ខេត្តត្បូងឃ្មុំ ៖ គ្រាប់បែកដៃចំនួន៣គ្រាប់ និងក្បាលគ្រាប់៦០មីលីម៉ែត្រ២គ្រាប់ ដែលត្រូវបានជនមិនស្គាល់អត្តសញ្ញាណយកមកផ្លុងចោល នៅត្រង់ចំណុចមាត់ច្រាំងទន្លេជាប់ព្រែកតាឌួង
ខេត្តត្បូងឃ្មុំ ៖ គ្រាប់បែកដៃចំនួន៣គ្រាប់ និងក្បាលគ្រាប់៦០មីលីម៉ែត្រ២គ្រាប់ ដែលត្រូវបានជនមិនស្គាល់អត្តសញ្ញាណយកមកផ្លុងចោល នៅត្រង់ចំណុចមាត់ច្រាំងទន្លេជាប់ព្រែកតាឌួង ចម្ងាយ៧០ម៉ែត្រ ក្នុងភូមិក្រូចឆ្មារក្រោម ឃុំក្រូចឆ្មារ ស្រុកក្រូចឆ្មារនោះ ត្រូវបានក្រុមមន្ត្រីអង្គការស៊ីម៉ាកបានទៅយកហើយ នាព្រឹកថ្ងៃទី២៤ សីហា ២០១៦ ដើម្បីយកទៅកម្ទេចចោលកន្លែងសុវត្ថិភាព។
តាមសមត្ថកិច្ចប្រាប់ឲ្យដឹងថា នៅវេលាម៉ោង៤រសៀលជាង ថ្ងៃទី២៣ សីហា មានប្រជាពលរដ្ឋម្នាក់ឈ្មោះផល្លី ភេទប្រុស អាយុ៤៧ឆ្នាំ រស់នៅភូមិក្រូចឆ្មារក្រោម ឃុំក្រូចឆ្មារ បានប្រទះឃើញគ្រាប់បែកដៃ ដែលផលិតនៅអតីតសហភាពសូវៀត ត្រង់ចំណុចមាត់ទន្លេមេគង្គក៏ប្រញាប់រាយការណ៍ប្រាប់សមត្ថកិច្ចនៅមូលដ្ឋានដើម្បីឲ្យបានដឹង។ សមត្ថកិច្ចបានប្រាប់បន្តឲ្យដឹងទៀតថា ក្រោយពីទទួលបាននូវព័ត៌មានខាងលើនេះ កម្លាំងជំនាញបានប្រញាប់ចុះទៅជាបន្ទាន់ដើម្បីពិនិត្យឃើញមានគ្រាប់បែកដៃ៣គ្រាប់ និងវត្ថុម្យ៉ាងដែលមានស្រោមជ័របិទជិតសង្ស័យជាសារធាតុផ្ទុះ ត្រូវបានគេច្រកក្នុងថង់ប្លាស្ទិចពណ៌ខ្មៅ។
ទីតាំងកើតហេតុត្រូវបាន ព័ទ្ធកំណត់សញ្ញាគ្រោះថ្នាក់ ដើម្បីឲ្យជំនាញអង្គការស៊ីម៉ាកមកពិនិត្យ ហើយរហូតមកដល់ព្រឹកថ្ងៃទី២៤ សីហា ២០១៦នេះ ត្រូវបានក្រុមស៊ីម៉ាកមកពិនិត្យដោយប្រុងប្រយ័ត្ន ឃើញគ្រាប់បែកដៃ៣គ្រាប់ ក្នុងនោះមាន២គ្រាប់ផលិតនៅអតីតសហភាពសូវៀត និង១គ្រាប់ទៀតផលិតនៅចិន គុណភាព៩៥ភាគរយ។ ចំណែកក្បាលគ្រាប់ប្រភេទ៦០មីលីម៉ែត្រ២គ្រាប់នោះ ផលិតនៅប្រទេសចិន គុណភាព១០០ភាគរយផងដែរ។
ចំណែកលោក គីម ហេង មន្ត្រីអង្កការស៊ីម៉ាក វិញប្រាប់ឲ្យដឹងដែរថា គ្រាប់បែក និងក្បាលគ្រាប់៦០មីលីម៉ែត្រ ដែលត្រូវបានប្រជាពលរដ្ឋប្រទះឃើញ នៅស្រុកក្រូចឆ្មានោះ ត្រូវបានមន្ត្រីជំនាញរបស់លោក
បានចុះទៅយកមកកម្ទេចចោលហើយ នៅកន្លែងសុវត្ថិភាពមួយម្តុំជិតចម្ការកៅស៊ូតាប៉ាវ ដើម្បីចៀសវាងកុំឲ្យគ្រោះថ្នាក់ដល់អាយុជីវិតពលរដ្ឋ។ ហើយគ្រាប់ទាំងនោះមិនមានអ្នកណា យកទៅប្លុងចោលទេ គឺជាគ្រាប់ដែលត្រូវបានបន្សល់ទុកពីសម័យសង្គ្រាម៕
ចែករំលែកព័តមាននេះ