ខេត្តស្វាយរៀង ៖ ដើមចេកជ្វាមួយដើម មានធ្លាក់ផ្លែមួយស្ទងធំទៅហើយ ស្រាប់តែចេញនូវត្រយ៉ូងពីស្ទងចុងស្និតចំនួន៤ត្រយ៉ូងទៀត និងចេញផ្លែជាច្រើនស្និតបន្តបន្ទាប់ទាំង៤ត្រយ៉ូងនោះ ធ្វើឱ្យប្រជាពលរដ្ឋក្នុងភូមិមានការភ្ញាក់ផ្អើលនាំគ្នាទៅមើលដើមចេកចម្លែកនោះ ។
បើតាមការឱ្យដឹងពលរដ្ឋ កាលពីវេលាម៉ោង១០ព្រឹកថ្ងៃទី១៥ កញ្ញា ២០១៦ នេះថា គ្រួសារមួយរស់នៅក្នុងភូមិឈើភ្លើង ឃុំកំពង់ត្រាច ស្រុករមាសហែក បានដាំដើមចេកជ្វាជាច្រើនគុម្ព ក្នុងទីធ្លាដីភូមិរបស់គាត់ ស្រាប់មានដើមចេកមួយដើមចេញត្រយ៉ូងមកមួយស្ទងបានផ្លែបួនស្និត លុះផ្លែចេកនោះធំប៉ុនៗមេជើង ស្រាប់តែមានហេតុភេទចម្លែកចេញត្រយ៉ូងពីស្ទងចុងស្និតចំនួន៤
ត្រយ៉ូងទៀត និងបានធ្លាក់ផ្លែគ្រប់ត្រយ៉ូង ធ្វើឱ្យម្ចាស់ដើមចេកភ្ញាក់ផ្អើល ។
ដោយឃើញដើមចេករបស់គាត់កើតហេតុភេទចម្លែកដូច្នេះ ក៏និយាយប្រាប់បងប្អូន និងអ្នកភូមិនាំគ្នាមកមើលហើយនិយាយតៗគ្នាបង្កឱ្យផ្អើលពេញភូមិឈើភ្លើង និងអ្នកភូមិផ្សេងទៀត មកមើលដើមចេកចម្លែកនេះ ។
ទោះជាយ៉ាណា ដើមចេកនេះ ត្រូវម្ចាស់គាត់មិនទាន់ធ្វើពិធីអ្វីតាមជំនឿទេ ប៉ុន្តែអ្នកភូមិនាំគ្នានិយាយថា វាជារឿងចម្លែកសំរាប់ភូមិឃុំរបស់ពួកគាត់ ដោយពីមុនមិនដែលមានហេតុការណ៍នេះកើតឡើងនោះទេ ហើយមានចាស់ទុំខ្លះនិយាយថា គួរតែធ្វើពិធីដុតធូបដុតទៀន បន់ស្រន់សុំសេចក្តីសុខ ក្រែងមានហេតុភេទមិនល្អដល់ភូមិស្រុក ។
ចែករំលែកព័តមាននេះ