ជាងដែកម្នាក់លើកដែកប៉ះខ្សែកាបភ្លើង បណ្ដាលឲ្យឆក់រងរបួសធ្ងន់
រាជធានីភ្នំពេញ ៖ បុរសជាជាងដែកម្នាក់បានរងរបួសយ៉ាងធ្ងន់ធ្ងរ ខណៈដែលគាត់ លើកដែកផ្សារដំបូល សំណង់យានដ្ឋានជួសជុលរថយន្ត មួយកន្លែងហើយខ្វះការប្រុងប្រយ័ត្ន
រាជធានីភ្នំពេញ ៖ បុរសជាជាងដែកម្នាក់បានរងរបួសយ៉ាងធ្ងន់ធ្ងរ ខណៈដែលគាត់ លើកដែកផ្សារដំបូល សំណង់យានដ្ឋានជួសជុលរថយន្ត មួយកន្លែងហើយខ្វះការប្រុងប្រយ័ត្ន បានធ្វើឲ្យដែកនោះប៉ះទៅនឹងខ្សែ កាបភ្លើងដែលស្ថិតនៅក្បែរនោះ បណ្ដាលឲ្យឆក់ដួលសន្លប់ និងឆេះពេញខ្លួន ហើយភ្លាមៗនោះត្រូវបាន មិត្តភក្ដិរួមការងារ និងប្រជាពលរដ្ឋដែលស្ថិតនៅក្បែរនោះ នាំគ្នាជួយសង្គ្រោះបឋម ដោយយកកប់នៅក្នុងដីខ្សាច់ និងដងទឹកចាក់ស្រោចពីលើ រហូតគាត់ដឹងខ្លួនឡើងវិញ។
រួចទើបហៅរថយន្តសង្គ្រោះបន្ទាន់ អង្គភាព៧១១ ដឹកទៅកាន់មន្ទីរពេទ្យ ដើម្បីសង្គ្រោះបន្ទាន់ភ្លាមៗដែរ។ ស្ថិតនៅតាមបណ្ដោយផ្លូវជាតិលេខ៣ ក្នុងភូមិព្រកី(ខ) សង្កាត់ពងទឹក ខណ្ឌដង្កោ រាជធានីភ្នំពេញ ហេតុការណ៍នោះបានកើតឡើង កាលពីវេលាម៉ោង២ និង១៥នាទីរសៀល ថ្ងៃទី២៧ ខែកញ្ញា ឆ្នាំ២០១៦ ជនរងគ្រោះខាងលើនោះឈ្មោះ ដា អាយុ ប្រហែលជាង៣០ឆ្នាំ មានទីលំនៅក្នុងខេត្តកំពង់ស្ពឺ និងស្នាក់នៅកន្លែងកើតហេតុខាងលើ មានមុខរបរជាជាងផ្សារដែក ទើបមកធ្វើការងារនៅទីនោះបានរយៈពេលពីថ្ងៃប៉ុណ្ណោះ។
តាមប្រភពព័ត៌មានបានឲ្យដឹងថា នៅមុនពេលកើតហេតុខាងលើ បុរសរងគ្រោះរូបនោះ បានលើកដែកដាក់លើដំបូលសំណង់អាគារយានដ្ឋានជួសជុលរថយន្តនោះ ដែលកំពុងសាងសង់ ហើយភ្លេចខ្លួនតែបន្តិចប៉ុណ្ណោះ បានប៉ះខ្សែកាបភ្លើងបណ្ដាលឲ្យឆក់ដួលសន្លប់ស្ដូកស្ដឹង។ ភ្លាមៗនោះត្រូវបានមិត្តភក្ដិរួមការងារ និងប្រជាពលរដ្ឋនាំគ្នា ជួយសង្គ្រោះបឋមដោយយកកប់នៅក្នុងខ្សាច់ រហូតបានដឹងខ្លួនឡើងវិញ ទើបហៅរថយន្តសង្គ្រោះអង្គភាព៧១១ ដឹកយកទៅសង្គ្រោះបន្ទាន់ភ្លាមៗតែម្ដង៕
ចែករំលែកព័តមាននេះ