តំបន់ធ្វើដំណើរតាមក្បូនអំពាវនាវដល់រដ្ឋាភិបាលធ្វើស្ពានឆ្លង
ខេត្តមណ្ឌលគីរី ៖ ភ្លៀងបានធ្លាក់ជាបន្តបន្ទាប់អស់ជាច្រើនសប្តាហ៍នាភូមិភាគឦសាន បានធ្វើឲ្យប្រជាពលរដ្ឋ ជាពិសេសប្រជាកសិករមានចិត្តសប្បាយរីករាយ
ខេត្តមណ្ឌលគីរី ៖ ភ្លៀងបានធ្លាក់ជាបន្តបន្ទាប់អស់ជាច្រើនសប្តាហ៍នាភូមិភាគឦសាន បានធ្វើឲ្យប្រជាពលរដ្ឋ ជាពិសេសប្រជាកសិករមានចិត្តសប្បាយរីករាយ
ខេត្តមណ្ឌលគីរី ៖ ភ្លៀងបានធ្លាក់ជាបន្តបន្ទាប់អស់ជាច្រើនសប្តាហ៍នាភូមិភាគឦសាន បានធ្វើឲ្យប្រជាពលរដ្ឋ ជាពិសេសប្រជាកសិករមានចិត្តសប្បាយរីករាយ ដោយសារមានទឹកគ្រប់គ្រាន់ សម្រាប់ការបង្កបង្កើនផល ប៉ុន្តែទន្ទឹមនិងការត្រេកអររបស់បងប្អូនប្រជាពលរដ្ឋមួយចំនួន ក៏បានកំពុងជួបទុក្ខលំបាក ព្រោះទឹកភ្លៀងបានធ្វើឲ្យខូចខាតផលដំណាំ និងផ្លូវធ្វើដំណើរ ។
ប្រជាពលរដ្ឋជាង២០០គ្រួសាររស់នៅក្នុងភូមិចំនួន២ ស្ថិតក្នុងទឹកដីនៃឃុំសុខសាន្ត ស្រុកកោះញែក ខេត្តមណ្ឌលគិរី កំពុងព្រួយបារម្ភ ខណៈដែលត្រូវជិះក្បូនឆ្លងកាត់ទឹកព្រែកធម្មជាតិ ប្រវែងជាង៨០ម៉ែត្រ នារដូវវស្សាដើម្បីដឹកផលដំណាំលក់ឲ្យថៅកែ និងបង្កឲ្យតម្លៃផលកសិកម្មបានចុះថោក ។ រូបភាពជាច្រើនត្រូវបានបង្ហោះក្នុងបណ្តាញទំនាក់ទំនងសង្គមហ្វេសប៊ុក បង្ហាញពីភាពប្រថុយប្រថានរបស់ប្រជាពលរដ្ឋ និងសិក្សានុសិស្សដែលបានធ្វើដំណើរតាមក្បួនឫស្សីសួរតាមខ្សែពួរឆ្លងកាត់ទឹកដែលកំពុងហូរខ្មួលខ្មាញ់ ដើម្បីបានទៅដល់សាលាដែលមានចម្ងាយប្រមាណជាង៥គីឡូម៉ែត្រពីភូមិ ។
ចំណែកអ្នកនិយមលេងហ្វេសប៊ុក កាលពីថ្មីៗនេះ ក្រោយពីបានឃើញរូបភាពដ៏គ្រោះថ្នាក់របស់សិស្សសាលាដែលកំពុងជិះក្បួនឆ្លងព្រែកទៅរៀន បានសួរគ្នាថាករណីនេះពិត ឬមិនពិត ព្រោះសម័យនេះទៅហើយនៅតែមានការជិះក្បូន ដើម្បីឆ្លងកាត់ពីភូមិមួយទៅភូមិមួយទៀត ខុសប្លែកពីបណ្តាភូមិឃុំនានា ក្នុងប្រទេសកម្ពុជាមានផ្លូវគ្រប់ប្រភេទដែលបានស្ថាបនារួចរាល់ជូនប្រជាពលរដ្ឋប្រើប្រាស់ទៅហើយនោះ ។
លោក ខ្លូត សុឃា អធិការនគរបាលស្រុកកោះញែកលោកអះអាងថា ហ្វេសបុកបង្ហោះសិស្សជិះក្បូននោះគឺពិតប្រាកដមែន ។ លោកថាប្រជាពលរដ្ឋជាង២០០គ្រួសារបូករួមនិងសិស្សសាលាផង បានសំដែងការព្រួយបារម្ភលើបញ្ហាសុវត្ថិភាពនៃការធ្វើដំណើរ ខណៈត្រូវជិះក្បូនឆ្លងកាត់ព្រែកធម្មជាតិមួយដែលមានទទឹងតាមការស្មានចាប់ពី៨០ទៅ១០០ម៉ែត្រ និងមាន ជម្រៅជាង១០ម៉ែត្រនារដូវវស្សានេះ ។
លោកបញ្ជាក់ថា បើនៅរដូវប្រាំងព្រែកធម្មជាតិដែលគេស្គាល់ថាឈ្មោះ(អូរច្បារ)នេះ គឺអាចធ្វើដំណើរតាមរយះម៉ូតូ ឬរថយន្តបាន ព្រោះទឹកស្រកសល់តិចតួច តែបើរដូវវស្សានេះគឺមិនអាចឆ្លងកាត់បាន ក្រៅពីក្បូនឬទូកនោះទេ ។ នាយប៉ុស្តិ៍នគរបាលឃុំសុខសាន្ត លោក ជួន ប៊ុនធឿន ក៏បានឲ្យដឹងដែរថា ប្រជាពលរដ្ឋដែលរស់នៅភូមិចំនួន២ គឺភូមិថ្មី និងភូមិជីក្លប គឺត្រូវឆ្លងកាត់អូរច្បារ ដើម្បីមកកាន់ភូមិដែលគេហៅថា ភូមិទូលស្ថិតក្នុងឃុំសុខសាន្តដូចគ្នា ដែលទីនោះមានសាលារៀន និងទីប្រជុំជន ។
