រាជធានីភ្នំពេញ ៖ ទោះបីចៅក្រមស៊ើបសួរសាលាដំបូងរាជធានីភ្នំពេញ បានសម្រេចចោទប្រកាន់ស្ថាពរ និងបញ្ជូនសំណុំរឿងលោក កឹម សុខា ប្រធានស្តីទីគណបក្សសង្គ្រោះជាតិទៅជំនុំជម្រះ
រាជធានីភ្នំពេញ ៖ ទោះបីចៅក្រមស៊ើបសួរសាលាដំបូងរាជធានីភ្នំពេញ បានសម្រេចចោទប្រកាន់ស្ថាពរ និងបញ្ជូនសំណុំរឿងលោក កឹម សុខា ប្រធានស្តីទីគណបក្សសង្គ្រោះជាតិទៅជំនុំជម្រះ មិនទាន់កំណត់ថ្ងៃនៅឡើយក្តី ក៏លោក កឹម សុខា នឹងមិនទៅចូលរួមសវនាការជំនុំជម្រះនោះទេ ។ នេះ
បើតាមការឲ្យដឹងពីលោក អេង ឆៃអ៊ាង មន្ត្រីជាន់ខ្ពស់គណបក្សសង្គ្រោះជាតិ ។
ថ្លែងប្រាប់អ្នកសារព័ត៌មាននៅក្នុងវេទិកានយោបាយស្តីពីដំណើរការបោះឆ្នោតនៅទីស្នាក់ការកណ្តាលគណបក្សសង្គ្រោះជាតិ នាព្រឹកថ្ងៃទី២៦ ខែសីហា លោក អេង ឆៃអ៊ាង មន្ត្រីជាន់ខ្ពស់គណបក្សសង្គ្រោះជាតិនិងជាសមាជិកសភាផងដែរនោះថ្លែងថា លោក កឹម សុខា ប្រធានស្តីទីគណបក្សសង្គ្រោះជាតិនឹងមិនទៅតាមការកោះហៅរបស់ចៅក្រមសាលាដំបូងនោះទេ ប្រសិនមានការកោះហៅជំនុំជម្រះនោះ ។
លោក អេង ឆៃអ៊ាង ថ្លែងថា មេធាវីលោក កឹម សុខា បានដាក់បណ្តឹងទាស់ទៅសាលាឧទ្ធរណ៍ទាក់ទងនឹងការសម្រេចរបស់អយ្យការនិងចៅក្រមស៊ើបសួរសាលាដំបូងរាជធានីភ្នំពេញ ដែលបានសម្រេចចោទប្រកាន់ស្ថាពរ និងបញ្ជូនសំណុំរឿងលោក កឹម សុខា ប្រធានស្តីទីគណបក្សសង្គ្រោះជាតិទៅជំនុំជម្រះ។
លោកបញ្ជាក់ថា «ដោយសារតែចៅក្រមស៊ើបសួរ ក៏ដូចជាព្រះរាជអាជ្ញាអមសាលាដំបូង អនុវត្តនីតិវិធីកំពុងរំលោភរដ្ឋធម្មនុញ្ញ ព្រោះយើងដឹងហើយថាសមាជិកសភាមានត្រូវធានាដោយរដ្ឋធម្មនុញ្ញត្រង់មាត្រា៨០ ដូច្នេះចៅក្រមក្តី ព្រះរាជអាជ្ញាក្តី ចង់ចាប់ខ្លួនសមាជិកសភារូបណាបាន លុះត្រាតែលើកអភ័យឯកសិទ្ធិជាមុនសិន ។ ប៉ុន្តែករណីលោក កឹម សុខា រដ្ឋសភាមិនបានលើកអភ័យឯកសិទ្ធិជាមុននោះទេ អ៊ីចឹងចៅក្រម ព្រះរាជអាជ្ញា ធ្វើដោយមិនមើលអភ័យឯកសិទ្ធិនោះទេ» ។
