មាន សូនីតា ឆ្លើយតបយ៉ាងចា.ក់ដោ.ត ជុំវិញមតិរិះគ.ន់អំឡុងការប្រកួតបវរកញ្ញា
- ភ្នំពេញ
រាជធានីភ្នំពេញ ៖ តារាសម្តែង មាន សូនីតា បានទម្លាយនូវមតិរិះគន់របស់មហាជនមួយចំនួននៅក្នុងអំឡុងពេលដែលនាងបានចូលរួមប្រកួតប្រជែងនៅក្នុងវិស័យបវរកញ្ញាជាលើកដំបូង ដោយមិនអាចគ្រងម្កុដតាមបំណង ។
ទោះជាយ៉ាងណា ក្រោយការប្រកួតបានបញ្ចប់ មាន សូនីតា ក៏មិនបានធ្វើអោយអ្នកគាំទ្រខកបំណងឡើយ ពោលនាងក៏ទទួលតំណែង៤នាក់ចុងក្រោយ ( 4th Runner up) ផងដែរ ក្នុងចំណោមបេក្ខភាពដែលមកចូលរួមជាង៤០ប្រទេស ។
បើទោះបីជា មាន សូនីតា បានខិតខំប្រឹងសម្រាប់ការប្រកួតមួយនេះក៏ដោយ ក៏ប៉ុន្តែនៅតែមានមហាជនមួយចំនួនបាននាំគ្នារិះគន់មកលើរូបនាងនូវចំណុចអវិជ្ជមានមួយចំនួនដែលបានកើតមានអំឡុងពេលនាងប្រកួត។
ចំណុចដែលមហាជនមួយចំនួនតូចរិះគន់នោះ មានដូចជា ផាត់មុខក្រាស់ពេក, ដើរមិនកើត, ឈុតមិនស្អាត, រ៉ូបមិនស្អាត, អត់សមបវកញ្ញាសោះ, ឈុតតំណាងជាតិមិនឡូយ, មើលទៅឆ្គងណាស់, មើលទៅខ្សោះៗ ដូចអត់មានកម្លាំង។
ជុំវិញការរិះគន់ខាងលើនេះ ត្រូវបានតារាសម្តែង មាន សូនីតា បានធ្វើការឆ្លើយតបតាមរយៈសំណេរបង្ហោះនៅលើបណ្តាញសង្គមថា អរគុណដែលតាមដានខ្ញុំយ៉ាងយកចិត្តទុកដាក់រហូតដល់សង្កេតឃើញគ្រប់ចំណុច។ ខ្ញុំដឹងថា ខ្ញុំមិនមែនជាមនុស្សល្អឥតខ្ចោះទេ ហើយខ្ញុំក៏មិនដែលអះអាងថាខ្លួនឯងល្អឥតខ្ចោះដែរ។
នាងបន្តថា ខ្ញុំមកទីនេះដើម្បីរៀនសូត្រ កែលម្អខ្លួនឯង ប្រឈមមុខនឹងបញ្ហា និងតំណាងឱ្យប្រទេសកម្ពុជាអោយអស់ពីចិត្ត។
នៅពីក្រោយការបង្ហាញខ្លួនមួយលើឆាក មានការហាត់សម ការត្រៀមខ្លួន សម្ពាធ ភាពនឿយហត់ និងការលះបង់ជាច្រើនដែលមនុស្សមិនបានឃើញ។ អ្នកឃើញតែអ្វីដែលកើតឡើងនៅលើឆាក ប៉ុន្តែអ្នកប្រហែលជាមិនបានឃើញដំណើរដ៏លំបាកនៅពីក្រោយវាទេ។
នាងបញ្ជាក់ថា អ្នកមានសិទ្ធិបញ្ចេញមតិរបស់អ្នក ហើយខ្ញុំក៏មានសិទ្ធិបន្តដំណើររបស់ខ្ញុំតាមក្តីស្រមៃដែរ។ កុំភ្លេចបន្តតាមដានណា! ខណៈពេលដែលអ្នកចំណាយពេលរិះគន់ខ្ញុំ ខ្ញុំនឹងចំណាយពេលនោះដើម្បីអភិវឌ្ឍខ្លួនឯងឱ្យកាន់តែប្រសើរ។ ខ្ញុំមិនបានមកដល់ទីនេះ ដើម្បីផ្គាប់ចិត្តមនុស្សគ្រប់គ្នាទេ។ ខ្ញុំមកដល់ទីនេះដើម្បីបង្ហាញឱ្យខ្លួនឯងថា គេអាចធ្វើបាន ខ្ញុំអាចធ្វើបានច្រើនជាងគេទៀត សូនីតាមិនចុះចាញ់ងាយៗទេ។
គួរបញ្ជាក់ថា តារាសម្តែង មាន សូនីតា ត្រូវបានជ្រើសរើសជាបេក្ខភាពតំណាងប្រទេសកម្ពុជា សម្រាប់ចូលរួមប្រកួតប្រជែងកម្មវិធី Universal Woman International 2026 ដោយចប់ការប្រកួតនាងទទួលបានតំណែង 4th runner ។
ទោះយ៉ាងណា ក្រោយចប់ការប្រកួត មាន សូនីតា បានគូសបញ្ជាក់ថា សម្រាប់ការវិលចូលប្រឡូកវិស័យបវរកញ្ញាជាថ្មីម្តងទៀតនោះគឺនាងមិនទាន់គិតឡើយ ខណៈពេលដែលនាងហាក់មានអារម្មណ៍រអាលនៅក្នុងវិស័យមួយនេះ។
នាងបញ្ជាក់ថា ការចូលរួមនាពេលនេះ នាងហាក់រងសម្ពាធច្រើន ដោយសារអ្វីៗស្ទើរទាំងអស់គឺនាងគិតនិងធ្វើម្នាក់ឯង គ្មានអ្នកជួយជ្រោមជ្រែង ហើយក្នុងនោះការចំណាយថវិកាផ្ទាល់ខ្លួនក៏ច្រើនផងដែរ។
នាងថា អំឡុងពេលប្រកួតនាងតែងសួរខ្លួនឯង ហេតុអ្វីធ្វើអោយខ្លួនឯងលំបាក ចូលរួមដើម្បីចង់ល្បីធ្វើអ្វី បើខ្លួនឯងជាតារាម្នាក់ដែលមានកេរ្តិ៍ឈ្មោះម្នាក់ហើយនោះ ទោះមិនប្រឡងក៏នាងអាចល្បីស្រាប់ហើយ ។
ទោះយ៉ាងណា សម្រាប់ការចូលរួមប្រកួតនេះក៏បានធ្វើអោយនាងទទួលបានបទពិសោធន៍ថ្មីៗ និងអាចរកឃើញអ្វីដែលជាខ្លួនឯងឡើងវិញ ហើយសង្ឃឹមថា មហាជននឹងបញ្ចប់ការរិះគន់ចំពោះបញ្ហាទាំងអស់មកលើរូបនាងទៀត៕
ចែករំលែកព័តមាននេះ