លោកថាការឆ្លងលើក្បូននេះត្រូវបានបង់ថ្លៃក្នុងម៉ូតូ១ចំនួន៥ពាន់រៀល ចំណែកសិស្សសាលាម្នាក់១ពាន់រៀលទាំងទៅទាំងមក ដល់ថៅកែឯកជន ។ ដោយសង្កេតឃើញបញ្ហាទាំងនេះអជ្ញាធរបានប្រជុំ និងបានលើកឡើងថាបើសិស្សសាលាមកឆ្លងជុំគ្នា គឺមិនត្រូវបានបង់ថ្លៃក្បូននោះទេ តែបើមករប៉ាត់រប៉ាយគឺត្រូវបង់ប្រាក់ធម្មតា ។
ជាមួយគ្នានោះភូមិខាងលើក៏នៅមានក្បួន១កន្លែងផ្សេងទៀត ជាកម្មសិទ្ធរបស់សហគមន៍ ដែលការឆ្លង គឺត្រូវចំណាយក្នុងម្នាក់បីពាន់រៀលទាំងទៅទាំងមកដូចគ្នាផងដែរ ។ លោកនាយប៉ុស្តិ៍បញ្ជាក់ថា នារដូវវស្សារបើសិនជាទឹកនៅត្រឹមពាក់កណ្តាលច្រាំង គឺគេអាចចម្លងបានតែបើទឹកមានស្ថានភាពខ្ពស់ផុតច្រាំង គឺមិនត្រូវបានម្ចាស់ក្បូនគេចម្លងអ្នកដំណើរនោះទេ ដែលបញ្ហានេះបានបង្កឲ្យមានការរាំងស្ទះដល់ការជួញដូរផលិតផលកសិកម្មរបស់កសិករ ក៏ដូចជាការសិក្សារបស់ សិស្សានុសិស្សយ៉ាងខ្លាំងផងដែរ ។
ជាមួយគ្នានេះប្រធានមន្ទីរអភិវឌ្ឍន៍ជនបទខេត្តមណ្ឌលគិរីលោក យន់ សារ៉ោម បានអាណិតអាសូរចំពោះក្មេងៗសិស្សានុសិស្សនៅក្នុងតំបន់ខាងលើផងដែរ ដោយលោកបានបញ្ជាក់ថា កាលពីប៉ុន្មានថ្ងៃមុនក្រុមកាងារលោកក៏បានចុះផ្ទាល់ដល់ចំណុចលំបាកនោះ និងបានជួយសំរួលការលំបាកជួនប្រជាពលរដ្ឋ ដោយបានធ្វើក្បូនពីរ ឬស្សីមួយមានទំហំ២ម៉ែត្រគុណនិង៦ម៉ែត្រ ទុកឲ្យធ្វើដំណើរលើទឹកព្រែកអូរច្បារនេះ ។
លោកថា ផ្លូវត្រូវបានមន្ទីរបានស្ថាបនារួចរាល់ហើយ នៅតែស្ពានឆ្លងកាត់ព្រែកតែប៉ុណ្ណោះ ។ នៅក្នុងគំរោងឆ្នាំ២០១៧ លោកបានដាក់សំណើរទៅថ្នាក់លើដើម្បីស្ថាបនាស្ពានបេតុង១ដែរ តែនៅមិនទាន់មានកញ្ចប់ថវិកានៅឡើយ ។ ហើយជាបឋមលោកកំពុងតែគៀរគរប្រាក់ពីសប្បុរសជន ដើម្បីបានមូលនិធិខ្លះស្ថាបនាស្ពានយោលមួយអន្លឺរសិន សំរាប់ការឆ្លងកាត់បណ្តោះអាសន្ន ។ លោកក៏បានស្នើឲ្យមិនមានការបង់ប្រាក់សំរាប់ការជិះក្បូនរបស់ក្មេងៗជាកុមារកំព្រា តែបើគ្មានករណីលើកលែងនោះ លោកសុខចិត្តបរិច្ចាកប្រាក់ផ្ទាល់ខ្លួនថែមទៀត ។
នៅព្រឹកថ្ងៃទី២៥ សីហា អ្នកយកព័ត៌មានបានសុំការបញ្ជាក់ពីលោក ស្វាយ សំអ៊ាង ពីបញ្ហាខាងលើដែរ តែទូរសព្ទរបស់លោកមិនមាន អ្នកឆ្លើយតប ។ ប្រជាពលរដ្ឋសិស្សានុសិស្សមន្ត្រីរាជការនៅភូមិឃុំខាងលើ បានអំពាវនាវរាជរដ្ឋាភិបាល មន្ទីរពាក់ព័ន្ធ អាជ្ញាធរ អង្គការសង្គមស៊ីវិលនានា នឹងសប្បុរសជនសូមជួយស្ថាបនាស្ពានមួយខ្សែដល់ឃុំសុខសាន្ត ដើម្បីបង្កភាពងាយស្រួលក្នុងការធ្វើដំណើរដោះដូរស្បៀង ក៏ដូចជាការសិក្សារបស់ក្មេងៗក្នុងតំបន់ នេះផងដែរ ៕
ចែករំលែកព័តមាននេះ