ខេត្តមណ្ឌលគិរី ៖ ដោយសារតែផ្ទាំងផ្សព្វផ្សាយពាណិជ្ជកម្មខ្នាតយក្ស របស់ក្រុមហ៊ុនមួយបានបង្កការក្តៅក្រហាយដល់អ្នកធ្វើដំណើរតាមដងផ្លូវជាតិលេខ ៧៦ ជាពិសេសសម្រាប់បងប្អូនប្រជាពលរដ្ឋរស់នៅក្នុងក្រុងសែនមនោរម្យ ដែលត្រូវការជាចាំបាច់ ក្នុងការធ្វើដំណើរឆ្លងកាត់ផ្លូវមួយខ្សែនេះ។
ផ្ទាំងផ្សព្វផ្សាយពាណិជ្ជកម្មដ៏ធំសម្បើមមួយ ត្រូវបានក្រុមហ៊ុនមិនស្គាល់ឈ្មោះ ធ្វើសកម្មភាពដំឡើងកាត់ទទឹងផ្លូវជាតិលេខ ៧៦ ជិតចំណុចកែងផ្លូវបំបែកក្រុងសែនមនោរម្យ ឆ្ពោះទៅឃុំដាក់ដាំ ដែលគ្មានច្បាប់អនុញ្ញាត។
បើតាមអាជ្ញាធរថា នោះជាស្លាកសញ្ញាផ្សព្វផ្សាយពាណិជ្ជកម្មឲ្យក្រុមហ៊ុន ជី ផាស អាយ អូ ខូ អិល ធី ឌី បានដំឡើងអំឡុងថ្ងៃទី១៤ ខែកុម្ភៈ ឆ្នាំ២០២២ ហើយនៅថ្ងៃទី១៥ ខែកុម្ភៈ ត្រូវបានអាជ្ញាធរក្រុងសែនមនោរម្យ ចុះទៅហាមឃាត់ និងដកហូតសម្ភារៈមួយចំនួនដើម្បីធ្វើកិច្ចសន្យា។ ប៉ុន្តែក្រុមហ៊ុនផ្សាយពាណិជ្ជកម្មនោះ នៅតែមានសកម្មភាពបំពានគោលការណ៍រដ្ឋបាលខេត្តមណ្ឌលគិរី និងរដ្ឋបាលក្រុងសែនមនោរម្យ ដោយបានផ្សារដែកដាក់កាត់តាមទទឹងផ្លូវ និងលើកស្លាកប៉ុនជញ្ជាំងភ្នំយ៉ាងគឃ្លើន ពោលគឺគ្រោងឆ្អឹងទាំងអស់ត្រូវបានដំឡើងរួចរាល់ រង់ចាំតែពាក់ផ្ទាំងពាណិជ្ជកម្មតែប៉ុណ្ណោះ។
សេចក្តីរាយការណ៍បានឲ្យដឹងថា ចាប់តាំងពីថ្ងៃទី២២ រហូតមកដល់ថ្ងៃទី២៥ ខែកុម្ភៈនេះ នៅខេត្តមណ្ឌលគិរី មានខ្យល់បោកបក់ខ្លាំង បណ្ដាលឱ្យផ្ទាំងពាណិជ្ជកម្មនោះ រប៉ើកដាច់ធ្លាក់ជ្រុះកំណត់ដែក បង្កជាហានិភ័យដល់អ្នកធ្វើដំណើរ ឬគ្រោះថ្នាក់ដល់បងប្អូនប្រជាពលរដ្ឋផងដែរ។
រដ្ឋបាលក្រុងសែនមនោរម្យនៅរសៀលថ្ងៃទី២៥ ខែកុម្ភៈ ឆ្នាំ២០២២នេះ ក៏បានចេញសេចក្តីជូនដំណឹង ស្តីពីការបញ្ចៀសគ្រោះថ្នាក់ចរាចរណ៍លើកំណាត់ផ្លូវជាតិលេខ ៧៦ ជិតផ្លូវបំបែកដាក់ដាំ ដោយរដ្ឋបាលក្រុងបានជម្រាបថា យោងតាមបញ្ហាអាកាសធាតុមានខ្យល់កន្ត្រាក់ខ្លាំង ធ្វើឲ្យផ្ទាំងប៉ាណូមួយកន្លែងនៅលើផ្លូវជាតិលេខ ៧៦ ស្ថិតនៅជិតផ្លូវបំបែកដាក់ដាំ បានដាច់រហែកធ្លាក់ចុះដែលអាចបង្កគ្រោះថ្នាក់ជាយថាហេតុដល់អ្នកធ្វើដំណើរឆ្លងកាត់ទីតាំងខាងលើ ស្នើឲ្យអ្នកធ្វើដំណើរទាំងអស់ត្រូវជិះតាមផ្លូវវាង។
ប្រជាពលរដ្ឋរស់នៅក្នុងក្រុងសែនមនោរម្យ បានសម្ដែងការមិនពេញចិត្តជាខ្លាំងចំពោះក្រុមហ៊ុនខាងលើ ដែលបានលើកស្លាកផ្សាយពាណិជ្ជកម្ម ជាផលប្រយោជន៍របស់ខ្លួន តែបែរជាបង្កការរាំងស្ទះ និងខាតពេលវេលាដល់មហាជនរាប់ពាន់រាប់ម៉ឺននាក់ ដោយផ្លូវមានចម្ងាយត្រឹមតែ ១០០ ម៉ែត្រ បែរជាពួកគាត់ត្រូវធ្វើដំណើរវាង រហូតដល់ទៅជិតពីរគីឡូម៉ែត្រ ព្រោះតែក្រុមហ៊ុនមួយនេះ កោតណាស់ដែលអាជ្ញាធរមិនហ៊ានសម្រេច… មិនខ្លាចគេថា អត់ដូចអាចម៌សេះទេឬ?។
ព័ត៌មានពិស្តារនឹងមានផ្សាយនៅលើកាសែតកោះសន្តិភាព ។
ចែករំលែកព័តមាននេះ