រាជធានីភ្នំពេញ៖ តារាចម្រៀងសំនៀងបែបខ្មែរសុរិន្ទ ម្ចាស់បទ«យក្សកើតអេដស៍» លោកផៃ ផងរ៉ាក់ បានទទួលមរណភាពហើយ ដោយសារជំងឺរលាកសួតធ្ងន់ នៅថ្ងៃទី៥ ខែឧសភា ឆ្នាំ២០២៦…
រាជធានីភ្នំពេញ៖ តារាចម្រៀងសំនៀងបែបខ្មែរសុរិន្ទ ម្ចាស់បទ«យក្សកើតអេដស៍» លោកផៃ ផងរ៉ាក់ បានទទួលមរណភាពហើយ ដោយសារជំងឺរលាកសួតធ្ងន់ នៅថ្ងៃទី៥ ខែឧសភា ឆ្នាំ២០២៦ ។
បើយោងតាមការឱ្យដឹងពីក្រុមគ្រួសារថា លោកផៃ ផងរ៉ាក់ បានទទួលមរណភាពនាវេលាម៉ោង៨ និង១៥ នាទីព្រឹក នៅមន្ទីពេទ្យបង្អែកខេត្តសៀមរាប ។
សពលោកផៃ ផងរ៉ាក់ ត្រូវក្រុមគ្រួសាររៀបចំធ្វើបុណ្យនៅភូមិតាភុល សង្កាត់ស្វាដង្គំ ក្រុងសៀមរាប ។
នៅមុនពេលទទួលមរណភាព លោកផៃ ផងរ៉ាក់ ត្រូវក្រុមគ្រួសារបញ្ជូនទៅសម្រាកព្យាបាលនៅមន្ទីរពេទ្យបង្អែកខេត្តសៀមរាប ដោយសារលោកមានជំងឺរលាកសួតធ្ងន់ រួមនឹងផ្សេងទៀត ។
តារាចម្រៀងលោកអុឹង ប៊ុនលាភ បានរៀបរាប់តាមវីដេអូឃ្លីបបង្ហោះលើបណ្តាញសង្គមមុនពេលម្ចាស់បទ «យក្សកើតអេដស៍»ទទួលមរណភាពថា ភរិយារបស់លោកផៃ ផងរ៉ាក់ បានខលមកលោក ដើម្បីឱ្យលោកជួយ ព្រោះបច្ចុប្បន្នស្វាមីអ្នកស្រីកំពុងសម្រាកព្យាបាលនៅមន្ទីរពេទ្យ ហើយមិនមានលទ្ធភាពគ្រប់គ្រាន់សម្រាប់ថ្លៃព្យាបាល ។
ក្រោយពេលដឹងបែបនេះលោកអុឹង ប៊ុនលាភ បានស្នើសុំទៅកាន់សប្បុរសជននានា ដើម្បីជួយដល់លោកផៃ ផងរ៉ាក់ ដ្បិតក្រុមគ្រួសាររបស់លោកកំពុងខ្វះខាត និងញាំញីដោយសារជំងឺ ។
ដោយសារស្ថានភាពជំងឺរបស់លោកផៃ ផងរ៉ាក់ មានសភាពធ្ងន់ទៅហើយនោះ លោកទទួលមរណភាព ដោយមិនអាចសង្គ្រោះបាន ។
ដំណឹងមរណភាពពីតារាចម្រៀងលោកផៃ ផងរ៉ាក់ នាពេលនេះ មហាជន ពិសេសបណ្តាអ្នកគាំទ្របទចម្រៀងរបស់លោកបានសម្តែងការសោកស្តាយយ៉ាងខ្លាំង ដ្បិតលោកជាតារាចម្រៀងមួយរូបដែលធ្លាប់បំពេអារម្មណ៍ និងផ្តល់ភាពសប្បាយរីករាយដល់ប្រិយមិត្តអ្នកស្តាប់ ៕
ចែករំលែកព័តមាននេះ