ខេត្តរតនគិរី ៖ ការអនុញ្ញាតឱ្យទណ្ឌិត យឿង បាលូង អតីតស្នងការប៉ូលិសខេត្តរតនគិរី ដែលជាមនុស្សម្នាក់គត់ត្រូវជាប់ពន្ធនាគាររយៈ ពេល១៣ឆ្នាំ ពាក់ព័ន្ធនឹងការកាប់បំផ្លាញព្រៃឈើនៅតំបន់កន្ទុយនាគ ចេញក្រៅពន្ធនាគារកាលពីថ្ងៃទី១៤ មករា ២០១១ ដើម្បីព្យាបាលជំងឺតាមបែបប្រពៃណីជនជាតិភាគតិចនោះ ត្រូវបានក្រសួងមហាផ្ទៃបញ្ជាក់ជាផ្លូវការថា «មានការអនុញ្ញាតពីលោកអភិបាលរងទទួលបន្ទុកពន្ធនាគារខេត្តរតនគិរី» ។ គេមិនដឹងថា ការអនុញ្ញាតនោះខុសច្បាប់ ឬបែបណាទេ ដោយសារតែមន្ត្រីតុលាការបានបដិសេធថា មិនដឹង ។
លោកលីវ ម៉ូវ អគ្គនាយករងនៃអគ្គនាយកដ្ឋានពន្ធនាគារក្រសួងមហាផ្ទៃបានឱ្យដឹងថា បន្ទាប់ពីមានរបាយការណ៍ពីខេត្តរតនគិរី ដែលផ្ញើទៅអគ្គនាយកដ្ឋានពន្ធនាគារនៃក្រសួងមហាផ្ទៃ បញ្ជាក់ពីមូលហេតុដែលអនុញ្ញាតឱ្យទណ្ឌិត យឿង បាលូង អតីតស្នងការនគរបាលខេត្តរតនគិរី ឱ្យចេញក្រៅឃុំ ហើយបង្កគ្រោះថ្នាក់ចរាចរណ៍ មន្ត្រីអធិការកិច្ចនៃក្រសួងមហាផ្ទៃបានចុះធ្វើការអង្កេត ហើយរកឃើញថា នៅព្រឹកថ្ងៃទី ១៥ មករា ឆ្នាំ២០១១ ប្រពន្ធទណ្ឌិត យឿ់ង បាលូង បានធ្វើលិខិតស្នើសុំឱ្យទណ្ឌិត យឿ់ង បាលូង ចេញពីពន្ធនាគាររយៈពេលពីរម៉ោង ដើម្បីព្យាបាលជំងឺតាមប្រពៃណីជនជាតិភាគតិច ។ ពេលនោះដែរលោកងិន ណែល ប្រធានពន្ធនាគារខេត្តបានសុំច្បាប់ទៅការក្មួយនៅតែលោកឡាត់ ឡឺយ អនុប្រធានពន្ធនាគារមិនហ៊ានអនុញ្ញាតទេ ។ ប៉ុន្តែលោកបានរាយការណ៍ និងសុំយោបល់ពីលោកសូ នាក់ អភិបាលរងខេត្តទទួលបន្ទុកពន្ធនាគារ ហើយលោកសូ នាក់ ក៏បានអនុញ្ញាតដោយសារមូលហេតុអ្នកទោសមានជំងឺ និងសុំចេញរយៈពេលតែ២ម៉ោង ។
លោកលីវ ម៉ូវ បានបញ្ជាក់ថា យោងតាមច្បាប់ព្រហ្មទណ្ឌថ្មីវាមិនមានការខុសឆ្គងនោះឡើយ ហើយនៅពេលអនុញ្ញាតឱ្យទណ្ឌិត យឿង បាលូង ចេញក្រៅពន្ធនាគារ គឺមានអនុរក្សម្នាក់តាមទៅជាមួយ និងមានការរួមដំណើរដោយប្រពន្ធទណ្ឌិតរូបនោះ និងក្មួយផងដែរ ។ ក្រោយពីធ្វើពិធីព្យាបាលជំងឺតាមបែបប្រពៃណីជនជាតិភាគតិចហើយនោះ អនុរក្សក៏បាននាំខ្លួនទណ្ឌិត យឿង បាលូង មកកាន់ពន្ធនាគារវិញ នៅល្ងាចថ្ងៃទី១៥ មករា ឆ្នាំ២០១១ តែពេលធ្វើដំណើរតាមផ្លូវរថយន្តដែលដឹកទណ្ឌិត យឿ់ង បាលូង បានជួបគ្រោះថ្នាក់ចរាចរណ៍ ។ ទោះបីជាយ៉ាងណាទណ្ឌិតរូបនេះត្រូវបានបញ្ជូនបន្តចូលពន្ធនាគារវិញដែរ ។
