដាំដែកគោលដាក់តាមផ្លូវ ដើម្បីកុំឱ្យដំរីចូលស៊ីដំណាំរបស់ខ្លួនជាដើម។ ការសាងសង់ហេដ្ឋរចនាសម្ព័ន្ធ ផ្ទះសម្បែង និងការដាំដំណាំ នៅតាមច្រករបៀង ដែលសត្វដំរី ឆ្លងកាត់ ក៏ជាបញ្ហាមួយចោទផងដែរ។
កន្លងមកក្រសួងបរិស្ថានបានឲ្យដឹងថា នៅប្រទេសកម្ពុជា សត្វដំរីព្រៃ មានចន្លោះពី៤០០ ទៅ៦០០ក្បាល ដែលកំពុងរស់នៅក្នុងតំបន់ការពារធម្មជាតិ ក្នុងប្រទេសកម្ពុជា។ ក្នុងនោះ នៅភូមិភាគឦសាន ដែលរួមមានខេត្តមណ្ឌលគិរី និងរតនគិរី គឺសំបូរដោយសត្វដំរីព្រៃ ។ យោងតាមការសិក្សាស្រាវជ្រាវរបស់អ្នកជំនាញ ក្នុងរយៈពេល ៦០ ទៅ៧០ឆ្នាំចុងក្រោយនេះ ចំនួនដំរីអាស៊ី នៅលើពិភពលោក បានថយចុះប្រហែលជា៥០ភាគរយ។
ក្រសួងបរិស្ថាន បានកត់សម្គាល់ឃើញថា ជម្លោះរវាងមនុស្ស និងសត្វដំរីព្រៃបានកើតឡើង នៅតាមតំបន់ការពារធម្មជាតិមួយចំនួន ដោយសារតែការផ្លាស់ទីទាំងចម្ងាយឆ្ងាយ និងចម្ងាយជិតតាមរដូវកាល និងការស្វែងរកចំណី អាចរងការរំខាន ដោយសារតែវត្តមានរបស់មនុស្ស នៅក្នុងតំបន់ដែនជម្រករបស់ពួកវា និងលើសពីនេះ ដំរីព្រៃ អាចទទួលរងការវាយតបពីសំណាក់ប្រជាជន រហូតដល់រងរបួស ឬឈានដល់ការសម្លា.ប់ ជាការសងសឹកនឹងដំរីព្រៃ ដែលបានចូលមកស៊ីដំណាំរបស់ពួកគេ។
កម្រិតនៃការបរបា.ញ់សត្វដំរីព្រៃ ត្រូវបានកត់សម្គាល់ឃើញថា មានការធ្លាក់ចុះខ្លាំង ស្ទើរតែគ្មាន ក្នុងរយៈពេលជាង ១០ឆ្នាំមកនេះ ដោយសារតែអាជ្ញាធរមានសមត្ថកិច្ច ពង្រឹងការអនុវត្តច្បាប់បានយ៉ាងល្អ ខណៈកាលពីជាង ៣០ឆ្នាំមុន ការបរបា.ញ់បានសម្លា.ប់សត្វដំរីព្រៃអស់ជាច្រើនក្បាល។
នៅក្នុងប្រទេសកម្ពុជា បច្ចុប្បន្ននេះ ដំរីអាស៊ី មានចំនួនប្រមាណចន្លោះពី ៤០០ ទៅ៦០០ក្បាល ដែលភាគច្រើនរស់នៅក្នុងតំបន់ជួរភ្នំក្រវាញ តំបន់ខ្ពង់រាបខាងជើងទន្លេសាប និងតំបន់ខ្ពង់រាបភាគខាងកើត ក្នុងខេត្តមណ្ឌលគិរី ដែលជាតំបន់ជីវៈចម្រុះដ៏សំបូរបែប ប្រព័ន្ធអេកូទ្បូស៊ី និងមានទីជម្រាលអំណោយផលដល់ការរស់នៅរបស់សត្វដំរី និងសត្វព្រៃផ្សេងៗទៀត ។ ចំណែកដំរីស្រុក ត្រូវបានប៉ាន់ស្មានថា មានចំនួន៧១ក្បាល៕
ចែករំលែកព័តមាននេះ