លោក អេង ឆៃអ៊ាង សង្កត់ធ្ងន់ថា «ច្បាស់ណាស់ លោកមិនចូលទៅនោះទេ ព្រោះអ្នកតំណាងរាស្ត្រដូចខ្ញុំបញ្ជាក់រួចហើយ ហើយខ្ញុំជាអ្នកតំណាងរាស្ត្រមួយរូបដែរ អីុចឹងបើតុលាការចង់ចាប់ខ្លួនខ្ញុំ ចង់ចោទ ទាល់តែសុំទៅរដ្ឋសភាសុំលើអភ័យឯកសិទ្ធិខ្ញុំសិន ហើយត្រូវប្រើសំឡេង២ភាគ៣ ។ ប៉ុន្តែស្រុកយើងចម្លែកណាស់ដូចជាករណីលោក អ៊ុំ សំអាន សមាជិកសភា ចាប់ខ្លួនទាំងមានអភ័យឯកសិទ្ធិនោះ ដោយអះអាងអាងថាសភាអនុញ្ញាតឲ្យបន្តនីតិវិធី ក្នុងរដ្ឋធម្មនុញ្ញាគ្មានចែងនោះទេ ។ ពេលនេះគេធ្វើចំពោះលោក អ៊ុំ សំអាន បាន គេនឹងធ្វើលើ លោក កឹម សុខា ទៀត ។
ទាក់ទងនឹងសំណុំរឿងលោកប្រធានស្តីទីគណបក្សសង្គ្រោះជាតិ ក្រុមមេធាវីរបស់លោកបានដាក់ពាក្យបណ្តឹងទៅសាលាឧទ្ធរណ៍ ដើម្បីជំទាស់ចំពោះដីកាដោះស្រាយរបស់សាលាដំបូង។ ក្នុងពាក្យបណ្តឹង ក្រុមមេធាវីបានលើកឡើងថា ការចេញដីកាដំណោះស្រាយរបស់ចៅក្រមស៊ើបសួរ ហើយបញ្ជូនសំណុំរឿងព្រហ្មទណ្ឌលេខ២៤០១ ចុះថ្ងៃទី២៦ ខែឧសភា ឆ្នាំ២០១៦ របស់សាលាដំបូងរាជធានីភ្នំពេញទៅជំនុំជម្រះ បានធ្វើឲ្យប៉ះពាល់ដល់សិទ្ធិ និងផលប្រយោជន៍ស្របច្បាប់របស់កូនក្តីយ៉ាងធ្ងន់ធ្ងរ ។
លោកមេធាវីបានបញ្ជាក់ថា «យើងខ្ញុំបានប្តឹងជំទាស់នឹងដីកាសម្រេចមួយចំនួនរបស់ចៅក្រមស៊ើបសួរ ហើយរហូតមកដល់ពេលនេះនៅមិនទាន់ចប់ជាស្ថាពរនៅឡើយទេ ។ ហេតុនេះយើងខ្ញុំសុំប្តឹងជំទាស់នឹងដីកាដំណោះស្រាយលេខ២៨៩១ ក១ ដ.ដ ចុះថ្ងៃទី២៣ ខែសីហា ឆ្នាំ២០១៦ របស់ចៅក្រមស៊ើបសួរសាលាដំបូងរាជធានីភ្នំពេញត្រង់ចំណុចទាំងមូលនៃសេចក្តីសម្រេច ។
គួររំឭកថា លោកចៅក្រម ថាន់ ឡេង កាលពីថ្ងៃ២៣ ខែសីហា ឆ្នាំ២០១៦ បានចេញសេចក្តីជូនដំណឹងប្រាប់មកលោក កឹម សុខា អាយុ៦៣ឆ្នាំ ជនជាតិខ្មែរ ជាតំណាងរាស្ត្រមណ្ឌលកំពង់ចាម ទីកន្លែងកំណើតឃុំឧត្តម
សូរិយា ស្រុកត្រាំកក់ ខេត្តតាកែវ ទីលំនៅបច្ចុប្បន្នផ្ទះលេខ៩៧ ផ្លូវលេខ៣១៣ សង្កាត់បឹងកក់ទី២ ខណ្ឌទួលគោក រាជធានីភ្នំពេញ ស្ថិតក្នុងសំណុំរឿងព្រហ្មទណ្ឌលេខ២៤០១ ចុះថ្ងៃទី២៦ ខែឧសភា ឆ្នាំ២០១៦ បានចោទប្រកាន់តាមដីកាសន្និដ្ឋានបញ្ជូនរឿងឲ្យស៊ើបសួរលេខ១៣៨២ អ.យ.ឋ ចុះថ្ងៃទី២៦ ខែឧសភា ឆ្នាំ២០១៦ របស់អយ្យការអមសាលាដំបូងរាជធានីភ្នំពេញ ពីបទបដិសេធក្នុងការចូលខ្លួនប្រព្រឹត្តនៅរាជធានីភ្នំពេញ ។ តាមបញ្ញត្តិមាត្រា៥៣៨ នៃក្រមព្រហ្មទណ្ឌ យើងបានចាត់ការស៊ើបសួរចប់សព្វគ្រប់ និងបានសម្រេចបញ្ជូនសំណុំរឿងនេះទៅជំនុំជម្រះតាមដីកាដំណោះស្រាយលេខ២៨៩១ ក១.ដ.ដ ចុះថ្ងៃទី២៣ ខែសីហា ឆ្នាំ២០១៦ ៕
ចែករំលែកព័តមាននេះ