ថ្មីៗនេះនៅលើបណ្តាញសង្គមមានការបង្ហោះតគ្នាព្រោងព្រាតទាក់ទងទៅនឹងការដែលបុរសម្នាក់ខឹងព្រះសង្ឃនិមន្តបិណ្ឌបាតហើយថែមទាំងឆ្លៀតសុំបិណ្ឌបច្ច័យដើម្បីទិញសៀវភៅ១ឡូបន្ថែមទៀត ហើយក៏ត្រូវបុរសម្នាក់ដែលគេដឹងថាប្រហែលត្រូវជាម្ចាស់ផ្ទះមិនពេញចិត្តនឹងការប្រព្រឹត្តរបស់ព្រះសង្ឃអង្គនោះ ក៏ពោលពាក្យបែបមិនគប្បីប៉ុន្មានម៉ាត់ដាក់លោកជាហេតុនាំឱ្យមានការរិះគន់យ៉ាងខ្លាំងព្រោះប៉ះពាល់ដល់សេចក្តីថ្លៃថ្នូររបស់អ្នកបួសផង និងនាំឱ្យរង្គៀសចិត្តអ្នកមានសទ្ធាទាំងឡាយផង ។
បើតាមរូបភាពដែលបានបង្ហោះនៅលើបណ្តាញសង្គមបានបង្ហាញថា នៅពេលដែលអ្នកផ្ទះបុរសនោះដាក់បច្ច័យប្រគេនរួចហើយ ក៏ព្រះសង្ឃអង្គនោះមិនព្រមនិមន្តចេញពីមុខផ្ទះ គឺនៅតែគង់ឈរទ្រឹងដដែល ក៏ត្រូវបុរសជាម្ចាស់ផ្ទះសួរទៅព្រះសង្ឃនោះថា ព្រះតេជគុណរកអ្វីទៀត ស្រាប់តែព្រះសង្ឃអង្គនោះឆ្លើយថា អាត្មាសុំបិណ្ឌសៀវភៅញោមមួយឡូបន្ថែមទៀត ។ គ្រាន់តែឮវាចាព្រះសង្ឃពោលដូច្នេះធ្វើឱ្យបុរសនោះខឹងភ្លាម ហើយក៏ពោលពាក្យមិនគប្បីពីរបីម៉ាត់ឱ្យភិក្ខុនោះវិញ ហើយលោកក៏និមន្តចេញទៅ ។
ជាមួយនឹងពាក្យពេចន៍តិះដៀលព្រះសង្ឃនេះដែរ ក៏មានអ្នករិះគន់ម្ចាស់អាខោននេះវិញដោយបានលើកឡើងថា បើខ្លួនមិនមានសទ្ធានឹងព្រះសង្ឃទេ មិនគួរទៅសួរដេញដោល ឬប្រើពាក្យសម្តីមិនគួរគាប់ដាក់លោកទេ ។
ប៉ុន្តែក៏មានអ្នកខ្លះបានលើកឡើងផ្ទុយស្រឡះពីអ្នករិះគន់ខាងលើបែបគាំទ្រចំពោះម្ចាស់អាខោននេះទៅវិញ ដោយសារតែខ្លួនធ្លាប់ជួបប្រឡះបញ្ហាដូចគ្នានេះដែរ ដោយបានលើកឡើងថា ព្រះសង្ឃខ្លះមកបិណ្ឌបាតចង្ហាន់ បិណ្ឌបច្ច័យ លុះពេលម្ចាស់គេប្រគេនចង្ហាន់ ដាក់បច្ច័យហើយ បែរជាពោលថាត្រូវការសៀវភៅ តែសុំយកជាលុយជាហេតុធ្វើឱ្យអ្នកមានសទ្ធាខ្លះគេអាក់អន់ចិត្ត ថយសទ្ធា ។
មតិខ្លះទៀតក៏បានលើកឡើងថា សព្វថ្ងៃនេះមានព្រះសង្ឃមួយចំនួនតូចដែលបាននិមន្តបិណ្ឌបាត ឆ្លៀតឱកាសអង្គខ្លះសុំបិណ្ឌជាសៀវភៅ បិណ្ឌជាអង្ករ តែមិនទទួលយកវត្ថុទាំងនេះ(សៀវភៅ អង្ករ…)ទេ គឺទទួលយកជាប្រាក់ជំនួសវិញ ដែលទង្វើបែបនេះហើយសប្បុរសអ្នកមានសទ្ធាខ្លះមានការអាក់អន់ស្រពន់ចិត្ត ប្រៀបបាននឹងញុំាងអ្នកមិនទាន់មានសទ្ធាឱ្យអស់សទ្ធា ញុំាងអ្នកដែលមានសទ្ធាហើយ ឱ្យថយសទ្ធាវិញ ។
ចំពោះករណីនេះមិនទាន់មានមន្ត្រីសង្ឃ ឬមន្ត្រីស្ថាប័នសាមីរូបណាចេញមកស្រាយបំភ្លឺនៅឡើយទេ កោះសន្តិភាពរង់ចាំការស្រាយបំភ្លឺករណីនេះអំពីមន្ត្រីសាមីជាដរាប ។
សព្វសត្វទាំងអស់មានជីវិតតាំងនៅបានក៏អាស្រ័យអាហារ ដែលជាផ្នែកដ៏សំខាន់ញ៉ាំងឱ្យរូបកាយ សាច់ឈាម ស្បែកសរសៃ និងពណ៌សម្បុរ ចម្រើនលូតលាស់ស្រស់បស់ទៅបាន ។ កាលបើប្រាសចាកអាហារហើយ រូបរាងកាយទាំងមូលក៏ស្វិតស្រពោន ថមថយចុះជាលំដាប់ ទាំងជីវិតទៀតសោតក៏តាំងនៅបានដោយកម្រយ៉ាងណា អ្នកបួសក្នុងព្រះពុទ្ធសាសនាក៏ត្រូវការអាហារភោជនចាំបាច់ណាស់ដើម្បីញុំាងអត្តភាពនេះឱ្យប្រព្រឹត្តទៅបានក៏យ៉ាងនោះដែរ ។
តែការចិញ្ចឹមជីវិតរបស់អ្នកបួសគប្បីឋិតនៅក្នុងនិស្ស័យ៤ក្នុងនោះការនិមន្តបិណ្ឌបាតគឺជានិស្ស័យទី១ ដែលមានសេចក្ដីជាអាទិ៍ថា បព្វជ្ជាអាស្រ័យដោយភោជនដែលភិក្ខុត្រូវបានមកដោយកម្លាំងកំភួនជើង អ្នកត្រូវធ្វើសេចក្ដីប្រឹងប្រែងក្នុងភោជនការបិណ្ឌបាតនោះអស់មួយជីវិត ។
អាស្រ័យហេតុនេះ បព្វជិតអ្នកបួសក្នុងពុទ្ធសាសនាតែងត្រាច់ចរនិមន្តបិណ្ឌបាត ស្វែងរកអាហារយកមកទ្រទ្រង់ជីវិត ដែលជាទានរបស់សប្បុរសជនគេឱ្យដោយស្មោះ ដូច្នេះមិនត្រូវញុំាងម្ចាស់ទានឱ្យអាក់អន់ថយសទ្ធានោះឡើយ ៕ សាន សារិន
ចែករំលែកព័តមាននេះ