ខេត្តកំពត ៖ កាលពីព្រឹកថ្ងៃទី២៦ វិច្ឆិកា សមត្ថកិច្ចចំរុះប្រមាណ៣៣នាក់បានទៅពិនិត្យមើលទីតាំងស្តុកឈើគ្រញូង និងឈើមូលច្រើនម៉ែត្រគូបរបស់ក្រុមហ៊ុនមួយដែលសមត្ថកិច្ចសង្ស័យថា អាចធ្លាយចេញនៅពេលយប់ទៅស្រុកយួន។ លោកវរសេនីយ៍ឯក សឿន ផល្លា អនុប្រធាននាយកដ្ឋាននគរបាលប្រឆាំងបទល្មើសសេដ្ឋកិច្ច ក្រសួងមហាផ្ទៃបានដឹកនាំកំលាំងប៉ូលិសក្រសួងមហាផ្ទៃចំនួន១៨នាក់ រួមទាំងប៉ូលិសសេដ្ឋកិច្ចខេត្តចំនួន៥នាក់ និងកំលាំងកងរាជអាវុធហត្ថខេត្ត១០នាក់ដឹកនាំដោយលោកវរសេនីយ៍ឯក សៀក អាង ក្នុងនោះក៏មានវត្តមានលោកសៀង សុខ ព្រះរាជអាជ្ញារងសាលាដំបូងផងដែរ។
លោកវរសេនីយ៍ទោ ឡុង ស្រេង នាយការិយាល័យសរុបនាយកដ្ឋានប្រឆាំងបទល្មើសសេដ្ឋកិច្ចមានប្រសាសន៍ប្រាប់កោះសន្តិភាពថា កំលាំងប៉ូលិសក្រសួងមហាផ្ទៃចំនួន១៨នាក់បានទៅរឹបអូសឈើគ្រញូង និងឈើជ្រុងរបស់ក្រុមហ៊ុនដែលទុកក្នុងអាថ៌កំបាំងបំផុត។ ម្យ៉ាងវិញទៀតក្រុមហ៊ុនបានទុកក្រៅបរិវេណដីសម្បទានដែលខ្លួនគ្រប់គ្រង តែក៏ជាតំបន់ដែលខាងក្រុមហ៊ុនហាមឃាត់ផងដែរ ដូច្នេះហើយទើបសមត្ថកិច្ចចំរុះទៅប្រមូលឈើទាំងអស់នោះដាក់រថយន្ត។ ទោះបីជាបែបណាពេលឈើប្រុងដឹកយកទៅប្រគល់ឱ្យខណ្ឌរដ្ឋបាលព្រៃឈើខេត្តនៅវេលាម៉ោង១១ព្រឹកត្រូវមន្ត្រីរដ្ឋបាលព្រៃឈើបង្ហាញឯកសារមួយចំនួនរបស់ក្រុមហ៊ុន ហើយបានផ្អាកសកម្មភាពកម្មករជញ្ជូនឈើដាក់រថយន្តវិញ។
លោកវរសេនីយ៍ឯកសៀង អាង មេបញ្ជាការរងកងរាជអាវុធហត្ថមានប្រសាសន៍ថា ឈើគ្រញូង និងឈើជ្រុងទាំងអស់នោះគឺមានច្បាប់មួយចំណែកដែរ ប៉ុន្តែមិនគ្រប់គ្រាន់ ឥឡូវនេះឈើដែលដាក់លើរថយន្តចំនួន២គ្រឿងត្រូវបានទំលាក់ចុះវិញឱ្យម្ចាស់ឈើ ឬក្រុមហ៊ុនរក្សាទុក ហើយអាជ្ញាធរអាចបើកការស៊ើបអង្កេតសាជាថ្មី។ លោកពេជ្រ អេលី នាយផ្នែកប៉ូលិសសេដ្ឋកិច្ចខេត្តមានប្រសាសន៍ថា ទីតាំងដាក់ឈើគ្រញូងរបស់ក្រុមហ៊ុននេះគឺជាតំបន់ហាមឃាត់មិនឱ្យមនុស្សណាចូលទេ ដូច្នេះហើយសមត្ថកិច្ចពិបាកធ្វើការ។ រីឯលោកហង្ស ភឿង នាយសង្កាត់រដ្ឋបាលព្រៃឈើស្រុកឈូកមានប្រសាសន៍ថា ក្រុមហ៊ុនមានច្បាប់អនុញ្ញាតពីរដ្ឋាភិបាលដោយប្រគល់ដីសម្បទានតាំងពីឆ្នាំ២០០៥ ហើយក្រុមហ៊ុនបានឈូសឆាយប្រមូលបានឈើគ្រញូងចំនួន៩.៥០០គីឡូក្រាម និងឈើជ្រុង ឈើមូលពីលេខ១ដល់លេខ៣ មាន៩១,៤៦២ម៉ែត្រគូប។
លោកនាយសង្កាត់ប្រាប់ថា ឈើទាំងអស់នេះក្រុមហ៊ុនបានធ្វើឯកសារមកខណ្ឌរដ្ឋបាលព្រៃឈើរួចហើយដើម្បីបង់ថវិកាជូនរដ្ឋ ប៉ុន្តែសមត្ថកិច្ចមិនបានទាក់ទងមកខាងលោកទេ មុនពេលទៅទីតាំងស្តុកឈើនោះ។ មន្ត្រីតុលាការ លោកសៀង សុខ ព្រះរាជអាជ្ញារងខេត្តនិយាយថា ឈើទាំងអស់នោះត្រូវបានរក្សាទុកឱ្យនៅដដែលរង់ចាំការពិនិត្យសាជាថ្មីថាតើក្រុមហ៊ុនដាក់ឈើនោះខុសទីតាំង ឬយ៉ាងណា? គេកត់សំគាល់ឃើញថា កន្លងមកឈើរបស់ក្រុមហ៊ុនត្រូវបានគេលួចដឹកឆ្លងដែនទៅស្រុកយួន តែអាជ្ញាធរការពារព្រំដែនមិនអនុញ្ញាតឱ្យទេ ព្រោះអត់មានច្បាប់នាំចេញ៕
ចែករំលែកព័តមាននេះ