ប្រជាពលរដ្ឋខេត្តនៅស្វាយរៀង មានការភ្ញាក់ផ្អើលយ៉ាងខ្លាំង ខណៈបានឃើញវត្តមានតាបសជាច្រើននាក់ ដែលមានទាំងស្ត្រីនិងក្មេងតូចផង គ្រងសម្លៀកបំពាក់ពណ៌សនិងស្បែកខ្លា ទុក្ខសក់និងពុកចង្កាវែងៗរាងកាយ ចាក់សាក់ពេញខ្លួន ដៃកាន់ឈើច្រត់ដើរតាមក្រោយ
ខេត្តស្វាយរៀង ៖ ប្រជាពលរដ្ឋខេត្តនៅស្វាយរៀង មានការភ្ញាក់ផ្អើលយ៉ាងខ្លាំង ខណៈបានឃើញវត្តមានតាបសជាច្រើននាក់ ដែលមានទាំងស្ត្រីនិងក្មេងតូចផង គ្រងសម្លៀកបំពាក់ពណ៌សនិងស្បែកខ្លា ទុក្ខសក់និងពុកចង្កាវែងៗរាងកាយ ចាក់សាក់ពេញខ្លួន ដៃកាន់ឈើច្រត់ដើរតាមក្រោយសម្តេចអភិសិរីសុគន្ធាធិបតី មហាសង្ឃរាជាធិបតី កិត្តិឧទ្ទេសបណ្ឌិត បួរ គ្រី សម្តេចព្រះមហាសង្ឃរាជនៃគណៈធម្មយុត្តិកនិកាយនៃព្រះរាជាណាចក្រកម្ពុជា និងជាព្រះប្រធានគណៈសង្ឃនាយកនៃគណៈធម្មយុត្តិកនិកាយនៃព្រះរាជាណាចក្រកម្ពុជា ។
ប្រជាពលរដ្ឋបានភ្ញាក់រំជើបរំជួលចិត្ត ព្រោះមិនធ្លាប់ឃើញផ្ទាល់ គឺធ្លាប់តែឮនិងឃើញនៅក្នុងរឿងព្រេង ក្នុងខ្សែភាពយន្ត លុះពេលឃើញវត្តមានបែបនេះ ក៏ធ្វើឲ្យមានការភ្ញាក់អារម្មណ៍គ្រប់ៗគ្នា ។ វត្តមានតាបសឬតាឥសីនេះ គឺនៅក្នុងពិធីប្រគល់ព្រះរាជសង្ឃប្រកាសឧត្តមទីប្រឹក្សា-ទីប្រឹក្សាផ្ទាល់ និងប្រទានព្រះរាជអំណោយដល់លោកតាលោកយាយ និងប្រជាពលរដ្ឋក្រីក្រនៅក្រុងស្វាយរៀងចំនួន២០០គ្រួសារ ដែលក្នុង១គ្រួសារៗទទួលបានអង្ករ២៥គីឡូក្រាម មី១កេសត្រីខកំប៉ុង១យួរ ទឹកត្រី១យួរ ទឹកស៊ីអ៊ីវ១យួរនិងប្រាក់២០.០០០រៀល ។
ពិធីនេះ បានធ្វើឡើងនៅសាលប្រជុំសាលាខេត្ត កាលពីព្រឹកថ្ងៃទី៣ ខែមេសា ឆ្នាំ២០២២ ដោយមានឯកឧត្តម ជុំ ហាត ប្រធានក្រុមប្រឹក្សាខេត្ត និងឯកឧត្តម ម៉ែន វិបុល អភិបាលខេត្ត អញ្ជេីញចូលរួមដែរ ។
ក្នុងឱកាសនោះ តាបសជាច្រើនអង្គនាក់ក៏ទទួលព្រះរាជសង្ឃប្រកាសគោរមងារជាឧត្តមទីប្រឹក្សា ទីប្រឹក្សាផ្ទាល់របស់សម្តេចអភិសិរីសុគន្ធាធិបតីកិត្តិឧទ្ទេសបណ្ឌិត បួរ គ្រី សម្តេចព្រះមហាសង្ឃរាជនៃគណៈធម្មយុត្តិកនិកាយនៃព្រះរាជាណាចក្រកម្ពុជា និងជាព្រះប្រធានគណៈសង្ឃនាយកនៃគណៈធម្មយុត្តិកនិកាយនៃព្រះរាជាណាចក្រកម្ពុជាផងដែរ ។
តាមមន្ត្រីរៀបចំពិធីបានឲ្យដឹងថា តាបសទាំងអស់អញ្ជើញមកពីតំបន់ភ្នំនៅខេត្តឧត្តរមានជ័យ ខេត្តសៀមរាប ខេត្តព្រះវិហារ និងខេត្តកំពង់ធំ ។ ពួកគាត់មិននិយាយភាសាខ្មែរយើងទេ គឺនិយាយភាសាតាមតំបន់របស់គាត់រស់នៅ ឯការប្រាស្រ័យទាក់ទងគឺមានអ្នកបកប្រែ ។ ក្រោយពីពិធីត្រូវបានបញ្ចប់ ក៏មានមន្ត្រីរាជការ និងអ្នកសារព័ត៌មានក្នុងខេត្តសុំថតរូបជាមួយផងដែរ ៕
ចែករំលែកព័តមាននេះ