គួររំលឹកថា កាលពីវេលាម៉ោង៥និង៥០នាទីល្ងាច ថ្ងៃទី១៥ មករា ឆ្នាំ២០១១ មានករណីគ្រោះថ្នាក់ចរាចរណ៍មួយរវាងរថយន្តភិកអាប់ជាមួយនឹងម៉ូតូនៅចំណុចមុខអនុវិទ្យាល័យអន្តេវា កសិដ្ឋានក្នុងសង្កាត់ឡាបានសៀក ក្រុងបានលុង បណ្តាលឱ្យមនុស្សបីនាក់របួសធ្ងន់ ។ ក្នុងហេតុការណ៍គ្រោះថ្នាក់នេះត្រូវបានគេចោទប្រកាន់ថា គឺទណ្ឌិតយឿង បាលូង អតីតស្នងការនគរបាលខេត្តរតនគិរី ជាអ្នកបើករថយន្តក្នុងភាពស្រវឹងស្រា ។
ព្រះរាជអាជ្ញារងលោករស់ សារ៉ាំ បានមានប្រសាសន៍បញ្ជាក់កន្លងមកថា លោកបានដឹកនាំការស៊ើបអង្កេតទៅលើករណីនេះដោយរកឃើញថា ទណ្ឌិត យឿង បាលូង ពិតជាត្រូវគេអនុញ្ញាតឱ្យចេញក្រៅពន្ធនាគារមែន ហើយការអនុញ្ញាតឱ្យជនជាប់ឃុំចេញក្រៅពន្ធនាគារនេះគឺ ដើម្បីសែនព្រេន ដោយសារមានជំងឺ ។ លោកប៉ែន ប៊ុណ្ណា អ្នកសំរបសំរួលអង្គការអាដហុក នៅខេត្តរតនគិរី ថ្លែងថា នេះជាភាពមិនប្រក្រតីមួយដែលទាមទារឱ្យមានការស៊ើបអង្កេតជាក់លាក់បន្ថែមទៀត ។
លោកយឿង បាលូង អតីតស្នងការនគរបាលខេត្តរតនគិរី ត្រូវបានតុលាការកាត់ទោសឱ្យជាប់ពន្ធនាគាររយៈពេល១៣ឆ្នាំ ដោយសារជាប់ចោទ ពីបទពាក់ព័ន្ធ នឹងអំពើពុករលួយឃុបឃិតទទួលសំណូកក្នុងរឿងកាប់ឈើដ៏ច្រើនសន្ធឹកសន្ធាប់នៅតំបន់កន្ទុយនាគ ក្នុងខេត្តរតនគិរី ជាប់ព្រំប្រទល់បីប្រទេសកម្ពុជា ឡាវ វៀត ណាម កាលពីឆ្នាំ២០០៤ ។ សាលាដំបូងរាជធានីភ្នំពេញ សំរេចឃុំខ្លួនលោកយឿង បាលូង នៅពន្ធនាគារព្រៃស កាលពីដើមខែមីនា ឆ្នាំ២០០៦ និងទើបបញ្ជូនទៅឃុំខ្លួននៅពន្ធនាគារខេត្តរតនគិរី កាលពីខែកុម្ភៈ ឆ្នាំ២០០៩ ជាបន្តទៀត ។ រឿងឃុបឃិតកាប់ឈើដ៏ធំនេះ មិនមែនមានតែលោកយឿង បាលូង ម្នាក់ទេ គឺអតីតអភិបាលខេត្តនោះក៏មានទោសជាប់ពន្ធនាគារដែរ គឺលោកខាំ ឃឿន ប៉ុន្តែបានគេចខ្លួនបាត់រហូតមក ៕
ចែករំលែកព័តមាននេះ