រថយន្តស៊េរីទំនើប២គ្រឿងជែងគ្នាអាមួយក្រឡាប់ផ្ងារជើងលើសួន
- រតនគិរី
រថយន្តស៊េរី១គ្រឿងបានក្រឡាប់ផ្ងារជើងនៅលើសួនពុះចែកទ្រូងផ្លូវ ខណៈបើកជែងគ្នាជាមួយរថយន្ដសេ៊រីទំនើបមួយគ្រឿងទៀត កាលពីវេលា
ខេត្តរតនគិរី ៖ រថយន្តស៊េរី១គ្រឿងបានក្រឡាប់ផ្ងារជើងនៅលើសួនពុះចែកទ្រូងផ្លូវ ខណៈបើកជែងគ្នាជាមួយរថយន្ដសេ៊រីទំនើបមួយគ្រឿងទៀត កាលពីវេលាម៉ោងប្រមាណ៨និង៤០នាទីព្រឹកថ្ងៃទី១២ ខែមីនា ឆ្នាំ២០២២កន្លងទៅនៅមុខមន្ទីរសាធារណការនិងដឹកជញ្ជូនខេត្ត ស្ថិតក្នុងភូមិអូរកន្សែង សង្កាត់បឹងកន្សែង ក្រុងបានលុង ។
តាមអ្នកឃើញហេតុការណ៍និយាយថា រថយន្ដម៉ាករេវ៉ូ បើកជែងរថយន្ដម៉ាស្តាក្នុងល្បឿនលឿន ពីខាងកើតទៅខាងលិច ហើយងាកចូលមកគន្លងពីខាងមុខរថយន្ដម៉ាស្តាវិញ ។ ពេលនោះ រថយន្ដម៉ាស្តាចាប់ហ្វ្រាំងមិនទាន់ ក៏បុករថយន្ដរេវ៉ូពីក្រោយពេញទំហឹង បណ្ដាលឱ្យក្រឡាប់ផ្ងារជើងលើសួនច្បារពុះចែកទ្រូងផ្លូវតែម្ដង ។
ប្រភពពីសមត្ថកិច្ចបានឱ្យដឹងថា អ្នកបើកបររថយន្តម៉ាស្ដា ពណ៌ស ពាក់ស្លាកលេខ ភ្នំពេញ ២AC-៧៣៥២ ឈ្មោះ បាន ព្រហ្មនា ភេទប្រុស អាយុ ២៧ឆ្នាំ មានទីលំនៅក្នុងខណ្ឌទួលគោក រាជធានីភ្នំពេញ ខូចខាតចង្កៀងមុខខាងឆ្វេង ។
ចំណែករថយន្តរេវូ៉ ដែលក្រឡាប់ ពណ៌ស ពាក់ផ្លាកលេខ ភ្នំពេញ ២BC-៦៦១៨ អ្នកបើកបរឈ្មោះ ជា ស៊ាងហុង ភេទប្រុសអាយុ៦៨ឆ្នាំ មានទីលំនៅក្នុងខណ្ឌសែនសុខ រាជធានីភ្នំពេញ រថយន្តខូចខាតទ្វារទាំងសងខាង ។
ក្រោយកើតហេតុ រថយន្តទាំង២គ្រឿងត្រូវបានសមត្ថកិច្ចយកទៅរក្សាទុក ដើម្បីធ្វើការដោះស្រាយនៅពេលក្រោយ៕
ចែករំលែកព័តមាននេះ