ទីក្រុងហុងកុង ៖ ខ្សែភាពយន្តដែលនិយាយពីជំងឺរាតត្បាតកូវីដ-១៩ សម្តែងដោយកំពូលតារាហុងកុង លោក Andy Lau ដែលគ្រប់គ្នាស្គាល់យ៉ាងច្បាស់ថា «លី តៅហួ» ត្រូវបានគ្រោងនឹងចាក់បញ្ចាំងនៅតាមរោងភាពយន្តនានា នៅក្នុងប្រទេសចិន នាថ្ងៃទី៦ ខែវិច្ឆិកាខាងមុខនេះ ពោលជិត៦ឆ្នាំ បន្ទាប់ពីការថតបានបញ្ចប់ទាំងស្រុង ខណៈអ្នកទស្សនាមួយចំនួនបានចោទសួរថា តើពួកគេពិតជាចង់រំឮកឡើងវិញនូវព្រឹត្តិការណ៍ផ្ទុះឡើងនៃជំងឺដ៏កាចសាហាវនេះដែរឬទេ?
ភាពយន្តនេះ ដឹកនាំដោយអ្នកដឹកនាំរឿងហុងកុង លោក Herman Yau និងរួមសម្តែងដោយតារាសម្តែងស្រីចិនដីគោក កញ្ញា Yang Zishan ផងដែរ។ ខ្សែភាពយន្តដែលមានចំណងជើងថា «Angels in White» មួយនេះ រៀបរាប់ពីរឿងរ៉ាវរបស់ប្រជាជនសាមញ្ញ ក្នុងទីក្រុងវូហាន (Wuhan) ដែលបានរួមដៃគ្នា អំឡុងពេលមានការផ្ទុះឡើងវីរុសកូវីដ-១៩ នៅដើមឆ្នាំ២០២០។ ដ្បិតការថតភាពយន្តនេះ បានបញ្ចប់តាំងពីខែធ្នូ ឆ្នាំ២០២០ មកម្ល៉េះ។
កាលពីពេលថ្មីៗនេះ ភាពយន្តមួយនេះ បានបញ្ចេញវីដេអូខ្លីមួយ ដែលមានចំណងជើងថា «៧៦ ថ្ងៃ និងយប់» (76 Days and Nights) ដែលរំឮកឡើងវិញនូវរយៈពេល ៧៦ ថ្ងៃដែលទីក្រុងវូហានត្រូវបានបិទខ្ទប់។ វាបានបង្ហាញពីទិដ្ឋភាពបុគ្គលិកសុខាភិបាល អ្នកជំងឺ និងប្រជាពលរដ្ឋមកពីមជ្ឈដ្ឋានផ្សេងៗគ្នា ដែលកំពុងប្រឈមមុខនឹងវិបត្តិ ដោយអ្នកខ្លះបានស្ម័គ្រចិត្តទៅបំពេញការងារជួរមុខ អ្នកខ្លះការពារក្រុមគ្រួសាររបស់ពួកគេជាដើម។
ទោះជាយ៉ាងណាក៏ដោយ ការប្រកាសថ្ងៃចាក់បញ្ចាំងនេះ បានបង្កឱ្យមានការជជែកដេញដោលយ៉ាងក្តៅគគុកលើបណ្តាញទំនាក់ទំនងសង្គម ដោយអ្នកទស្សនាមួយចំនួនបានលើកឡើងថា ពួកគេមានអារម្មណ៍រុញរានៅក្នុងការរំឮកឡើងវិញនូវការលំបាកនាពេលនោះ។ មតិមួយបានសរសេរថា «ខ្ញុំមិនអាចមើលរឿងនេះបានទេ» ម្នាក់ទៀតបានសួរថា «តើរឿងនេះធ្វើឡើងដើម្បីឱ្យអ្នកណាខ្លះរំជួលចិត្ត?»។
ទន្ទឹមនឹងនេះ ក៏មានអ្នកចោទសួរដែរថា ហេតុអ្វីបានជាភាពយន្តនេះ ត្រូវបានពន្យារពេលរហូតដល់យូរខែយូរឆ្នាំបែបនេះ ដោយពួកគេយល់ថា អារម្មណ៍ជាសាធារណៈជុំវិញជំងឺរាតត្បាតដ៏សាហាវនេះ បានផ្លាស់ប្តូរបាត់ទៅហើយ។ ការទៅមើលការលំបាកវេទនានៅក្នុងរោងភាពយន្តឡើងវិញ មានតែបន្ថែមទុក្ខព្រួយដល់អ្នកទស្សនាប៉ុណ្ណោះ៕
ចែករំលែកព័តមាននេះ