សហគមន៍នេសាទកំពង់សាមគ្គី បានលាតសន្ធឹងនៅតាមបណ្ដោយឆ្នេរសមុទ្រ ស្ថិតក្នុងភូមិកំពង់ត្នោតឃុំកូនសត្វ ស្រុកទឹកឈូ ខេត្តកំពត ។ ទោះបីជាបែបណា អ្នកគ្រប់គ្រងក្នុងសហគមន៍នេះ បានត្អូញត្អែរថា
ខេត្តកំពត ៖ សហគមន៍នេសាទកំពង់សាមគ្គី បានលាតសន្ធឹងនៅតាមបណ្ដោយឆ្នេរសមុទ្រ ស្ថិតក្នុងភូមិកំពង់ត្នោតឃុំកូនសត្វ ស្រុកទឹកឈូ ខេត្តកំពត ។ ទោះបីជាបែបណា អ្នកគ្រប់គ្រងក្នុងសហគមន៍នេះ បានត្អូញត្អែរថា គ្មានភ្ញៀវមកកម្សាន្ត ។
លោក ទេព សាវឿន អាយុ៥៨ឆាំ្ន ជាអ្នកចូលរួមថែរក្សាធនធានជីវៈចម្រុះនៅក្នុងសហគមន៍កំពង់សាមគ្គី បាននិយាយប្រាប់ឱ្យដឹងថា សហគមន៍កំពង់សាមគ្គីនេះ មានប្រជានេសាទចំនួន២ភូមិបានចូលរួម គឺភូមិកំពង់ត្នោត និងភូមិកំពង់នង់ ក្នុងឃុំកូនសត្វ ស្រុកទឹកឈូ ។
ដីនៅជាប់ឆ្នេរសមុទ្រនេះ មានព្រៃកោងកាង ត្រូវបានការពារក្នុងនោះមានស្មៅសមុទ្រផង ដែលលាតសន្ធឹងលើផ្ទៃឆ្នេរសមុទ្រទំហំប្រមាណ៦០០ហិកតា ។ លោក ទេព សាវឿន បន្តថា បន្ទាប់ពីបង្កើតសហគមន៍នេសាទកំពង់សាមគ្គីក្នុងឆាំ្ន២០២០ នោះមក គឺមិនសូវមានភ្ញៀវមកកម្សាន្តទេ តែលោកក៏ដឹងដែរថា ជាសម័យកូវីដ-១៩កំពុងឆ្លងខ្លាំង នរណាៗក៏មានការភ័យខ្លាចដែរ ទើបមិនមានអ្នកទេសចរ ។ សហគមន៍នេសាទនេះអាចរកចំណូលបាន គឺអាស្រ័យមកពីភ្ញៀវដែលមកកម្សាន្តទើបខាងសហគមន៍អាចរកចំណូលបាន ។
កន្លងមកដីសហគមន៍នេសាទកំពង់សាមគ្គីនេះ មានមន្ត្រីមកពីសាលាខេត្តកំពត បានមកនិយាយបញ្ចុះបញ្ចូល ប៉ុនប៉ងយកដីព្រៃកោងកាងរបស់សហគមន៍នេសាទកំពង់សាមគ្គីទៅឱ្យក្រុមហ៊ុនឯកជនគ្រប់គ្រង តែប្រជានេសាទបាននាំគ្នាតវ៉ាជាច្រើនលើក ទើបមន្ត្រីរូបនោះបានដកថយវិញ ហើយស្របពេលនោះ ឯកឧត្តម ម៉ៅ ធនិន ក៏បានមកកាន់តំណែងជាអភិបាលខេត្តកំពត ផងនោះ ទើបការប៉ុនប៉ងនោះបានស្ងប់ស្ងាត់ទៅវិញ ។
លោក ទេព សាវឿន ប្រាប់បន្តថា ប្រជានេសាទនៅសហគមន៍កំពង់សាមគ្គី នៅតែចូលរួមទប់ស្កាត់បទល្មើសផ្សេងៗនៅក្នុងសមុទ្រ និងសង្ឃឹមទៅលើថ្នាក់ដឹកនាំជួយទប់ស្កាត់ជនខិលខួចដែលតែងតែប្រើពាក្យថា យកដីសហគមន៍នេះទៅអភិវឌ្យន៍ តែការពិតនោះ គេប្រហែលជាចង់រកលុយដាក់ហោប៉ៅប៉ុណ្ណោះ ។
ថ្វីបើពេលនេះ កន្លែងកម្សាន្តដែលរៀបចំដោយការរួមជាសហគមន៍នេះ មិនទាន់មានការជឿនលឿនទៅមុខ តែតំនប់នេះ គឺជាពេជ្រមិនទាន់ច្នៃប៉ុណ្ណោះ ៕
ចែករំលែកព័តមាននេះ