ខេត្តកំពង់ធំ ៖ ប្រជាពលរដ្ឋនាំគ្នានិយាយរិះគន់ថា បទល្មើសនៅរដូវបិទនេសាទបានកើតឡើងយ៉ាងអនាធិបតេយ្យនៅក្នុងភូមិសាស្ត្រឃុំផាត់សណ្តាយ ស្រុកកំពង់ស្វាយ ខេត្តកំពង់ធំ ដោយសារតែមន្ត្រីជលផល អាជ្ញាធរ និងសមត្ថកិច្ចពាក់ព័ន្ធបើកភ្លើងខៀវឲ្យពួកឈ្មួញប្រមូលលុយចែកគ្នាចាយយ៉ាងសប្បាយចិត្ត ។
ពលរដ្ឋនាំគ្នានិយាយត្អូញត្អែរថា នៅរដូវបិទនេសាទនេះ មានឧបករណ៍នេសាទខុសច្បាប់ដែលធ្វើឲ្យហិនហោចដល់មច្ឆជាតិដូចជា របាំងណរ៉ាវសាច់ក្រហម របាំងស្បៃមុង រ៉ូយ៉ាល់ ឡុក និង លូ ជាច្រើនកន្លែងបានដាក់ស្ទាក់ចាប់ត្រីនៅក្នុងទឹកក្បែរៗព្រៃ និងលាតសន្ធឹងតាំងពីមាត់ព្រៃរហូតដល់ទៅលំហផ្ទៃបឹងទន្លេសាប ក្នុងឃុំផាត់សណ្តាយ ដែលក្នុងមួយខ្សែៗមានប្រវែងពី២០០ម៉ែត្រ-៣០០ម៉ែត្រទៅរាប់ពាន់ម៉ែត្រក៏មាននោះ កម្រឃើញមន្ត្រីជំនាញចុះទៅបង្ក្រាបណាស់ចំណែកពួកគាត់ដែលដាក់ឧបករណ៍នេសាទខ្លីៗជាលក្ខណៈគ្រួសារវិញ បន្តិចគេទៅកាប់បំផ្លាញចោលអស់ ។
ពាក់ព័ន្ធបទល្មើសខាងលើនេះ លោក ព្រុំ សុឃឿន នាយសង្កាត់រដ្ឋបាលជលផលផាត់សណ្តាយ មិនអាចសុំការបំភ្លឺតាមទូរស័ព្ទបានទេនៅថ្ងៃទី០៥ ខែកញ្ញា ឆ្នាំ២០១៦នេះ ព្រោះទូរស័ព្ទលោកខលចូលជាច្រើនដងតែគ្មានអ្នកទទួល ។ ចំណែកលោក ស៊ិន សុភី ហៅ ប្រុស នាយរងសង្កាត់វិញនោះ ក៏ពុំអាចសុំការបំភ្លឺបានដែរ ។
លោក អ៊ុន បត្ត អភិបាលស្រុកកំពង់ស្វាយ បានប្រាប់ថា បន្ទាប់ពីទទួលព័ត៌មាននេះ ថ្ងៃស្អែកលោកនឹងចុះទៅធ្វើការត្រួតពិនិត្យ និងពង្រឹងឡើងវិញចំពោះបញ្ហានេះ ។
លោក ប៉ែន វណ្ណារិទ្ធ នាយខណ្ឌរដ្ឋបាលជលផលកំពង់ធំ បានប្រាប់«កោះសន្តិភាព»នៅថ្ងៃដដែលនេះថា លោកទទួលស្គាល់ថា ពិតជាមានបទល្មើសនេសាទខ្លះៗមែន ដោយសារតែកន្លងមកលោកបានដឹកនាំកម្លាំងចុះបង្ក្រាបយ៉ាងក្តៅគគុករហូតមានប្រជាពលរដ្ឋរាប់រយគ្រួសារនាំគ្នាសំណូមពរថា ឆ្នាំនេះកាលពីដើមឆ្នាំមានគ្រោះធម្មជាតិរាំងស្ងួតធ្វើឲ្យពួកគាត់សឹងតែរកអ្វីទទួលទានពុំបាន មានខ្លះនាំគ្នាទៅចងការប្រាក់គេទៀតផង លុះដល់មានទឹកបន្តិចចន្តួចគាត់នាំគ្នានេសាទត្រូវបានកម្លាំងចុះបង្ក្រាបញឹកញ៉ាប់យ៉ាងនេះ តើឲ្យពួកគាត់សង្ឃឹមអ្វី? គាត់គ្មានចេះអ្វីក្រៅពីរបរនេសាទនេះទេ តើពួកគាត់សុំតែមួយរស់ផងបានទេ? ដោយសារតែបញ្ហានេះហើយលោកបានពិភាក្សាជាមួយលោកអភិបាលខេត្ត ហើយធ្វើជារបាយការណ៍ជូនទៅក្រសួង ។ លោកនាយខណ្ឌបន្តថា បើប្រជាពលរដ្ឋនាំគ្នាសំណូមពរយ៉ាងដូច្នេះហើយ លោកមានតែឈរនៅខាងប្រជាពលរដ្ឋ ដោយមិនអាចសម្លាប់ពួកគាត់បានទេ ដែលជាហេតុធ្វើឲ្យសារព័ត៌មានខ្លះវាយប្រហារចំពោះរូបលោកថា បានឃុបឃិតគ្នាបណ្តោយឲ្យមានបទល្មើស ។
លោក ប៉ែន វណ្ណារិទ្ធ បញ្ជាក់ថា បើពលរដ្ឋដាក់ឧបករណ៍ក្រឡាធំៗបន្តិចនោះត្រឹមប្រវែង១០០ម៉ែត្រ ទៅ២០០ម៉ែត្រ ដើម្បីរស់ គឺលោកទុកឲ្យពួកគាត់រស់ចុះ ហើយលោកក៏ពុំដែលបានទទួលប្រាក់សូម្បីតែ១រៀលពីពួកគាត់ដែរ ។ ចំណែកឧបករណ៍របាំងស្បៃម៉ុងគឺហាមដាច់ខាត សូម្បី២-៣ម៉ែត្រក៏បង្ក្រាបកាប់កម្ទេច ឬក៏សារយកមកដុតកម្ទេចចោលដែរ រីឯរឿងថា មានដាក់ឧបករណ៍នេសាទខុសច្បាប់រាប់ពាន់ម៉ែត្រនោះ លោកនឹងដឹកនាំកម្លាំងចម្រុះចុះទៅបង្ក្រាបក្នុងពេលឆាប់ៗនេះ ៕
ចែករំលែកព័តមាននេះ